Tala I Vaifanua

REV. APISALOMA TOLEAFOA -TA'ITA'I EKALESIA TAFATOLU MO KERISO I DMV

O le lala fou o le Ekalesia Fa'apotopotoga Kerisiano i Amerika Samoa lea ua fa'atuina i setete o Maryland ma Virginia, ua mae'a ona tatala le Nofoaga Autu e fa'atino ai latou sauniga uma ina ua mae'a le latou polokalama o le Kerisimasi 2018.

O le ulua'i taimi fo'i lea ua fa'anofonu'u ai le Faife'au fou, le susuga Rev Apisaloa Toleafoa ma le faletua ia Laura. O lea Ekalesia na mua'i fa'apa'iaina ia Setema 23, 2018 ma ua fa'aigoaina lea galuega "Tafatolu mo Keriso!"

Na auai le afioga le Faipule o Amerika Samoa Aumua i le Konekeresi, Aumua Amata i lea sauniga  ma sa fa'afiafiaina le to'atele aua o lo'o tulata atu fo'i le latou Ekalesia i le Laumua Washington DC.

Ua fa'ailo mai e nisi o totino tumau o lea Ekalesia fou, "Ua matua fa'afiafiaina i matou ina ua matu'u mai le matou faife'au, o le tama lava fo'i o le laugaina o le Upu a le Atua, e aoga fo'i mo tupulaga talavou ae maise o nisi o matua matutua ua leva ona alaala i nei fo'i itu o le Malo tele. Ua fa'afiafiaina i matou uma ona ua mautu mai lana susuga le Faafeagaiga ma le faletua e tu'ufa'atasia atili o matou loto i le galuega ma vi'ia le Atua. Faafetaia galuega mae'ae'a a le fonotele ma le Komiti fa'afoe o Galuega fa'amisionare, o lea ua tu fo'i lenei nila o le galuega a le Atua i nei a'ai tetele."

SUESUEGA A LE DOC - PA'U TEISI TAU O OLOA IA NOVEMA

I le suesuega na fa'atautaa e le Matagaluega o Fefa'ataua'iga (DOC) ua fa'amauina ai le tulaga pa'u i lalo i tau o oloa i le masina o Novema 2018. Ua lesitalaina i lea suesuega le tau o oloa ia Novema e 102.5 togi, ma ua fa'aitiitia mai le 104.1 sa i ai mai le masina o Oketopa 2018.

I lea lava suesuega ua fa'amauina ai le pau i lalo o tau o oloa na fa'amauina mai faleoloa e aofia ai le vaemoa, i'a fa'ato'a fagota mai; talo; a'ano o pua'a; spare ribs; fresh milk; ice cream; canned tuna; falaoa vela; siusiupipi; suka; fuamoa; pisupo; a'ano o povi ma le pata.

I le masina o Novema e na o le lua ituaiga mea taumafa ua fa'amauina ai le si'itaga mai le tau sa fa'atau ai ia Oketopa, ma ua fa'ailoa mai na mea'ai o le Mayonaise ma le Sosisi.

O isi uma mea taumafa ua lisia o mea taumafa fo'i e matua alumia lava ma e masani ona fa'aaogaina e aiga ta'itasi i aso uma i a latou tausamiga. Ua fa'ailoa mai fo'i o le tele lava o iai mea uma e fa'atauina mo le fofoga taumafa o le atunu'u, e le o lisia ai ni suiga o le tau mai masina ta'itasi talu mai Iulai 2018.

E filifili lava le fitu o faleoloa e faia ai lenei suesuega mo le tau o oloa i le atunu'u i masina ta'itasi mo lenei aotelega o le lipoti mo le tau oloa i Amerika Samoa i masina taitasi.

FA'AUAUAU LEOLEOGA A LEOLEO I LE PO & AO

Ua le suia lava le fa'ataunu'uina o tiute fai o le Matagaluega o le Puipuiga o le Saogalemu Lautele, ma ua va'aia lava le fa'atautaia o latou poloka i le alatele ina ia mataituina le tele ma le pisi o feoa'iga a le atunu'u i lenei vaitau fiafia o le tausaga.

Ua fa'ailoa foi e ao lava ina taumafai le vasega o Leoleo i luga o le alatele e mataituina le vasega o e fa'afoe ta'avale mo feoa'iga a'o fa'asua'ava. O i latou na e molia i le tulafono.

