I LE AGAGA MONI O LE KERISIMASI - FAI MEAALOFA FANAU A GALEA'I TUUFULI

Ua manatu le fanau a le afioga Lenamuaiao Galea'i Moaali'itele LK Tu'ufuli e fa'aauau se mea lelei sa faia mai e le latou Tama a'o latou mafuta, na latou toe alo ane ai fa'atino le La'au Kerisimasi o Meaalofa 2018 mai le latou maota i Fagatogo. Ua atoa ai le fitu o tausaga talu ona fa'atautaia lea galuega e matuaina mai le "agaga moni o le Kerisimasi."

"O nei vaitau, ua ou masani ai i mea e fa'atonu ai a'u e le Tama, ina ia ou tapena se la'au Kerisimasi e vala'aulia uma nai aiga, ua ou iloa e to'atele tamaiti laiti, o lo'o fa'ananau i le tele o ni mea ta'alo e faafiafiaina ai, ae o lo'o tau le lava le fa'asoa a nai matua. O nisi fo'i o aiga e fa'amoemoe i le Kamupani I'a lea e masani ona tapunia umi i nei vaitau fiafia, ma atili ai ona fa'afaigata le fa'asoaga o mea'ai e tausia ai le aiga mo se taimi umi. Atoa ai ma ni aiga e fa'ato'a taumafai e atina'e, ona e talavou le mafutaga ma e tau fa'asoa fo'i le totogia o nofoaga e nonofo ma totogia pili ae fa'alea'ua'u ai le fa'asoa mo se Kerisimasi fiafia a le fanau."

"O ituaiga aiga na e fai ai la'u galuega sailiili i totonu lava o Fagatogo, mai ona itu uma, ina ia o mai e fa'asoa atu i ai nei meaalofa ua tapena e le toea'ina, e fa'afiafiaina ai i latou i le vaitau o aso fiafia ma e agaga i le alofa foa'i atu,” o se tala lea a le tama'ita'i o Malama Sauafea, e tusa o le latou "La'au Kerisimasi Foa'i e Fausia i Meaalofa 2018."

Ua ese fo'i le taga'i atu i le faiga o lea la'au, ua matua fa'aputu aga'i i luga o meaalofa uma, ma ua o'o lava i le tumutumu o le La'au, o meaalofa uma lava e fa'avasega ai foa'i mo aiga e to'a 12 ua latou filifilia i lenei tausaga.

"Ua suia teisi la le faiga i lenei tausaga. Ua matou le va'ai tele i le matou vaifale i le itu o le Oli o Fagatogo, ae ua fa'asalafa atu le vaai i ie itu o lo'o i ai le Ekalesia Metotisi, ma le AOG i luga o le Annex ma nisi fo'i o aiga i le matou vaipanoa o lo'o to'atele lava le fanau. Ua talatalanoa fo'i i nai Fa'afeagaiga o le afio'aga, ua latou silafia lelei nai aiga e i ai le mana'omia, e fia fa'ao'o i ai le vala'aulia fa'apitoa a le toeaina lea ua manatu le fanau, ma ua autasi fo'i matou lagona, o le a fai lava i tausaga uma matou te ola ai,” o le toe fa'ailoa mai lea a Malama.

O meaalofa na aofia ai Pusa Apa Wahoo; Pusa vai atoa; Pusa Princles; Taga Suka 4 kilo; Taga Araisa; Pusa Saimin Packages; Apa masi; Taga Cereal tele ma le meaalofa o pusa keke. O se fa'asoa e silia ma le $100 le tau o nei oloa.

Ae na muamua lava fa'ao'o meaalofa mo Fa'afeagaiga Taulagi i le afio'aga, soso'o ai ma Ta'ita'i o le Malo i le Kovana ma le tina o le Atunuu ae maise o le Lutena Kovana fo'i ma le faletua. O tina ma tama matutua uma i le afio'aga ae maise nai aiga tuaoi ia te'i latou i Fagatogo.

"O le mea sa matuaina e le Tama, ua agaga uma i matou le fanau e fa'aauau, o se fa'aauauga fo'i lea o se mea lelei ua matou maua mai matua ua tu'ua i matou. Afai e tou te alolofa mai ia te a'u, ia outou loto foa'i i vaitau nei o le tausaga, aua o le agaga lava o le alofa atu ma foa'i atu i mea ua e maua. O ana ia fa'amatalaga ua nofo mau pea ia i matou, ma ua matou fa'ailoa atu ai, e malaga pea Tama e malolo, ae nofo pea ana aoa'oga lelei mo i matou e ola ma fa'atino,” o se tala lea a Malama.

Na pu'eina ata fa'asolo o nei gaoioiga uma mai le latou fale ma ua maimoa mai le fanau uma i fafo ma fetagisi mai.

"Ua latou lagona le misialofa i nai o matou matua, ae le uma lava le mafanafana o latou lagona, ua matou faia se mea sili mai ni mea lelei sa a'oa'oina i matou e le tama ma le tina ua momoe mai i ti'asa,” se toe tala lea a Malama Sauafea, ma o le tama fo'i o le aiga Sauafea Sonny, ua amata ona ia tula'i mai e avea ma se poutu o le fa'amoemoe lea i tausaga ta'itasi.

Sa ia fa'ailoa i le mamalu na aofia, "Ona o le agaga moni o le Kerisimasi ua manatu ai i matou uma le fanau a Galea'i LK Tu'ufuli ma Molia, ina ia matou galulue e fa'aauau, e le o se mea tele, ae o se agaga foa'i atu ma alolofa atu i o tatou uso a tuaoi, ma fa'asoa atu fo'i se mea ua matou maua e fa'afiafiaina fa'atasi ai i tatou i lenei vaitau fiafia o le tausaga, ma ia avea o se vi'iga o le Atua lava, ae le o se tagata."