Tala I Vaifanua

KAMUPANI STARKIST MO LE LUA VAIASO O ASO FIAFIA

Ua fa'amaonia mai e le Star Kist Samoa o le a mae'a galuega mo lenei tausaga ia Tesema 21, 2018 soso’o ai loa ma malologa masani mo le lua vaiaso aua aso fiafia mo le Kerisimasi ma le Tausaga Fou.

I le taimi o malologa nei, e faia nisi o galuega fa’aleleia i le kamupani, ma toe amata ai galuega ia Ianuari 7, 2019.

O le meaalofa ua fuafua e tufaina mo tagata faigaluega uma i le Kamupani I'a ua fa'ailoa mai fo'i, o a latou pusa apa wahoo, faatasi ai ma latou siaki mulimuli o lenei tausaga.

"O le a fa'amalosi'au atu i le aufaigaluega ina ia tamau lo latou naunau e toe taliu vave mai e faigaluega, aua o le masani lava a tagata faigaluega i le tele o tausaga, e tuai ona taliu mai i le toe a'e ai o galuega,” o se tala lea a le so’oupu a le kamupani.

Ona o le to'atele o le aufaigaluega a lea Kamupani o tagata nu'u mai Samoa, e tusa ma le 80% o i latou, ma o le a  fuafua e aga'i atu i Samoa mo le vaitau malolo lenei o galuega.

Peita'i, e le'i faimalaga lava le Lady Naomi i le taimi nei, o lona uiga e matua pisi lava fo'i va'alele a le Samoa Airways ma e le faigofie fo'i ona toe maua mai avanoa e fo'i mai ai.

Ua tusa ma le lua masina e le'i toe fealua'i lava le Lady Naomi. Ua fa'ailoa mai fo'i e le Kamupani Va'a a le Polynesian Shipping, "E le o mautinoa lava se taimi e toe malaga ai le Lady Naomi, e fuafua lava i le Samoa Shipping pe a o'o ina femalaga'i le Lady Naomi."

I le taimi nei o lo'o faimalaga lava le Fotu o Samoa i le va o tatou motu nei e lua, ae le mafai ona femalaga'i ai ni pasese, ua na'o uta lava o lo'o fela'ua'i ai.

TAGATA SA FAIGALUEGA SAMOA PACKING SAILIA FIA MAUA LATOU PENISIONE:

Ua mae'a sulufa'i mai i le Samoa News nisi o e na faigaluega i le COS Samoa Packing Company Production o lo'o ua latou fia iloa lava se ala e mafai ai ona maua se fesoasoani e fesiligia ai latou Penisione sa totogia a'o faigaluega i lea Kamupani. O le 2009 sa tapunia ai le Samoa Packing.

"A le o se fesoasoani fo'i, a'o se mea e fa'asino mai e aga'i atu i ai e taumafai ona talosaga ai le penisione se'i totogia ai pili e ola ai,” o se tala lea a se tasi o tama matua sa asia le Samoa News mo se fesoasoani i lea itu.

I lea taimi sa ia taua'aoina se lisi, o i latou uma lava sa galulue fa'atasi, e leai lava ma se tasi ua talia se penisione, ma ua fia iloa fo'i ni tali i a latou fesili pe afai e le'i agava'a ai i le penisione, ae poo le a fo'i se taimi tonu e agava'a ai.

I le taimi nei e tatau ona sailia i ala tau feso'ota'iga tau Emeli po'o Upega Tafailagi a le Kamupani sa totogia i ai latou Penisione ao faigaluega.

Ua fa'ailoa mai e i ai nisi sa latou talosagaina pepa a nisi o sui pei fo'i o i latou, ae sa totogia le $100 fa'ato'a alu lea tama'ita'i e saili i le Initeneti se tali mai i le penisione a le sui ua mae'a totogia latou ta'i $100.

Ina ua feso'ota'i atu mo se fesoasoani i le Ofisa o le Amerika Samoa Legal Aid, ae fa'aalia, e tatau ona o'o atu se to'atasi o sui nei o loo fia iloa le tulaga o i ai latou penisione mai lea Kamupani, se'i o latou fa'atalatalanoaina ma iloa patino ai le mataupu ma aiaiga o i ai, ona latou talanoaina lea i sa latou fono, pe alagatatau ona latou fa'atinoa lea tautua. O lea Ofisa e fa’amautu Haleck building i Pago Pago.

