2 sui sinia Koluse Mumu San Diego - A'oga mo Volenitia

Ua i o tatou laufanua sui e to'alua o le Koluse Mumu i San Diego, lea e fai ma fa'amalumalu o le tatou Ofisa o le Koluse Mumu Amerika Samoa, Victor Roosen ma Cathy Wolfe.

O le la'ua malaga mai, ona ua manatu le Ofisa Ulu, ina ia faia a'oa'oga faapitoa mo e uma ua Volenitia e fa'atinoa tiute o le Koluse Mumu, e tautuaina ai tagata pagatia ona o fa'alavelave fa'afuase'i e tutupu i le tatou atunu'u.

O lona uiga, ua mana'omia nei outou uma o nisi e fia avea ma Volenitia, po'o e ua ofo mai lo latou malosi ma tomai, e galulue ai e le totogia, mo le Koluse Mumu Amerika Samoa ma San Diego.

I se talanoaga ma Roosen o le Regional Disaster Officer Red Cross i San Diego, ua ia fa'ailoa mai ai, "O lenei vaitau, e fa'aoso mai ai lava malaga asiasi ma tima'i a le Ofisa tele i San Diego i le tatou lala i Amerika Samoa nei. E ao ina faia a'oa'oga tatau mo i latou uma o le a tula'i mai, pe ua saunia fo'i e fa'atino galuega alofa mo le mamalu lautele ua pagatia a le Koluse Mumu."

Sa ia fa'alautele lana fa'amatalaga ma ia fa'apea ai, "A'o le'i fa'ataunu'ua e sui volenitia uma nei tiute mo le Koluse Mumu Amerika Samoa ma San Diego, e ao lava ina mua'i a'oa'oina lelei i latou i nisi o tomai fa'apitoa, ae maise o le galuega a le Koluse Mumu ma ona aiaiga e ao ina fa'atino ai mo tagata pagatia ma sulufa'i mai mo se fesoasoani."

"E ao ina latou mua'i silafia o le galuega e faia ma le agaga alofa, e le talitualimaina so'o se mana'oga fa'apitoa, ae taumafai e tali atu i ni mea ua i ai i le Koluse Mumu, ina ia fa'aitiitia ai le o'otia ua pagatia ai lena aiga po'o le lautele fo'i o pagatia fa'atasi."

Sa fa'ailoa e Roosen ituaiga o a'oa'oga fa'apitoa, e lua ua masi'i mai ma i la'ua e fa'asoa atu i le au Volenitia ina ia fa'asoa atu e i latou i Faia'oga ma Fanau a'oga, pe afai fa'amatu'u mai e le Fa'atonu SIli o A'oga se avanoa lelei mo se fa'alauiloaga i le fanau talavou.

"O lea polokalama ua fa'aigoaina o le ‘Taga Aluga’ o lona uiga, o le fanau talavou e i le va o le 8-12 tausaga le matutua, e ao ina latou silafia, o le taga o lou aluga o e moe ai i le po, e mafai ona e fa'atumuina atoa i mea e te mana'omia pe afai o le a e sulufa'i e se mai lou fale, ma e alu atu e te nofo le tumau i se nofoaga ua saunia e le Malo, mo e uma ua afaina lotoifale i ni fa'alavelave fa'afuase'i."

"O le tapenaga la lea o Sui Volenitia, e mafai ai e i latou ona fa'atino le tapenaga o le 'Taga Aluga' lea i se vave e tatau ai ona fa'asaoina lona ola, ma alu ese atu i se nofoaga maualuga, pe fa'avave atu i se nofoaga saogalemu,” o se fa'apupulaga atili lea a le ali'i o Roosen.

O le lona tolu o tomai e mana'omia, o le CPR Fa'avave, ia mafai ona fa'ate'i i latou e matapogia pe ua tauau ina maliliu ona o afaina fa'afuase'ia i fa'alavelave tutupu.

"O lea ituaiga o tomai e matua sili ona mana'omia. O i latou uma e ta'imua mai i galuega fa'aola ma lavea'i mai nisi i fa'alavelave fa'afuase'i, e ao ina matua fa'aauupegaina i lea tomai. Ia silafia ona fa'atautaia CPR mo i latou e maua atu ua matapogia. O le vasega lenei e ao ai ona tapena sui uma ua mae'a lisia o Volenitia a le Koluse Mumu i nei tomai uma, e tapenapena ai aua o le lua ai lenei o afa e tutupu i le masina o Fepuari i tausaga ua mavae. O le Ofa ma le Gita.”

Ua sapaia ma le fiafia e le tatou Ofisa o le Koluse Mumu i Amerika Samoa lea avanoa lelei ua to'ai taunu'u mai ai i la'ua nei mai le Ofisa Ulu o le Koluse Mumu i San Diego, aua o le a a'otauina fo'i nisi o sui fou e avea ma Volenitia mo i latou i taimi o fa'alavelave fa'afuase'i, ae maise o le a toe fafagu fo'i le atamai ua mae'a a'oa'oina ai nisi o Volenitia tuai. E agava'a oe mo tusi pasi fa'apitoa i nei a'oa'oga aoga.

E ese mai lea, ua fa'atulaga fo'i se malaga i Samoa ina ia feso'ota'i ma le Red Cross Society of Samoa, lea ua ta'ita'ia nei e le tama'ita'i o Tautala Mauala Namulauulu le Failautusi o lea Sofaiete.

"O le malaga atu i Samoa, e tatau ai ona matou malaga fa'atasi ma le susuga le Taitaifono o le Koluse Mumu i Amerika Samoa Vaito'a Hans Langkilde, ina ia fa'amalosia atili le so'otaga lea ma tatou uso i Samoa, aua e vavalalata outou i'inei, e fasia fa'atasi lava oulua ma uso i Samoa i so'o se fa'alavelave fa'afuase'i fa'anatura e tutupu mai. E aoga lava ona feso'ota'i ma fa'afesoasoania'i i tatou uma ona o le galuega a le Koluse Mumu e fa'avae ma fa'atula'ia ona o le agalelei ma le alofa,” o se tala lea a Roosen.

O lea malaga e fa'ato'a faia pe a mae'a ona fa'atulaga a'oa'oga faapitoa mo sui Volenitia uma o le a tula'i mai ma ofo mai le tauau aoga mo galuega e tautua ai e ua pagatia ona o fa'alavelave matuia fa'afuase'i.