Ua le mafai ona tu'uina mai nisi ua molia po'o se aofaiga fo'i o nisi ua taofia ma ua maua o fa'afoe ma le fa'asua'ava ta'avale i le alatele i le taimi nei e le vasega o leoleo tiute. Ua fa'ailoa mai, "Ua manatu le afioga le Komesina ina ia taofia uma lava nei fa'amaumauga se'ia avatu uma lava i le fa'aiuga o le matou nei tiute fai i le fa'aiuga o le tausaga ma le amataga fo'i o le tausaga fou." O se tala mai lea i ali'i ta'ita'i uati.

O lumafale o le Laufou Shopping Center ma le CBT i Nuuuli lea ua fai ma nofoaga tumau o le matagaluega e faatautaia ai latou Poloka aua e faigofie ia i latou i ala o feoaiga, e maua uma lava i latou e aga'i i Leone po'o Tafuna ae fa'apena fo'i le aga'i i Fagatogo i le itu i sasa'e o le Motu.

Ua amata fo'i ona nofouta le to'atele o e femalaga'i i alatele i le taimi o poloka, ma ua faia fo'i fa'atauga a'o le'i o'o i itula e amatalia ai nei poloka ina ia le matua umi o tau fa'asolo ta'avale i le alatele ona o lena galuega fai.

Ua matauina o le taimi lava e amatalia ai poloka nei a leoleo e u'umi ai fo'i laina ta'avale i luga o le alatele, ae maise i vaitaimi o toe fa'atauga a aiga a'o le ta tonu le taimi e manava ai tagata faigaluega fa'atasi ma le taimi ua toetoe lava ta le taimi o vaeluaga mo le Kerisimasi ma le tausaga fou.

O lenei poloka e fa'ato'a uma lava ia Ianuari 2, 2019, talu mai ona amatalia i le aso 23 Tesema, 2018.

PAU TEISI TAU O LE SUAU'U MA OLOA TAU SUAU'U IA TESEMA 2018:

Ua mae'a fa'amaonia fo'i sina pa'u teisi o le tau o le Suau'u ma Oloa tau suau'u e aofia ai le Kesi o ta'avale mai le aso 15 o Tesema e o’o atu i le aso 31 o Tesema.

Ua fa'ailoa mai o lo ua fa'ataugofie mai le totogi o le suau'u e le'i fa'amamaina ma ua fa'apea fo'i ona fa'aitiitia ai le tau o le kesi o ta'avale ma isi oloa uma tau suau'u ua fa'atau atu mai pamu kesi i le atunu'u.

O le tau o le kesi ua fa'aitiitia i le 11 sene i le kalone i le tau si'iatoa, ua i ai nei i pamu kesi i le $3.02 i le kalone. O le tau o le Diesel po'o le Kiso ua fa'aitiitia i le 6sene ma ua fa'atau atu i le $3.36 i le kalone mo ta'avale afi ae o le totogi mo afi kiso tetele e fa'amu mai ai le eletise ua fa'atau atu i le $3.05 i le kalone e tasi.

O le kiso mo va'a folau ma fagota ua fa'atau atu lea i le tau e $2.94 i le kalone.

O le ituaiga Kiso e la'ititi le sulphur o i ai ua faaititia lea i le 8sene lona tau i le kalone lea ua fa'atau atu i le $3.09 i le Kalone. O le Kalasini ma le Penisini o va'alele Jets ua fa'aititia i le 7sene lona tau i le kalone ua fa'atau atu ai nei. O lea la ua i ai nei i le Penisini o va'alele ua fa'atau atu i le $3.08 i le kalone a'o le Kalasini e $3.10 i le kalone.

Ua faailoa mai e le Puleaga o le Suau'u (OPM) ona ua iloga ona pa'u mai le tau o le suau'u ma oloa tau suau'u uma ia Novema, o lea ua maua ai sina koma fo'i i si'itaga i tau o le suau'u i le suau'u ma oloa tau suau'u i le teritori mo vaitau fiafia o lenei tausaga.

O le tau fa'atulaga mo le suau'u ma oloa tau suau'u i le atunu'u e fa'atautaia lea e le OPM ma o le tau lea e fa'atau atu ai e le Kamupani a le Pacific Energy ma le Sunrise Oil i pamu kesi uma i le teritori.

Peita'i o lo'o ua matauina e i ai fo'i le si'itaga teisi e fa'aopoopo e le Kamupani Pamu Kesi latou mai le tau ua fa'atau atu ai e le Kamupani Suau'u ia i latou le suau'u ma oloa tau suau'u uma lava.