Faaauau pea vaiaso fou le fa’amasinoga autu o Filisouaiga Ta’afua

O le aso Gafua o le vaiaso fou, Fepuari 11, 2019 e pei ona fa’atulaga mai e le Fa’amasinoga Maualuga i le tausaga na te’a nei, o le a fa’ataunu’u ai pea le fa’amasinoga autu o le ali’i sa avea ma Pulesili o le Ofisa o le Tupe a le Litaea a tagata faigaluega a le malo, e ui sa finau malosi le loia a le malo ina ia toe tolopo lea fa’amasinoga.

O le vaiaso nei na iloiloina ai i luma o le Fa’amasinoga Maualuga se talosaga na fa’aulu e le loia a le malo, e talosagaina ai le toe tolopo o le fa’amasinoga seia aulia se isi aso, ona o le molimau autu o lo o fa’amoemoe i ai le tagi a le malo, o lo o feagai o ia ma gasegase tuga o le tino i le taimi nei.

O le ali’i loia sili lagolago ia Robert Morrison na tula’i mo le itu a le malo i lenei iloiloga, ae o le tama’ita’i loia ia Gwen Tauiliili-Langkilde, faapea ai ma lona sui lagolago ia David Vargas sa fai ma sui o le susuga a Luatua Filisouaiga Ta’afua.

O le afioga i le ali’i Fa’amasino ia Elvis P. Patea sa iloiloina lenei mataupu, fa’atasi ai ma afioga i Fa’amasino Lagolago ia Mamea Sala Jr ma Tunupopo Alalafaga Tunupopo.

Ina ua valaau le mataupu, na fa’ailoa aloaia e Patea le tauaao lea e le fa’amasinoga o le kopi o le talosaga a le malo, atoa ai ma le kopi o le tali tete’e a Luatua ma ana loia e tusa ai o le talosaga a le malo.

O lo o talosaga le malo ina ia toe tolopo le fa’ataunu’uina o le fa’amasinoga, ae o loo finau le itu tete’e ina ia fa’aauau pea le fa’amasinoga, poo le solofua loa o le tagi fa’asaga ia Luatua.

Na faailoa e Patea e fa’apea, o le aso Tofi o le vaiaso na te’a nei, Ianuari 31, 2019 na fa’atoa faila ai e le malo le latou talosaga ina ia tolopo le fa’amasinoga. Sa fia malamalama le fa’amasinoga i le mafua’aga o le tuai ona faila e le malo o le latou talosaga.

Na taua e Morrison e fa’apea, e to’alua molimau fa’atuatuaina lava a le malo sa i ai ina ua fa’atoa faila lenei mataupu i le 2016, peita’i o le tausaga na te’a nei na maliu ai le isi molimau, ona totoe mai ai loa lea o le molimau e to’atasi.

O le molimau lea e to’atasi o lo o i ai pea o ia i le atunu’u i le taimi nei, peita’i o le fa’afitauli ua tula’i mai, e le o atoatoa lona soifua maloloina, ona ua a’afia o ia i se tasi o gasegase tuga, ma ua moomia ai le auina atu o ia i fafo mo ni togafitiga.

O le vaiaso na te’a nei e pei ona taua e Morrison sa la toe fesoota’i ai ma le molimau i luga o le imeli, ma ia fa’ailoa atu ai ia te ia, o se taimi o le masina lenei o Fepuari ua fa’amoemoe e malaga ai i Hawaii mo lana talavai atoa ai ma lona taotoga i lona gasegase, ma ua le mafai ai ona ia tula’i e molimau i le fa’amasinoga ua fa’atulaga mo le vaiaso fou.

O le aso 11 o Mati 2019 lea na taua e Morrison i le fa’amasinoga e toe taliu mai ai i fanua le molimau, ma agava’a ai loa le fa’atulagaina o se isi aso e fa’aauau ai le fa’amasinoga autu o lenei mataupu.

Na taua atili e Morrison e fa’apea, i le mae’a ai lea ona ia faitau i le tali a le itu tete’e, na atagia mai ai le tu’uaia e le itu tete’e o le malo, o i latou le mafua’aga ua ala ai ona fa’atuatuai le fa’ataunu’uina o lenei mataupu. Na teena e Morrison lea tu’uaiga.

