Tu’umalo le susuga le Fa'amasino Lyle Richmod i Hawaii

Ua tuua le malo e le susuga Lyle Richmond, o se tasi o Tama o le atunu'u sa tautua i le Vaega o Fa'amasinoga a le tatou malo ma ua ritaea mai ai, ae maise fo'i o lana tautua o se Loia Sili i se vaitaimi ua te’a.

“O lenei tama, ua iloga lana tautua i le tatou atunu'u e ala i le fa'amalosiga o le tulafono, fa'afetai ia te ia i lona tula'i mai i ona tofiga sa galue ai, ua iloga fo'i lona alofa i le tatou Malo, ae maise o lona aiga. Tau ina ia folau i manu lana malaga,” o se tala lea a Aumua Amata, faipule o Amerika Samoa i le Konekeresi.

Na maliu o ia i le aso 21 Ianuari, 2019 i le itula e 5:15 i le afiafi a'o fa'ataotolia lona gasegase i le Queens Medical Center i Honolulu. Sa poto ane i ai lona aiga, ae maise le Faletua le afioga Papali'i Violet Richmond.

"Ua iloga le tagata tautua i lea ituaiga o tofi sa tula'i ai i le tonu o ana fa'ai'uga fai, e le tafea gofie lana tofa loloto i le au o tu'ua'iga, ae fa'alologo ma faia ana fa'ai'uga tonu e tusa o fa'amaumauga. Fa'afetai mo lau vaega sa e faia a'o e tautua ai i le vaega o fa'amasinoga,” o se tasi lea o manatu fa'aalia o le afioga le Kovana Sili e tusa o le tu'ua ai o le Malo e Richmond.

O le tautua a Richmond i le tatou malo na tofia mai ai o ia e le Initeria ina ia avea ma Fa'amasino Lagolago i le tausaga 1991 ma e 25 tausaga o le tautua ae fa'ato'a fa'amavae mai o ia i le tausaga 2016.

Na avea o ia ma Loia Sili a le tatou Malo i le vaitausaga o le nofoaiga a Kovana A.P. Lutali, ma sa avea fo'i o ia ma loia a le Kovana i le nofoaiga a Kovana UIfa'atali Peter Coleman i lana toe nofoaiga.

Na faigaluega faatasi i la'ua ma le susuga Frederick O'Brien, lea fo'i sa mafai ona fa'aalia lona lona finagalo fa'amaise i le tina ma le fanua loto fa'avauvau, "O Richmond o se fa'amasino agava'a tele ma o se tama lelei i lona aiga. O ana fa'ai'uga fo'i e atagia ai lona lea tagata, e tu'u avanoa i le vasega o talavou ua sasi fa'aiuga fai, ma e le fo'i lana fa'aiuga i le tagata ua tauau ua manatu e malosi atu i lo le tulafono.”

Ua fa'ailoa fo'i e Senatoa Tuolo Fruean, o se tasi sa la'ua so'otau'au i le tofiga Fa'amasino Lagolago, "O le susuga Lyle Richmond e matua agava'a i lana matata na galue ai, e matua la'ei lava lea tama i le onosa'i. E ui ina tetele fa'amasinoga sa ia se'ei ai e soalaupule se fa'ai'uga, ae o lona onosa'i na mafai ai lana tautua lea. Agava'a tele lea fa'amasino i lona lea tofi."

E le gata i lea, ae ua matauina e nisi o a latou uo mamae, le alofa tele ma le fa'aaloalo tele o Richmond i lona to'alua, le afioga Papali'itele Violet

O lana tautua a'o talavou lava o ia sa avea ai ma Fitafita o le Fuava'a po'o le US Navy,ma e mitamita o ia i lona lea faiva, aua e le misia lava ona ia la'eia ona toniga o le Fitafita o le US Navy i aso fa'ailoga uma o Fitafita Tuai fa'apea fo'i ma sauniga mamalu o le Sisigafu'a a le tatou Malo i tausaga ua mavae ao le fa'atafa gasegase o ia.

E le galo ona foliga tamali'i i lana ataata pe lua fetaui, e te le iloa se aso ua e va'aia ai ni ona foliga to'atama'i i lana galuega o le fa'amasino, loia po'o le faufautua fo'i i le tatou Kovana i na tausaga ua tuanai, ae manatua pea lona onomea i ona iaei fa'asamoa o le iefaitaga ma le aloha e faigaluega ai i aso uma, ae maise o laa ataata e iloga ai lona tausa'afia.

O le a toe logo atu le mamalu lautele o le atunuu sa ia tautuaina i ona toe sauniga, pe a o'o ina sauni le faletua ma le fanau ma aiga e fa'atulaga mo le silafia e i tatou uma. Fa'amaise le Atua i le tina Papali'itel Violet ma le fanau ma aiga.