Afaina nisi ofisa malo Amerika Samoa, tapunia vaega malo fetarale

Ona o le tapunia o nisi o vaega o le malo fetarale talu mai le fa’aiuga o le vaiaso ua te’a i le vaitau tonu o le Kerisimasi, o lea ua fa’atonuina ai e le afioga i le Kovana Sili, Lolo Matalasi Moliga matagaluega ma ofisa uma o le malo o Amerika Samoa ina ia maua le aofaiga o tagata faigaluega a le malo o lo’o aafia, i lea tulaga ma ua ia fa’atulagaina foi i latou o le a fa’amalolo lea tumau.

O i latou nei, pe o tagata faigaluega a le malo o Amerika Samoa, e a’afia o lo’o fa’atupe ina o latou totogi ma tautua mai alagatupe a le fetarale i lalo o “grants”.

E o’o mai i le aso ananafi, Tesema 26, e leai ni fa’amatalaga fou mai le laumua i Uosinintone e uiga i le tapunia o nisi o le vaega o le malo fetarale, ua na o le tele o ofisa o le malo fetarale ua tapunia i le taimi nei ona e le’i pasia e le Konekeresi a Amerika vaega tupe e fa’auau ai le fa’atupeina o le tausaga tupe 2019 a le malo tele.

I se tusitusiga a Kovana Lolo, i le aso 24 o Tesema i vaega uma o lana faigamalo, o lo’o ia fa’amanino ai le tapunia o nisi o vaega o le malo tele ona ua le mafai ona pasia tupe mo le tausaga tupe 2019 e le Konekeresi, ona o lo’o i ai fe’eseeseaiga i le laumua i Uosinitone.

O lo’o taua e le afioga i le kovana i lana tusi, matagaluega fetarale - e pei o le Matagaluega o le Initeria fa’apea le Matagaulega o Fa’atoaga (USDA) -  o lo’o afaina i lenei tulaga ae maise ofisa. O le tele o nei vaega o le malo tele, o lo’o fa’ailoa e le kovana, o lo’o maua mai ai alagatupe “grants” mo Amerika Samoa, e fa’afoe ai lana faigamalo.

I lana tusi, sa toe fa’amanatu e le kovana i lana kapineta le tele o vaega tupe fetarale o lo’o fa’atupe ina ai le faigamalo a Amerika Samoa. Ma o le mea lea e tatau ai ona fuafua lelei tupe mo le malo i le agai i luma i lenei vaitau ona e le o mautinoa lelei i le taimi nei tupe “grants” mo Amerika Samoa.

Ua le gata i lea, sa fa’ailoa foi e le kovana e le o mautinoa lelei i le taimi nei le tulaga tonu o le afaina o faigamalo a Amerika Samoa, i lenei mataupu i le vaega fetarale ona o nisi o alatatupe fetarale e eseese lona mauaina ona o aiaiga e tatau ona faia. O nisi o “grants” mo le tausaga tupe 2019, atonu ua ma’ea ona toina mai, ae le o mautinoa tonu le aofaiga.

O lea ua fa’atonuina ai e le kovana, le Teu Tupe, fa’atonusili o le Ofisa o le Tupe Fa’asoasoa, ina ia galulue fa’atasi ma le fa’atonusili o le Matagaluega o Tagata Faigaluega ae maise fa’atonusili o ofisa ma matagaluega a le malo ina ia mafai ona iloa tonu tupe “grants” mai vaega afaina o le feterale mo le tulaga sa’o o le tupe e maua ma tagata faigaluega a le malo o Amerika Samoa e afaina.

Mai lea suesuega e iloa tonu ai matagaluega ma ofisa o le malo o Amerika Samoa, ae maise le aofa’i o tagata faigaluega e afaina, ona galulue lea ina ia faia fa’aiuga i le tulaga o tautua mo le lautele ina ia aua ne’i afaina ae o le a iloa ai foi le aofaiga o tagata faigaluega e afaina.

Ma o lea sa fa’atonuina ai foi e le kovana e fa’apea o tagata faigaluega uma o le malo o Amerika Samoa o lo’o fa’atupe ina o latou totogi i “grants” ae o la latou tautua e mana’omia tele o le a fa’aauau pea ona galulue, e aofia ai i latou e tali atu i fa’alavelave tutupu fa’afuase’i; foma’i, tausima’i ma isi i totonu o le falema’i o le LBJ ma le Matagaluega o le Soifua Maloloina; faiaoga i totonu o potu aoga i le Matagaluega o Aoga ma le Kolisi Tu’ufa’atasi a Amerika Samoa; nisi fa’apitoa i le Matagaluega o Puipuiga Fa’alotoifale; ma i latou i le Ofisa o le Siosiomaga e gafa ma le vaaia lelei o le saogalemu o le ‘ea, gataifale ma le suavai taumafa.

O tagata faigaluega uma o lo’o totogi i tupe “grants” e le o aofia i le lisi lea o le a fa’amalolo mai i a latou galuega i le malo i le taimi nei se’i vagana ai tagata faigaluega fa’akonekerarte e le o fa’atagaina atu i lea tusitusiga.

Ua fa’atonuina foi e Lolo taitai o ofisa ta’itasi ina ia faia suiga i tuite tauave i totonu o ofisa ina ia ‘aua ne’i afaina pe motusia tautua i le lautele.

Sa fa’ailoa foi e le kovana e fa’apea i tausaga ua mavae sa tapunia atoa ai le fetarale, pe na o vaega o le fetarale, e i ai lava fa’aiuga a le Konekeresi e faia e pasia ai le totogina o tagata faigaluega sa afaina.

Ua fautuina foi e le kovana vaega o faigamalo a Amerika Samoa o lo’o afaina i le taimi nei ina ia talatalanoa ma sui o le fetarale ina ia mafai ona iloa tonu “grants” mo le tausaga tupe 2019 e mafai ona fa’auau. Ma o le tali o nei talanoaga ia tuuina atu i le Teutupe, ae maise le Ofisa o Tupe Fa’asoasoa ma le Matagaluega o Tagata Faigaluega a le malo.

Saunoa le kovana, o se taimi faigata lenei i le faia o se fa’aiuga fa’apea i le vaitau o aoga faifia, ae peitai e tatau i le faigamalo ona tali atu i lenei mataupu.

Ua fa’atonuina e le kovana taitai o lana faigamalo ina ia logoina lona ofisa i le taimi lava e iloa ai fa’amaumauga i le aofaiga o tagata faigaluega a le malo ua afaina ae maise ai le tulaga o le tupe “grants”. Aua o lo’o manaomia nei fa’amaumauga e iloa ai le tulaga afaina o le malo ma lona tamaoaiga.