$15 miliona mai le USEPA mo le ASPA & ASEPA

Ua maea fa’ailoa mai e le USEPA a le Malo tele le aotelega o le tinoitupe e $15miliona e fa'amautu, una'ia malosi ma fa'agaoioia ai poloketi e aoga tele mo le tausiga o le soifua maloloina lelei o tagata lautele o Amerika Samoa, ma galuega fa'aleleia o le tatou siomaga.

O lea alagatupe: ASEPA e $2.3miliona ae o le ASPA e $12.7miliona ina ia fa'aleleia ai galuega tau tafega o vai i le motu, lea ua loa ona taumafai ai le ASPA e fa'aleleia.

"Ona o le teritori o Amerika Samoa o se tasi o matagaluega e galulue fa'atasi ma le matou Ofisa Tutotonu ina ia mataituina le fa'aleleia o le Siomaga, o lea ua matou fiafia tele e sapaia poloketi fa'apenei e fa'amautinoa ai le fa'aleleia a'ia'i o o le Siomaga mo e uma o lo'o soifua i le tatou teritori,” o se fa'amatalaga lea a Mike Stoker, le ali'i pule o le EPA Pacific Southwest Region.

E fa'aaogaina e le ASEPA fa'atupega mai le USEPA e fa'atupe ai galuega tau le fa'amamaina o le Ea, Suavai ma le Laufanua o le teritori, ma ua fa'apea fo'i ona fa'atupe ai ma galuega tau suesuega o nei mea uma, fa'atasi ai ma asiasiga ma suesuega e mataituina le saogalemu o ta'elega i matafaga o le atunu'u, ae maise o le mama fo'i o le suavai taumafa ua fa'auia atu i paipa mo le mamalu atoa o le atunuu.

Ua aofia ai ma le va'aiga o sai pua'a ma ala ua fa'auia ai latou suavai lafoa'i, puipuia amu ma a'au mai le tele o ala e fa'atamaia ai ona o suiga o le tau, si'isi'i o le maualuga o le suavai, ae maise o le tele o taetafe e to'a atu i ai mai le laueleele, fa'atasi ai ma le fa'atupega fo'i o galuega lavea'i uma.

Fa'ailoa mai e le susuga i le Fa’atonu o le ASEPA Fa'amao Asalele Jr. "O a tatou polokalama uma lava mo le fa'asaogalemuina o le tatou Siomaga e fa'atupe uma mai lava e fesoasoani mai le USEPA. O lenei fo'i la vaega tupe, o le a fa'aaoga lava e pei ona fa'ailoa mai, e fa'aleleia atili ai le tulaga mama o le suavai taumafa ma galuega fo'i o le suavai lafoa'i i le tatou teritori. Ua avatu fo'i le fa'afetai i le USEPA mo lenei fa'atupega ua tatou maua."

O lenei vaega tupe ua taua'aoina nei, e fa'atupe ai galuega ina ia le toe i ai ni fa'aaliga e fa'apuna le suavai a'o le'i inumia mai le 30% o le atunu'u atoa i lenei tausaga o le a savalia. Ma ia fa'aaoga tatau fo'i se vaega o lenei tupe ua toina mai ina ia sailia ai nisi vaieli e mafai ona pamu mai ai i luga le suavai mama mo le fa'auia atu i maota ma laoa o tagata lautele ia ausia e tusa ma le 30% o le atunuu atoa. E tatau fo'i ona fesoasoani e fa'atutu ai nisi Tane Vai fou ma galuega ia fa'aso'o le Laina o le Suavai Lafoa'i po'o le Sua.

Na saunoa fo'i le ali'i pule i le vaega o Inisinia a le ASPA, William Spitzenberg, "A'o tau soloia fa'afitauli o le tele o malo o le lalolagi i galuega e taumafai ai ona fa'aso'o  latou atunu'u i le sapalai o le suavai taumafa mama, ae o lo'o fesoasoani mai lava le USEPA mo le tatou Malo i ala e galueaina ma fa'atumau ai le tulaga lelei pea o le suavai taumafa mama i le tatou nei teritori. O le tatou malo o se tasi lea o atunu'u e fa'amoemoe tele i le fesoasoani malosi mai a le USEPA i tatou galuega fa'atino mo le tausiga o le siomaga mama ina ia malutia le soifua maloloina o tatou tagata."