Tolopo nisi o suiga fuafua a le StarKist mo le nofoaga i Amerika Samoa

Ua toe tuu atu i tua i se isi taimi o i luma fuafuaga a le kaumpani a le StarKist Inc., e auina mai i Amerika Samoa nisi o ana galuega o lo’o fa’afoeina i le setete o Kalefonia.

Ua mafua lea suiga ona o nisi o tulaga e le o mautu e aofia ai auala e mafai ai e le StarKist ona tali atu i nisi o lu’itau i le tulaga o tulafono fetarale i totonu o Amerika Samoa, lea o lo’o i ai a latou galuega tu’uapa i’a i le StarKist Samoa.

O se lipoti tusitusia a le afioga i le Lutena Kovana, Lemanu Palepoi Sialega Mauga sa tuuina atu i le afioga i le Kovana Sili, Lolo Matalasi Moliga, i le aso 19 Novema 2018, o lo’o fa’ailoa ai fuafuaga a le StarKist mo le auina mai i Amerika Samoa o nisi o ana galuega o lo’o faia i totonu Kalefonia.

O lea fuafuaga e mafai ona fa’ataunu’uina pe afai e talia e le Ofisa o le Siosiomaga a le fetarale (USEPA) le talosaga a le StarKist mo se pemita o ana galuega lea e faafoeina i le StarKist Samoa i Atu’u.

O lo’o fa’ailoa mai i le lipoti a Lemanu e faapea, afai ae fa’ataunuuina le auina mai o galuega i Kalefonia e fa’afoeina i Amerika Samoa, o le a mafai ona maua galuega fou i le va o le 200 ma le 300. Ua le gata i lea, o ono fa’aopoopo nisi avanoa fou i le StarKist Samoa i ana galuega o lo’o faia i le taimi nei.

O le lipoti a Lemanu i le afioga i le kovana ina ua ma’ea fonotaga sa faia i Uosinitone D.C. i le aso 30 o Oketopa ma ta’ita’i o le Matagaluega o le Initeria a le malo tele. Sa talosaga e Amerika Samoa se fesoasoani a le Initeria ina ia mafai ona maua le pemita a le StarKist mo ana galuega fuafua i Amerika Samoa.

O lenei lipoti, e pei ona fa’asalalauina i tala lipotia e le Samoa News sa fa’ailoa ai le agaga fiafia o nisi i le atunu’u ae maise kamupani tua ona o le a mafai ona maua galuega fa’aopoopo i le teritori. Ua le gata i lea, ae o le a alualu ai i luga le tamaoaiga o le atunu’u, i tupe fou e faia ai fa’atau a tagata lautele.

Ae peitai o le aso Lua o le vaiaso lenei sa fa’ailoa ai e le StarKist Inc., le tuuina atu i tua o fuafuaga e auina mai i Amerika Samoa nisi o ana galuega tu’uapa o lo’o faia i lona nofoaga i  Kalefonia.

I se pepa o fa’amatalaga mai le ofisa autu o le kamupani i Pittsburgh, le setete o Pennsylvania, o lo’o fa’ailoa ai e le StarKist Inc., e fa’apea o lo’o fa’aauau pea ona iloiloina tulaga eseese e mafai ai ona fa’amalieina tulafono fetarale o lo’o i iai nei i le fa’afoeina lea o pisinisi i Amerika Samoa.

Ua le gata i lea, e le o mailoa fo’i i le taimi nei pe mafai ona pasia e le Konekeresi a Amerika le fa’aauauina pea o se tasi o lafoga fetarale - 30(A) - aua e le o toe umi, ona le toe mafai lea ona fa’aaogaina se’i vagana ua pasia se pili fou e mafai ai ona fa’auau lea lafoga o lo’o fesoasoani i le StarKist.

Ona o ia mataupu e lua, o le mea lea ua faia ai se fa’aiuga a le StarKist e tolopo i tua fuafuaga e auina mai i Amerika Samoa nisi o galuega fa’afoe o lo’o faia i le latou nofoaga i le aai o Mira Loma i Kalefonia. E le’i fa’ailoa mai e le StarKist nisi o fa’amatalaga e uiga i nei fuafuaga.

O le pili o lo’o aofia ai le lafoga fetarale 30(A) o lo’o taoto nei i luma o le Konekeresi mo sa latou fa’aiuga.  Ma e talitonu le Samoa News o le fa’aaliga a le StarKist ua ma’ea ona tuuina atu foi i le Ofisa o le Kovana ma le Ofisa o le Aumua Amata, faipule o Amerika Samoa i le Konekeresi.

Sa fesiligia e le Samoa News i le aso Lua o le vaiaso lenei, le afioga i le faipule i le Konekeresi i le tulaga ua o’o i ai le pili i luma o le Konekeresi, ma sa fa’ailoa mai e le tofa ia Aumua e fa’apea o le taimi nei o lo’o tagai totoa le Konekeresi i mataupu tuga, ina ia aua ai ne’i tapunia nisi o vaega a le fetarale.

E talitonu le afioga i le faipule o le vaega o le pili e fa’atatau i lafoga - e aofia ai le 30(A) - o le a toe taulimaina e le Konekeresi pe a ‘ae mai i le tausaga fou. Ma o le a ia feso’otai ma sui o le Konekeresi i lenei mataupu taua i le 2019.