MATAINA LE FOLASAGA "INFLUENZA 1918 A SAMOA"

I le Fonotaga a Samoa na lua lea na faia i le Amoa Resort i Faga Savaii, sa toe tepa ai Samoa i le a'afiaga o le soifua lautele o Samoa i le  "Influenza" o le 1918. E toatele i latou i Samoa sa maliliu ai. E i ai fesili na taulai i lea fonotaga i lea fa’amai.

"I le taimi nei, ua toe tepa i ai i lea sasi sa faia, ua le toe mafai ona toe fa'afo'i mai le soifua o i latou na maliliu ai, o pelega a aiga. Peita'i o le tele o fesoasoani na maua mo le malo ina ia le toe tupu lea tulaga i ona tagatanu'u talu ai lea fa'ama'i pepesi, o le isi lea fa'afetai tele” o se tasi lea o folasaga i le fonotaga.

Lona lua o le toe tima'ia o e faigaluega i le Ofisa o Quarantine i luga o le Uafu i taimi e taula mai ai ni va'a, ia mautinoa e le o i ai se e gasegase o lo'o malaga mai ai.

I le taimi nei, ua ofoina e Niu Sila se avanoa fa'apitoa mo aoga fa'afoma'i i nisi o foma'i i Samoa ina ia auai ai mo le fa'alautele o latou tomai i le galuega.

I le folasaga tali a Amerika Samoa sa tula'i ai le susuga Onosa'i Aulava ma Nuuao Pelupelu Umi.

"O le tala'aga o lea fa'ama'i e le'i pesia ai Amerika Samoa. Na matua fa'aaoga le malosi'aga fa'ata'ita'i o Kovana Poyer i lena vaitau, ma ia fa'asaina le tuta atu o se va'a i so'o se Uafu lava o Amerika Samoa.”

"O lo'o i ai lava tamau fa'ale ofisa o Guarantine i Amerika Samoa, o le tertori o Amerika, e le mafai ai ona ulufale se vaa se'i vagana lava ua mae'a pasia mai e le US Coast Guard. Ua fa'apena fo'i ona matua fa'amalosia tulafono uma tau le Soifua Maloloina i luga o le Uafu i Fagatogo ma le Malae Va'alele i Tafuna.”

40 TAUSAGA TAUTUA MIRIAMA HUNKIN I LE ASG TREASURY

O le tina o Miriama Hunkin o le Ofisa o Tupe a le tatou malo, sa fa'amau fa'ailoga lana tautua e 40 tausaga i ona tusi pasi na taua'aoina i le aso Tofi o le vaiaso na te'a, faapea ai ma mea alofa.

"O le tautua o se tasi lea o aseta sili ona taua i so'o se malo. Aua e fa'amoemoe le Malo i le tautua a ana tagata faigaluega ina ia mae'a tapena ai ana gaoioiga i lea aso ma lea aso. O lenei tina ua atoa le 40 tausaga o lana tautua, ma o le fa'afetai mo ia e silisili lea i mea uma,” o se tala lea mai le ali'i teutupe a le Malo.

Mai lea tina, "Fa'afetai i le malo ma ona taupulega eseese sa tula'i mai ma matou galulue fa'atasi, fa'afetai i le aufaigaluega uma sa matou soalaupule i tiute ma faiva i le Matagaluega o Tupe, ae o le fa'afetai sili, o le Atua ma ana meaalofa sa tumau ia te a'u le ola, le malosi fa'aletino ma le mafaufau, ae maise o le olioli sa ia foa'i pea e galue ai. Fa'afetai sa tumau lona agaga ia te a'u, ina ia maua ai le fa'amaoni i tiute, a'o le olioli e faigaluega fa'atasi ma isi uma o le matou galuega. Ua tu'ua le galuega, ae o le alofa ma le misia o uo mamae ma e sa galulue fa'atasi e le mavae lea mai le agaga."