Tala I Vaifanua

TU'UF'AATASIA ULUA'I 'AU HANDBALL ALI'I AMERIKA SAMOA AUAI OCEANIA 2019

O le ulua'i taimi lenei ua fili ai se 'au fili a Amerika Samoa i le ta'aloga Handball i le itupa o Ali'i Matutua ma ua koleni fa'apitoa fo'i i latou i le malae Handball i le  Night Hawk Maliu Mai Beach Resort.

Ua fa'atulaga lenei 'au fou a le atunu'u, o le a fa'aalia o latou agava'a i le taumafaiga ua fa'atulaga e malaga e tauva ai fa'avaomalo i Adelaide, Ausetalia, i le ta'milosaga a le Oceania ia Fepuari 20 i le 24, 2019.

E pei lava fo'i ona fa'atulaga, o lenei fo'i ta'amilosaga a le Oceania Handball mo Ali'i Matutua e mafai ona maua ai fo'i le latou avanoa e toe auai ai i le ta'amilosaga Handball e faia lea i le a'ai o San Diego California ia Oketopa 2019 mo le World Beach Games.

Afai ae toe fa'amanuia le latou taumafaiga i lenei ta'amilosaga i San Diego, ona maua lea o se latou avanoa i le 2020 International Handball Federation World Championships i Italia.

"Ua silia i le lua masina o faia pea matou koleniga ma ta'aloga fa'atauva i lea fa'agatama i le Malae Oneome mo le Handball. Na toetoe a le tu'ufa'atasia se 'au ona o le manatu, e le o lava tama matutua e mafai ona tauva. Peita'i ua amata ona gasolo atu nisi ma ua va'aia, ua fa'atuputeleina le naunau ia i latou, fa'atasi ai ma le iloa i le ta'aloga i ona tulafono ma ala e sofa'i ai ni 'ai ia manumalo. O tatou lava tama talavou e agava'a tele i le togi, ma ua iloga e taleni i latou ua auai nei i le tauva i lea fo'i fa'agatama pe afai o le a'oa'o fa'aleleia pea i latou ia iloa ala e fa'ase ai sui o 'au o latou fetaui, ae fafao ai se togi mo se sikoa,” o se tala lea a le ali'i Peresetene o le Asosi Handball a Amerika Samoa, Carl Floor Sr.

I lenei taumafaiga ua fa'ailoa mai e Floor, "Ua ou le manatu lava ina ia aumaia ni tama ta'a'alo mai fafo e ta'a'alo mo Amerika Samoa, ou te mautinoa lava o lo'o lava le tomai togi sa'o ma le malolosi o tau'au o tatou fanau e mafai ai ona tu'ufa'atasia o latou loto, ae maise o latou tomai e a'o fa'alelei i tulaga o le fa'ase mai le Lakapi ma le Football, e mafai ai ona iloa manuva le polo ma maua se paganoa e fa'asao atu ai le togi i le sikoa. I le va;aiga i le tatou 'au ua tu'ufa'atasia nei, e le o vaivai i latou, aua ua tulata fo'i i taimi e malaga ai e tauva, ua i ai fo'i latou loto i le taumafaiga.”

"O le isi lava lu'i lea ua ou tu'uina i le 'au a tama matutua lea ua i ai nei, ua fai i ai le tala, “Afai na mafai e le 'au a teine laiti ona maua le avanoa e malaga ai ma tauva i le Olimipeka a le Fanau Talavou i lenei ta'aloga, aisea o le a le mafai ai e outou o tama matutua se avanoa fa'apena?"  Lea la ua va'aia ai le naunau o i latou e fa'asa'o lea lu'i mo le latou ola fa'atauva i le Handball,” o se isi lea toe fa'aopoopo mai a Floor e tusa o lana 'au ua mae'a fili.

E tolu aso o le vaiaso o lo'o faia ai ta'aloga ma koleniga a le 'au fili lea i le latou Malae i Fogagogo, ma ua koleni fa'atasi ai ma tama'ita'i lea na malaga i le 'au Handball a tama'ita'i ina ia fa'atumau le fiafia ma fa'alautele le iloa fo'i o le 'au a tama'ita'i latou mo a latou ta'aloga faitaulia i lenei tausaga.

O le susuga Clayton Mahuka, Joey Sagapolu ma Floor, lea o lo'o avea pea ma faia'oga i au Handball uma nei, ae maise ai o le taumafai atili e atina'e le tomai fa'apitoa o le 'au fou a tama, ia saunia ai mo a latou ta'aloga fa'avaomalo o le a malaga ese atu ai i lenei masina.

