Fa’ailoa kovana mataupu aoga a le malo, aofia ai Kolisi Tu’ufa’atasi

O nisi o mataupu sa saunoa ai le afioga i le Kovana Sili, Lolo Matalasi Moliga, i lana saunoaga fa’apitoa i le tatalaina o le Nofoaiga Lona 36 a le Fono Faitulafono, i le amataga o le vaiaso lenei, o se vaaiga i le tulaga o aoga a le malo i le atunu’u.

I lana saunoaga sa muamua ave le fa’afetai a le afioga i le kovana sili i le Kolisi Tu’ufa’atasi a Amerika Samoa, ae maise le vasega o faiaoga, ma puleaoga o aoga uma a le malo ona o latou agaga ia manuia ‘ao’aoga a le fanau.

I le Kolisi Tu’ufa’atasi, saunoa le kovana e fa’apea, o lo’o taumafai pea le Kolisi e fa’atino ana fatuoaiga na tofia ai.

“Tasi le fa’afitauli tele, o le le lava o tupe e fa’agaoioiga ai le kolisi,” o se fa’amalamalamaga lea a le kovana. O le nofoaiga a le Fono Faitulafono i le tausaga ua te’a sa pasia ai se pili tupe ma ua ma’ea ona saunia e le kovana, ma ua avea ma tulafono, e fesoasoani ai e fa’aleleia tupe mo le Kolisi.

“Masalo pe toe lua, pe tolu nai tulafono, ona solosolo lelei la’ia o le kolisi,” o upu ia a le kovana sili, ae le i fa’ailoa e ia po’o a nei tulafono o lo’o fuafua ai lana faigamalo e tuuina atu i le Fono Faitulafono.

“O le agaga, e una’i le polokalama faiaoga ina ia fa’aleleia aoga a le tatou atunu’u,” o se vaega lea o le saunoaga a le koana. Ua le gata i lea, e “una’i le polokalama a teine tausi ma’i, ina ia mafai ona aga’i i luma le tautuaina o le tatou atunu’u i le falema’i” i Fagaalu.

“O ia mea uma e fa’alagolago lava i tupe e maua e le tatou malo,” o le tala lea a Lolo i le tauaofiaga a le Fono Faitulafono i le Fale Laumei i Utulei.

O polokalama mo faiaoga ma teine tausi ma’i i le Kolisi Tu’ufa’atasi e maua ai fa’ailoga ma tikeri.

I tulaga o aoga laiti - po’o aoga tulaga muamua - ma aoga maualuga, na saunoa le kovana, “o lo’o taumafai lava le malo i le mea e gata mai ai lona malosi. O le mea lea o lo’o i ai nei, e i ai le talitonuga, a uma le tausaga 2020, e o’o atu i ai ua 106 potu aoga fou ua fausia mo le tatou malo i aoga tulaga muamua ma aoga maualuluga.”

Ua le gata i lea, “o lo’o i ai le fuafuaga, o le fa’aiuga o le tausaga tupe o le a sau nei, e o’o atu i ai ua tofu aoga tetele tulaga muamua ma latou fale taalo.”

Saunoa le toto ia Lolo e fa’apea, o le “mea lea e i ai nei nai fanau e uma a le aoga, nofonofo i totonu o le potu aoga, leai se mea e o e ta’aalo ai, leai se mea e fai ai isi o a latou polokalame. “

Fa’ailoa fo’i e le kovana galuega a le malo e fausia fale taalo mo aoga tetele tulaga muamua - pe o aoga e toatele alo ma fanau o lo’o ‘ao’oga ai. Ua ma’ea le fale taalo a le Aoga Tulaga Muamua a Aua.

Ma o lea ua gaoioi le fale taalo a le Aoga Tulaga Muamua a Tafuna, ae o lea o le a amata le galuega mo le fale taalo a Matafo. O le aoga i Pago Pago, lea ua taoto lona tupe, ae le’i amata le galuega la’ea.

O aoga tulaga muamua a Pavaiai, Lupelele ma Leone Midkiff, ma isi aoga feololo a le malo, “o lea o lo’o taumafai atu nei i ai,” o se vaega lea o le saunoaga  le kovana. “O le talitonuga, e uma le tausaga 2021 ua tulaga mautu fale ta’alo o alo ma fanau.”