Solofua e le fa’amasinoga le mataupu na tu’uaia ai Luatua F. Ta’afua

O le vaiaso na te’a nei na solofua ai e le Fa’amasinoga Maualuga le mataupu sa tu’uaia ai le sa avea ma Pulesili o le Ofisa o le Tupe o le Litaea a le malo, ina ua talia e le afioga i le ali’i Fa’amasino ia Elvis P. Patea le talosaga a le malo e solofua ai le tagi sa latou fa’aulu i le silia i le 2 tausaga ua mavae.

O le vaiaso nei lea na fa’amoemoe e fa’ataunu’u aloaia ai le fa’amasinoga autu a le susuga a Luatua Filisouaiga Ta’afua. O le tama’ita’i loia tua ia Gwen Tauiliili-Langkilde sa tula’i mo ia, faatasi ai ma le lagolagosua a le ali’i loia tua ia David Vargas, ae o le ali’i loia sili lagolago ia Robert Morrison na tula’i mo le malo.

O le aso Gafua o le vaiaso na te’a nei na faia ai se iloiloga faapitoa a Luatua i luma o le fa’amasinoga, ona o se talosaga na faaulu e le malo e toe tolopo ai le fa’amasinoga autu sa fa’atulaga mo le aso Gafua o le vaiaso nei.

I lea iloiloga, na teena ai e Patea le talosaga a le malo e tolopo le fa’amasinoga autu. O le aso Lulu o le vaiaso lava na te’a nei na toe fa’atulaga ai loa le isi iloiloga faapitoa a Luatua, ona o se talosaga a le malo e solofua le latou tagi.

Na taua e le loia a le malo ia Morrison ina ua valaau le mataupu a Luatua e fa’apea, talu ai le tulaga gasegase o lo o i ai le molimau faatuatuaina e to’atasi a le malo o loo totoe, o le mafua’aga lea ua manatu ai le malo e solofua le latou tagi i le taimi nei, ae mafai ona toe faila mai i se taimi o i luma, pe a talafeagai ai.

Na taua atili e Morrison e fa’apea, ina ua fa’atoa amata mai le mataupu fa’asaga ia Luatua, e to’alua molimau faatuatuaina e le malo sa i ai, peita’i ina ua fa’agasolo mai masina o lenei mataupu, na fa’afuase’i ona maliu le isi molimau, ona totoe mai ai loa lea o le molimau e to’atasi e pei ona i ai i le taimi nei, lea fo’i o loo feagai ma gasegase tuga o le tino.

E leai se fa’afinauga a le itu a Luatua e tusa ai o le talosaga a le malo. I le mae’a ai ona fa’afofoga o le fa’amasinoga i le talosaga a le malo, na faia ai loa le faaiuga ina ia solofua le mataupu faasaga ia Luatua e aunoa ma se masalosaloga tatau.

I se isi faaupuga o le solofua ai o le tagi fa’asaga ia Luatua e aunoa ma se masalosaloga tatau, e i ai le avanoa e mafai ai e le malo ona toe faila la latou tagi fa’asaga ia Luatua, peita’i e le o mautu mai i le taimi nei poo afea ua fa’amoemoe le malo latou te toe failaina ai le latou tagi i luma o le fa’amasinoga.

Na taua e le loia a Luatua ia Tauiliili-Langkilde lona agaga fiafia ina ua mafai ona faia le faaiuga a le fa’amasinoga e fa’aleaoga ai le tagi sa tu’uaia ai le sa ia tauaveina mo le lata i le 3 tausaga.

“E le faigofie lenei mataupu mo Luatua, ua tele tausaga o fai lenei mataupu ma avega ia te ia aemaise ai lona aiga. O se lagona fiafia ia maua ma Vargas ina ua mafai ona solofua e le fa’amasinoga le tagi a le malo, ina ia mafai ai ona aga’i i luma o le olaga o Luatua,” o le saunoaga lea a le tama’ita’i loia.

Sa ia taua fo’i e fa’apea, talu ona amata mai lenei mataupu, ua tele isi faaletonu ua tula’i mai i le soifuaga o Luatua, e le gata ua faigata ai ona saili se isi ana galuega e tausi ai lona aiga, ae ua fetaia’i fo’i o ia ma tulaga fa’aletonu i le itu tau tupe.

“O lenei tagi ua na o ni tu’uaiga, peita’i ua avea lea ma tulaga ua faigata ai ia Luatua ona aga’i i luma o lona olaga. Faafetai fo’i i le fa’amasinoga i lona silasila toto’a i tulaga uma o lenei mataupu.”

Saunoa atili le loia a Luatua e fa’apea, talu mai lava le ulua’i taimi na faatoa faila ai e le malo le latou tagi fa’asaga ia Luatua, sa tumau pea lona tulaga mama seia oo mai lava i le taimi na solofua ai e le fa’amasinoga le tagi fa’asaga ia te ia.

Saunoa atili le loia a Luatua e faapea, afai e i ai se finagalo o le malo latou te toe failaina lenei mataupu i luma o le fa’amasinoga, ua la sauni fo’i ma Vargas faapea ai ma Luatua e finauina lenei mataupu ina ia matuinoa, e tumau pea le tulaga mama ma le le ta’usalaina o Luatua i luma o le fa’amasinoga.

O le tagi fa’asaga ia Luatua na tofu atu i luma o le fa’amasinoga i le masina o Aperila o le 2016, ina ua mae’a ni su’esu’ega sa faia e se Vaega Su’etusi mai Amerika ma latou fa’aiuina ai, o lo o masalomia le fa’aaoga le tatau e Luatua o tupe a le Litaea mo ia lava i le aofa’i e $112,000.

Ina ua alia’e mai tu’uaiga fa’asaga ia Luatua i le amataga o le 2015, na faia ai loa le faaiuga ina ia fa’amalolo o ia mai lona tulaga o le Ta’ita’i o le Ofisa ae maua pea lona totogi, peita’i i le masina o Ianuari o le tausaga e 2016, na faamuta aloaia ai loa le tautua a Luatua mai le Ofisa o le Litaea.

O le afioga a Fanene Morris Scanlan ua tu’umalo, lea sa avea ma Ta’ita’i o le Komiti Fa’afoe o le Litaea, o ia lea na faia le fautuaga ina ia faia se suesuega e uiga i lenei mataupu, ona o tu’uaiga i le sainia lea e Luatua o se ioega mo le fa’aaogaina o tupe a le litaea e malaga ai ma nisi o sui o le ofisa i fonotaga i fafo, atoa ai ma le tu’uina atu e Luatua o se siaki e totogi ai se kamupani teufale sa fa’atinoina galuega mo le Ofisa o le Litaea, a o lea kamupani o loo aofia ai o ia. E tusa ma le 20 moliaga na faila e le malo fa’asaga ia Luatua.