"Kapeteni E Oe Lou Va'a" - Fa'aitiitia lou Mamafa!

Ua le na'o le taulaga ma le itu i sisifo o le motu o tutupu ai mea lelei ma suiga tetele, ua oso fo'i i le falelima i sasa'e o le Motu o Fiafiaga. O le mau na a'e, ma ua tumati'e fo'i lona taunu'uga i le mae'a ai ona fa'atautaia le polokalama fa'alusi pauna o i latou e to'a 35 na talia le vala'au, oso i luga o le fua, ma va'ai i le pagatia o soifua ai, tele na'ua le mamafa o tino!

O le Autalavou a Amouli na fa'ama'ite mea, o i latou fo'i na mataituina lenei polokalama ina ia amatalia ma fa'amae'a lelei, ia faia ma le loto, sa ona toe fo'i!

"Ona o le va'ai ma le fa'anoanoa i le to'atele o le autalavou, ua faigata ona fa'amuta mai le so'ona mamafa, aua ua mae'a a'oa'oina tagata uma, o le so'ona mamafa o le tino, e ala ai ona po'ia le tagata soifua i le tele o ma'i tumau, e le o faigofie pe mafai fo'i ona togafitia. E maua ai loa, e le toe mafai ona toe te'a mai ai, ua na'o na mafai na fa'aumiumi ona soifua ma le ma'i, ma faia lava togafitiga, e le toe ola sa'oloto mai ai,” o se tala lea a le tama'ita'i o Sophia Fa'alevao, se tasi o ta'ita'i o le Autalavou EFKAS mai Amouli.

O afioaga na o'o i ai le latou taumafaiga e afua mai Fagaitua se'ia pa'ia Tula, ua le mafai ona aotelega uma ai isi afio'aga ona o le vave o le taimi e tatau ai ona fa'autagia tagata uma pe afai o le a fa'atele atu le fa'amoemoe mo isi afio'aga o misia mai le falelima i sasa'e.

Ua fa'atulaga fo'i le 12 vaiaso e fa'atautaia ai, ae valuaina i le ta'i ono ma siakia le taumafaiga i ona sui ua mae'a lesitala, ma toe fa'amalosia i latou ina ia fa'aosofia pea le lagona fiafia e fa'aauau le fa'amoemoe, ia fa'amama atili o latou tino.

Na fono ta'ita'i ma ua fa'aigoaina lea taumafaiga: "Autalavou Amouli: O Oe le Kapeteni o Lou Va'a - Fa'amalosi!"

Na amatalia lea fa'amoemoe ia Setema 23, 2018 ae o le toe aso e toe siakia ai Pauna o lou mamafa tamau ua mae'a ai le 12 vaiaso ia Tesema 23.

O le lu'iga muamua ia i latou sa tauva, e ao ina lusi le 7% o lou mamafa i le 6 vaiaso muamua. O vaiaso ta'itasi e i ai nai meaalofa e taua'aoina mo i latou o taumafai ma filiga ia lusi.

O le Fa'ailoga na fa'atulaga mo so'o se tasi po'o nisi fo'i o le a maua le tulaga muamua i le tele o pauna lusi i le fa'aiuga o le 12 vaiaso o lenei fa'amoemoe na fa'atulaga ai le $1,000.

O le ua mauaina lea fa'ailoga o le tama'ita'i o Dora Lagima mai Fagaitua. O le tele o ona pauna ma lusi e 49.6 pauna i le 12 vaiaso na auai ai i le Amouli Fitness Fa'amalosi e Lusi Pauna, ma ua fa'amauina fo'i o ia o le ulua'i tama'ita'i ua ia ausia lea fa'ailoga taua, aua e le toe tu'ua lenei fa'amoemoe, e ao ina soso'o lava.

E tolu vaega o le polokalama lenei: Ia lusi ou pauna Ia foliga lelei mai ai lou fika; ia tausami i mea'ai paleni mo lou tino; ia va'aia lou mata'alia ma le malosi e gaoioi e fa'amalositino ai.

Ua i ai le Uepesite ua mae'a fa'atulaga mo le Amouli Youth Fitness Facebook; e fa'asalalau atili ai i latou na auai, lea e aotelega i le 35 o i latou ma a latou fo'i fa'amatalaga e tusa o lenei taumafaiga ua mae'a.

O a uma lava mea na fa'atino ina ia fa'amalosi'au ai ia i latou na taumafai e lusi pauna, ua lisia uma i lea Itulau Facebook, ma o le a maimoaina ai le faigata fo'i na feagai ma i latou na savalia nei lu'iga fa'aletagata soifua.

O le isi fa'amoemoe e soso'o mai, o lo ua manatu e faalautele atili le polokalama ia aotelega ai ma so'o se tasi lava o le afioaga, ma iai afio'aga fo'i o le falelima i sasa'e pe afai e fia malaga mai e fa'alusi fa'atasi pauna ma i matou.

"O le tausia o lou tino malosi lelei o le mataala fo'i lea o le mafaufau ma le maua vave ai i gasegase. Tausami fo'i i taumafa paleni, ia tumau ai i lou fa'avasegaina o au tausamiga, ia le matua so'ona taumafa, ma faigata ai ona taofiofi le mamafa o le tino,” o le toe tima'i lea a Fa'alevao i lana autalavou ma i latou fo'i o lo'o auai ma fiafia i lea polokalama.

O le Komiti fa'afoe o lenei polokalama ua ta'ita'ia lea e le susuga Mike Tipoti, ma ona totino lagolago: Sophia Fa'alevao, RhondaTuia, Amarantos Fa'alevao, Brenda Foleni ma Tulipe Tuia, ae ua fa'atama ma ta'ita'ia le polokalama atoa e le susuga le Fa'afeagaiga Rev. Elder Leatulagi Fa'alevao, o le EFKAS i lea afioaga.

O le a fa'alauiloa atu le amataga fo'i o le isi lu'iga fou mo le amataga o le tausga fou i se taimi e le o toe mamao ma afai e te fia avea ma se sui totino o lea faamoemoe, e mafai ona e talosaga ane i le tatou Facebook Page "You Are The Captain of Your Own Ship."

"Faia loa sau filifiliga lelei, ina ia mafai ona suia le va'aiga ia te oe, ona ua e fa'atautaia lou lava Sa i lenei tausaga o le a savalia, 2019,” o se tala ata lea a Sophia Fa'alevao.