Tu’uaia se ali’i i lona fa’aoolima i lona to’alua i se naifi

O le vaiaso na te’a nei na tula’i ai i luma o le fa’amasinoga fa’aitumalo se ali’i e 39 tausaga mai Pava’ia’i, ina ua pu’e fa’apagota o ia e Leoleo ma tu’uaia e le malo i le moliaga o lona fa’aaoga lea o se tama’i naifi e fa’aoo ai manu’a i lona to’alua.

Na teena e le ali’i ua molia moliaga mama e 2 o le faaoolima i le tulaga tolu atoa ai a le fa’atupu vevesi i totonu o lona aiga fa’asaga ia te ia, ina ua tula’i i luma o le afioga i le ali’i Fa’amasino ia Fiti Sunia. O le ali’i loia fautua lagolago ia Ryan Anderson na tula’i mo lea ali’i, ae o le ali’i loia sili lagolago ia Jason Mitchell na tula’i mo le malo.

Na fa’ailoa e le loia a le malo i le fa’amasinoga e fa’apea, o loo fuafua le malo latou te failaina moliaga fa’aopoopo fa’asaga i le ali’i ua molia, ae fuafua le failaina o ia moliaga faaopoopo i le vave lea ona mae’a o suesuega a Leoleo o loo fa’agasolo e tusa ai o le fa’alavelave sa tula’i mai.

Na fesili le afioga a Sunia i le mafua’aga o le a tuai ai suesuega a Leoleo, ae na tali Michell, e i ai molimau e mana’omia le fesiligia, o i latou ia sa i ai i le taimi na tula’i mai ai le fa’alavelave.

E $2,000 lea ua fa’atulaga e tatala ai i tua le ua molia, ae afai e faila e le malo ni moliaga mamafa fa’asaga i le ua molia, na fa’ailoa e Sunia le ono mafai lea ona toe fa’aopoopo i luga le aofa’i o le tupe e tatala ai o ia i tua.

Afai ae mafai ona tatala i tua le ua molia, ua fautuaina o ia e le fa’amasinoga ina ia aua ne’i ona toe solia se tulafono a le malo, a ia auai i taimi uma e valaau ai lana mataupu. E le mafai ona ia tuua le teritori i soo se taimi e aunoa ma se fa’atonuga a le fa’amasinoga, e tatau fo’i ona tu’u atu lona tusi folau e taofi e le malo. E le mafai ona ia taumafai e fa’afesoota’i lona to’alua i soo se auala, e tatau fo’i ona saili se isi nofoaga e nofo ai a o fa’agasolo ai taualumaga o lana mataupu.

E pei ona taua i le tagi a le malo e fa’apea, o le afiafi o le aso Faraile o le vaiaso na te’a nei, Tesema 7, 2018 na logoina ai e le falema’i o le LBJ le Ofisa o Leoleo i Tafuna, fa’asaga i se Tina talavou o loo taofia ai ona o ni manu’a tuga i lona tino, e foliga mai na a’afia i se a’upega maai.

Na aga’i atu Leoleo i le falema’i i Fagaalu ma maua ai le avanoa e talanoa ai ma le Tina na a’afia e uiga i lenei mataupu. Ina ua fa’atoa fesiligia e Leoleo le Tina na a’afia, sa musu o ia e faila sana tagi fa’asaga i lona to’alua, ae i le mae’a ai ona fa’atalatalanoaina pea e Leoleo ma le Tina o lenei mataupu, na toe suia ai loa le mafaufau o le Tina ae mana’o loa e fai lana fa’amatalaga i Leoleo e tusa ai o le fa’alavelave sa tula’i mai.

Na taua e le Tina i Leoleo e fa’apea, ua fa’atele ona loka lona to’alua i le falepuipui i Tafuna ae toe tatala atu lava i tua ma fa’aauau pea lona faia o lenei amio o le fasi o ia pe a oo ina ‘ona. Ona o le fasi soo o ia e lona to’alua, na taua ai e le Tina lona fefe ina ne’i i ai se isi mea e sili atu ona matuia e tula’i mai i se taimi o i luma ia te ia.

“Ua ou le lava nofo pologa i lalo o pulega saua a lenei tamaloa, ma ua ou fia maua fo’i se mapusaga, peita’i ou te fefe e alu ese ina ne’i sau o ia ma fai se mea e sili atu ona matuia ia te a’u,” o le fa’amatalaga lea a le Tina i Leoleo.

O le vevesi e pei ona taua e le Tina i Leoleo na tula’i mai i le aso Sa o le isi vaiaso, ina ua ‘ona atu lona to’alua i le fale ma fasi o ia, ona o loo i ai ona masalosaloga o loo faia se mafutaga fa’alilolilo a lona to’alua ma le isi ali’i o le nu’u.

O le aso Gafua na sola ese ai le fafine ma alu ua nofo i le fale o lana uo i Futiga. I le tuana’i ai o aso e 5 talu ona nofo le Tina i le fale o lana uo i Futiga, ae alu atu ai loa ma le ua molia ma valaau atu ia te ia, pe mafai ona sau i fafo la te talanoa ai. Na taua e le Tina i Leoleo e faapea, sa fai atu lona to’alua ia te ia, e le umi se la talanoaga ona toe alu lea ona ua sau fo’i le pogisa.

A o talanoa i le ulugali’i i fafo o le fale, na tu’uaia e le ua molia lona to’alua i le faia lea o se la mafutaga faalilolilo ma se tasi ali’i. Na fa’afuase’i ona tui e le ua molia lona to’alua i se tamai naifi ma a’afia ai lona lima agavale.

Na alu i le atoa le ua molia ina ua mae’a ona ia fa’atino le solitulafono, ae ta’atia ai lona to’alua i le vaega sa la talanoa ai ua manu’a. O tagata o le aiga na fa’alogo ane i le alaga leotele a le Tina i lona fia maua o se fesoasoani, na laga ane ma fesoasoani, sosoo ai loa ma le auina atu o ia i le falema’i mo togafitia.

Na fiu Leoleo e saili le ua molia i le po na tula’i mai ai le fa’alavelave, ae o le aso na sosoo ai na fa’atoa maua ai o ia i le fale o lona uso i Fagaima. Na sola ese le ua molia ina ua aga’i atu Leoleo, peita’i na toe maua o ia ma auina atu loa i le Ofisa o Leoleo i Tafuna mo suesuega.

Na teena e le ua molia tu’uaiga o ia sa tuia lona to’alua i le naifi. Na taua e le ua molia e fa’apea, o ia na taumafai e pule i lona ola e ala i lona taumafai e tui o ia i le naifi, ae na tago atu lona to’alua ma taumafai e se’i ese le naifi mai lona lima, o iina lea na fa’afuase’i ai loa ona lavea o ia.

Na fesili Leoleo i le ali’i ua molia pe aisea na sola ese ai ina ua lavea lona to’alua, ae na tali le ua molia, na alu e su’e mai se ta’avale e ave ai lona to’alua i le falema’i, ae te’i ina ua fo’i atu ua leai se isi.

O loo taofia pea le ua molia i le toese i Tafuna e fa’atali ai le vaiaso fou lea ua fa’amoemoe le malo e tatau ona faila ai moliaga fa’aopoopo fa’asaga ia te ia.