Sa ia taua e fa’apea, ua leva ona tapena le malo mo lenei mataupu, ae o le itu tete’e lea na mua’i talosaga i le fa’amasinoga ina ia tolopo le fa’amasinoga autu sa fa’atulaga i le amataga o le tausaga na te’a nei.

Sa ia teena fo’i le fa’afinauga a le itu tete’e fai mai, na mafua ona toe tolopo mai le fa’amasinoga autu sa fuafuaina mo le tausaga na te’a nei, ona ua fa’atamala le malo i le tu’uina atu lea o mau fa’amaonia o lenei mataupu i le itu tete’e. Na fa’ailoa e Morrison i le fa’amasinoga, ua mae’a ona ia tauaao uma atu i le itu tete’e mau fa’amaonia e fa’atatau i lenei mataupu.

Na fa’auilavea Patea ma ia fesili ia Morrison, pe aisea na ia fa’atali ai i le minute mulimuli e faila ai lana talosaga, ae o le masina o Setema o le tausaga na te’a nei na fa’atulaga mai ai le aso e faia ai le fa’amasinoga autu mo le vaiaso fou.

Na tali Morrison e fa’apea, o le vaiaso na te’a nei na fa’atoa ia mauaina ai le imeli mai le molimau a le malo, e fa’atatau i le tulaga pagatia o loo i ai lona soifua maloloina, atoa ai ma le fuafuaga e malaga i Hawaii mo lana talavai.

Ina ua fesili Patea ia Morrison pe fa’afia ona la fetusia’i ma le molimau a le malo i imeli, na tali le ali’i loia, na te le manatua, ae afai e fia malamalama atili le fa’amasinoga, e mafai ona valaau e le fa’amasinoga le molimau ina ia oo mai e fa’amanino lea tulaga.

Na fa’afuase’i ona tali mai le afioga a Patea i lona si’ufofoga malosi ma fa’apea mai, “E le fa’amalosia e le malo le faia o lena tulaga. O oe o le loia a le malo, o oe fo’i e ana le tagi.”

Na finau le loia tete’e ia Tauiliili-Langkilde latou te lei mauaina lava se ripoti mai le Foma’i poo ni tusitusiga e fa’amaonia ai tulaga o le gasegase o le molimau a le malo. Sa ia taua e fa’apea, e ui i le tele o taumafaiga mo le fia maua o se ripoti, e foliga mai e le o i ai lava se taumafaiga a le malo ina ia fesoasoani atu.

Na taua fo’i e le itu tete’e e fa’apea, i se latou fonotaga ma le molimau i le masina o Oketopa o le tausaga na te’a nei, lea fo’i sa auai ma le loia a le malo, sa ia fesiligia ai le molimau pe gafatia ona ia tula’i e molimau i le fa’amasinoga mo le vaiaso fou, sa tali mai o ia, e mafai ona ia molimau.

Na finau le itu tete’e e faapea, e le gata ua tuai ona faila e le malo le latou talosaga, ae ua le talafeagai fo’i le toe tolopo o le mataupu ma le kalena a le fa’amasinoga. E le gata fo’i i lea, afai ae toe tolopo le fa’amasinoga, o le a a’afia ai aia tatau o Luatua, e pei ona agava’a ai o ia i le vave faia lea o lona fa’amasinoga.

Na finau fo’i le itu tete’e e fa’apea, o le masina o Aperila o le tausaga nei e atoa i ai le 3 tausaga talu ona faila e le malo le latou tagi fa’asaga ia Luatua, ma ua tatau ona fa’ataunu’u loa lenei fa’amasinoga.

I le mae’a ai ona iloilo e le fa’amasinoga o fa’afinauga mai itu e lua, na teena ai loa le talosaga a le malo ina ia tolopo le fa’amasinoga. O le aso Gafua o le vaiaso fou lea ua fa’atulaga e saili ai se vaega iloilo iuga latou te fa’atautaia se faaiuga o lenei mataupu.

O le masina o Aperila 2016 na faila ai e le malo le latou tagi fa’asaga ia Luatua, ona o tu’uaiga i lona fa’aaoga fa’asolitulafono lea o se vaega tupe tele mai le Ofisa o le Litaea a le malo e silia i le $100,000, i le taimi a o avea o ia ma Pulesili o lea Ofisa.