Alosio Pinoy'ill Fasavalu foa'i pulela'a mo Samoa Baptist Academy

O le ali'i talavou o Alosia Pinoy'ill Fasavalu mai le afio'aga o Malifa, Samoa ma Tafuna, ua ia faia se mea sili ua ia gafatia, ina ia ua taina le Pulela'a ma teuteuina i mamanu Samoa, e faimeaalofa ai i le Samoa Baptist Academy i Happy Valley e fa'auia atu i nai ona tei o lo'o a'o'oga ai, David - Level 8, Ruta - Level 5 ma Pinoy - Level 3.

O lea meaalofa sa taua'aoina i le afiafi o le aso Lua na te'a nei i le Malumalu Samoa Baptist Academy ma sa talia ma le agaga fa'afetai ma le fiafiatele e le faletua o Lucy Tafao, le pule a'oga.

Ina ua taua'aoina le meaalofa i le aoga, sa fa'ailoa e Fasavalu, "O lo'u alofa i le fanau a le tuafafine o lo'u tama, lea ua faia ai lava le meaalofa ina ia faamau fa'ailoga ai fo'i lo'u asiasi mai iinei ma avea ma fa'asinomaga o lo latou nofo a'oa'oinaai i le tou A'oga. Faafetai mo faia'oga ma outou le pulega o le a'oga, aua ou te iloa, e a'oa'oina lelei lava nai o'u tei. Ona o lea o le a fa'ai'uaso le ali'i o David, e tatau ona fai foi sona sao e manatua ai lana a'oga na amata ai ona tausaili le atamai."

Ua le gata le fiafia ia David ae ua fa'asolo atoa i le  aua'oga uma a le aiga Sa Apineru, ma ua fa'ailoa mai e Tafao ia Fasavalu, "O lau taleni ua e fa'aaogaina tatau mo le foa'i lenei, ia alofagia e le Atua ma fesoasoani atili ia te oe ina ia e ola ai ma sapaia ai lou olaga tausi aiga. Amu'ia i matou ua maua fua lenei foa'i taua, aua afai e ititi lava nai fasi la'au e taina ai mamanu ma fa'atau mai i tau taugata, o le a se tau e mafai ona avatu mo lenei galuega pe ana fai nei e totogia? O le tali e matua taugata lava, ae ua e fa'asili le alofa. Fa'afetai ua a'e sou manatu ina ia foa'i e fa'aauala i le a'oga a nai ou tei, talosia ae ua mautu le a'oa'oga ia te outou  le Sa Apineru, ina ia taui ai e le Atua lenei galuega alofa ua faia e le tou tei matua."

O le galuega ua foa'ia sa taina mai lea i le oga poumuli, o se la'au sa fa'asao lava i tuafale o le fale o le latou aiga i Tafuna. O le matua mamafatu fo'i latou o le pulela'a, ae ua matua ta gata fo'i, peita'i, ua naunau lava Alosio ina ia mae'a lana poloketi mo nai ona tei a'o le'i toe taliu i Samoa lana tafaoga.

Ina ua fesiligia i le taimi na fa'aalu i le taina ma le toe valia o le pulela'a i le vanisi, ae fa'ailoa mai e lua lava vaiaso sa faia ai le galuega. Sa fa'ala muamua fo'i le la'au ina ia mautinoa o mautu lona fausaga ma e leai ma se fao ua fa'aaogaina i le poloketi lenei.

O lenei ali'i talavou, ua mae'a taua'aoina lona tusi pasi mai le Leulumoega Arts School, ua gafatia e ia ona vali ma tusi ata i le tapoleni ma pepa ata, fa'atasi ai ma le ta fa'atagata ma mamanu upeti o so'o se ituaiga.

Ina ua fesiligia o ia i lona naunau i lea fo'i taleni, ae ata le ali'i 17 tausaga le matua ma fa'ailoa mai, "O le matou aiga o lo'o i ai le taleni ‘Ta Tatau’ e tufuga le tausoga o lo'u tama, Li'aifaiva Lavea lea ou te nofo ai i Malifa, ma ua ou manatu ai, e tatau fo'i ona ou taumafai a'u ina ia mautu lelei ia te a'u le matou faiva, ma e ao lava ona fa'amasani mai i le amataga seia o'o i le fa'aiuga o so'o se sailiga manuia. Fa'afetai ua mae'a le ulua'i la'asaga o le manulauti tau'ave a lenei aiga, ae fuafua ina ia ou avea ma se tasi o le au soa a lana susuga le Matuaofaiva LI'aifaiva i se vaitau e le o toe mamao."

O Fasavalu o le atali'i o le susuga Ionatana Fasavalu ua loa aso o avea pea ma faia'oga i le Nuuuli Voctech ona soso'o ai lea ma le avea ma tagata faigaluega i le tatou ASCC LAd Grant, vaega o le Fa'ato'aga.

Na auai atu le faletua o Helen Fasavalu Apineru ina ia avea ma sui e saunoa fa'apitoa e fa'ao'o le foa'i, ma sa auai fo'i si ona uso o Afiona Fasavalu e taumafai ona fesi'ita'i le poloketi aua e matua mamafa lava le oga poumuli lea ua fa'aaogaina mo le galuega matagofie.

Saunoa Tafao, "O le a toe fa'apulou lelei lava lenei galuega matagofie, se'ia o'o mai malama i le taeao, ona fa'ato'a tatala fa'apitoa lea i luma o le a'oga atoa pe a poto mai mo le fonotatalo e amatalia ai le aso a'oga, o iina o le a fa'asalalau atu ai ma fa'alauiloa le galuega matagofie ua taua'aoina nei. O iinei ua e tu'u ai le pulela'a lea, o iinei lava o le a nofo tumau ai, i le malumalu mo sauniga a le Samoa Baptist Academy."