Tala I Vaifanua

FIA AVEA MA TAGATA TA'ALO AUFILI VOLLEYBALL - AUAI ANE I TA'ALOGA!

Ua fa'atulaga o le aso To'ona'i nei 19 Ianuari, 2019 i le 12:00 i le aoauli i le Faleta'alo a le a'oga maualuga a Tafuna, o le taimi atofa e o'o atu ai i latou uma, tama ma teine, ina ia filifilia ai nisi o talavou e koleni fa'apitoa mo le 'au fili e masi'i i Ta'aloga a le Pasefika 2019.

"O le taumafaiga lenei ina ia maua uma lava i latou e lelei i lea fa'agatama. Manatua o i latou e lelei ta'a'alo ae le'i ta'alo muamua lava i se liki a le Asosi Volleyball a Amerika Samoa (ASVBA), e mafai fo'i ona e tauva mo sou avanoa i lea 'aufili ua tausailia nei,” o se tala lea a le failautusi a le ASVBA Pona Sitagata.

Ua vala'au fa'alaua'itele i talavou e fiafia i lea faagatama e taalo fa'atauva ai mo le tatou atunu'u. O i latou fo'i e ao ina tauva i lea fa'agatama e tatau ona silafia lelei, o le fa'anaunauga o le Asosi Volleyball a Amerika Samoa, ia maua se 'ai mo Amerika Samoa i le Ta'aloga a le Pasefika lea e faia i Samoa i le tausaga nei.

Ua le fa'atulagaina mai ni tapulaa o tausaga o tagata ta'a'alo i lenei tausaga, ae ua mana'omia tele i latou e lelei tomai i lea fa'agatama ma ua silafia le tele o tulafono o ta'aloga Volleyball fa'avaomalo.

Ua fa'ailoa mai e tatau ona taulima mai lou tusi folau ma ia la'ei mai e tusa o le fa'amoemoe mo ta'aloga e fili ai le 'au. Ia nofouta le tagata i lona vaiinu ma se mea'ai mama mo le tausiga lelei o lona soifua maloloina lelei, aua e ao lava ina lava tapena nei tulaga uma pe a taumafai e fili so'o se 'au fa'atauga fa'avaomalo.

Afai e le'i i ai se tusi folau, ia tau'a'aoina lou ID po'o le Laisene ave ta'avale, e fa'amaonia ai lou suafa ma ou tausaga ma isi fa'amaumauga uma tau ia te oe, le tagata ta'alo.

TULSI GABBARD FIA TAUMAFAI MO LE PERESETENE O AMERIKA:

O le tama'ita'i Faipule o Hawaii i le Konekeresi a le Malo Tele, Tulsi Gabbard, o se alo tama'ita'i fo'i o Mike Gabbard o Leloaloa, ua fa’alauiloa ana fuafuaga e tauva mo le tofi Peresetene o Amerika i le 2020.

Fa'ailoa e Mike Gabbard, "Ou te le'i mautinoa ua fa'alauiloa e Tulsi sana filifiliga i lea itu, ae o mea fo'i nei, e mulimuli lava ona iloa e matua. Peita'i, e alofa tele o ia i ona tagatanu'u, afai e manuia, ou te iloa e na te faia ni mea lelei mo Amerika atoa."

O Tulsi Gabbard o se tasi o fitafita tuai sa tautua mai i le taua i Iraq, ae o lo'o avea nei ma Faipule o le Setete o Hawaii ma ua auai fo'i e tautua i le tele o Komiti a le Konekeresi e pei o le Foreign Affairs Committee.

O ia sa soifua a'e i Amerika Samoa le nu'u o lona tama, o lo'o auai fo'i o ia i le Vaega Fa'aupufai a le Temokalasi ma ua ia fa'ailoa mai, "E tele lava ni mafuaga tetele ua ou manatu ai o le a ou tauva mo le tofi Peresetene o Amerika. Ua tele na'ua ni luiga ua feagai ai nei ma tagatanu'u o Amerika, ma ua ou popole fo'i i nei atugaluga, ua ou manatu ai, ou te taumafai i le tofiga ina ia mafai ona ou fesoasoani e soloia nei fa'afitauli ua alia'i mai.”

O se tasi o mea sa ia fa'ailoga o le tulaga o le tausiga o le Soifua Maloloina ia gafatia mo tagata uma; o ala e toe fa'amalosia ai le puipuiga o tagata mai a'afiaga o soligatulafono ae maise lava o le tulaga o suiga matuia o le tau ua a'afia ai le paneta atoa.

I sana tusitusiga i luga o feso'ota'iga Twitter, sa ia toe fa'amanino ai lona talitonuga, "Afai e tasi o tatou loto ma lo tatou fa'amoemoe ia tutu fa'atasi, so'ofa'atasi i le alofa o le tasi i le tasi, fa'apea ma le alofa i lo tatou atunu'u, e leai se fa'afitauli e sofa'i mai e faigata ona tatou soloia ma soalaupule fa'atasi sona vaifofo. Pe ua e manatu tatou te 'au'au fa'atasi ma a'u?"

Ua toetoe mae'a lana tusi ua fa'aulutala, "Po'o Nei ea le Aso?" O lo'o ua ia taumafai ai e auai i le tele o feutaga'iga ma fonotaga e fa'atutu aga'i  le itu agai a le vaega fa'aupufai a le Temokalasi.

FA'AAOGA FA'ALE-TATAU TA'AVALE A LE MALO?

O le fa'aaoga fa'aletatau o ta'avale a le Malo, sa avea fo'i o se tasi o mataupu na talanoaina i le fonotaga a le Kapeneta i le vaiaso na te'a. Ua toe fa'amanatu atu ai e le kovana sili i le vasega o fa'atonu o matagaluega ta'itasi, ua latou le va'aia lelei tagata faigaluega uma ma le so'ona fa'aaoga fa'aletatau o ta'avale a latou matagaluega.

"E tatau ona fa'autagia ma usita'ia e tagata faigaluega uma le fa'aaogaina o taavale aua ua mae'a tamau tulafono e tusa o lea tulaga mo le fa'atautaiga o Matagaluega uma o le Malo."

Ua ia fa'ailoa fo'i, "E o'o lava i le matou Ofisa, o i latou ia e nafa ma le va'ai toto'a i le fa'aaogaina o ta'avale a le malo ma o i latou fo'i e avatu ai le fa'atagaga mo le fa'aaogaina o ta'avale i taimi ua manava ai galuega, o i latou fo'i e tu'ua'ia lava i lea mataupu i le taimi nei."

Sa fa'ailoa atu e Kovana Lolo Moliga i le vasega o fa'atonu o matagaluega eseese uma ua aofia, "O lo'o i ai tagata ua fa'afoea ta'avale e aunoa ma se Laisene Aveta'avale. O a'u fo'i latou o lo'o i ai lava lo'u laisene e fa'afoea ai le ta'avale."

Sa ia toe fa'amanatu atu le tulafono i le vasega o Fa'atonusili, "O lo'o i ai outou lea a o i fafo mo fonotaga i le lua vaisao, ua loka e outou ta'avale a le Malo i o outou fale, e le sa'o lena mea, e tatau ona aumai le ta'avale e fa'aaoga i galuega a le Ofisa ae alu oe toe sau ai."

Ua toe fa'amanatu ma fa'amamafa atu se tautalaga a le Kovana i le alii Komesina fa'apea ma le Leoleo o Taavale a le Malo i le auala, "O le galuega lenei o le fa'amamaluina o tulafono tau ta'avale a le Malo ma lona fa'aaogaina, e palasi atu lava ia te oulua, o le lua matafaioi lea.