O se mea lelei o le koleni fa'atasi o ali'i ma tama'ita'i, aua ua fa'aleleia atili ai tomai o tama'ita'i talavou i le tauva ma ali'i aua e masau mamao togi a ali'i, ae koleni ai fo'i ma togi a tama'ita'i i le la'asaga o tauva ai ali'i i lea fa'agatama.

"Afai o le malolosi lea o togi a ni 'au Handball o le a matou fetaui i fafo, ae ua mae'a koleni atu ai i le masau o tau'au o ali'i Samoa. E ese mai fo'i lena, ae o le fa'aseina fo'i o tagata ta'a'alo mai le maua o lau togi, maua se masele e fafao ai se togi mo se sikoa,” o le tala a le tama'ita'i o Roselyn Faleao.

O i latou ua i ai nei suafa i le 'au fili a Ali'i mo le Handball a Amerika Samoa e aofia ai: Mateaki Adam.T. Koate; Tauti Lemac T. Vaiula;  Thompson Mark Aoao; Paul Iese Collins; Onosaiimeatga Saddam Tovale; Penitila Kesi Leapaga lll;  Tyrese Acilles Leutele; Joel Liolio Sualevai; Pemerika Tauiliili Mahuka ma Joey Sagapolu.

FAIFAA'TO'AGA AMERIKA SAMOA - FAAAOGA LATOU FUA O FA'ATO'AGA I FALE'AIGA

Ua mae'a ona fa'alauiloa mai le tele o nisi o faifa'ato'aga o fuala'au 'aina a le atunu'u o lo'o toto a latou fa'ato'aga nei i le vai, ua fa'amanuiaina latou taumafaiga ma ua fa'aaogaina fo'i e fale'aiga le tele o latou fua o fa'aeleeleaga.

O nisi o nei fale'aiga Paradise Pizzas i Pago Pago ma Nuuuli, sa faia le latou folasaga i le taumafaiga a le DOH Tobacco Diabetes i le masina ua te'a, ma sa latou fa'alauiloa ai, "O le matou fale'aiga ua mafuli e kuka atu mea'ai paleni, ma ua fa'aaogaina ai fua o fa'aeleeleaga a o tatou tagata faifa'ato'aga fuala'au 'aina. O latou fuala'au 'aina ua fa'aaogaina o tamato ma maukeni."

Ina ua fesiligia le sui faifa'ato'aga ua fa'aaogaina e latou nei, ae fa'ailoa mai o le susuga Peter Gurr ma lana fanau.

Ua maua se avanoa mo ni ata o lea taumafaiga, ma ua iloga ona matagofie fo'i fua o fa'aeleeleaga ua fa'ailoa fa'alaua'itele ai le totoina ma le lelei ona tapena o lea fa'ato'aga mo le taimi o le seleselega i au galuega tiga.

O le susuga Peter Gurr sa avea ma Sui Fa'atonu o le Matagaluega o Fa'ato'aga mai le tele o tausaga, ae a'o le'i avea lava ma sui i lea galuega a le Matagaluega o fa'ato'aga, o ia lava sa avea fo'i ma Faifa'ato'aga i le atunu’u, ma o lo'o fa'aauau pea lana lea matata ua fa'alautele ua o'o atu i fuala'au 'aina.

O se tasi fo'i o sui o lo'o iloga mai le tele o latou tamato, latisi ma isi fuala'au 'aina o lo'o latou totoina o le auaiga lava fo'i lea o Gurr i Pava'ia'i ma Aoloau. Lea fo'i o lo'o iloga le latou tautua i le sapalaiga o fale'aiga ma faleoloa i fua o latou fa'aeleeleaga, o fa'ato'aga e totoina i le vai. O le susuga a Hirata, se tasi fo'i sa leva tausaga o faia'oga i le ASCC Land Grant i Malaeimi, ua ia sapalaia le Family Mart Nuuuli ma le Aiga i Pago Pago  i ana latisi fai sanuisi ma e ui ina maualuga le tau, ae ua ma iloga mai  e mama lelei nei latisi ma tofo lelei fo'i i le tausami. Ua mau fa'atuatuaina fo'i tatou faifa'ato'aga fuala'au 'aina e totoina i le vai, o lo'o tausia lava le soifua maloloina lelei i le tausiga lelei o latou fa'ato'aga e ona fua nei ua taumamafa ai le atunu'u.

O le susuga Edward Avegalio e masani ona va'aia ana leipo o lo'o ia sapalaia fo'i le faleoloa o oloa a le Forsgren i le Lauou Shopping Center i le Latisi Fai Sanuisi. O nisi nei o tatou faifa'ato'aga ua mafai ona mautinoa faleoloa ma fale'aiga o lo'o  latou sapalaia, ae mautinoa o lo'o to'atele mamao atu faifa'ato'aga i le vai a le tatou Malo o lo'o ua mae'a fesoasoani i ai le Pacific Youth & Community Development.