Loka e Leoleo le ali’i na fa’amalosia lona afafine e 13 tausaga

E 28 tausaga o se ali’i ua taofia nei i le Falepuipui i Tafuna, ona o tu’uaiga i lona fai’aiga fa’amalosi lea i se tama’ita’i e 13 tausaga le matua, o le tama teine lea a lona to’alua.

O le vaiaso na te’a nei na tula’i ai James Fa’aleo i luma o le faamasinoga fa’aitumalo mo lana ulua’i iloiloga. O lo o tu’uaia e le malo o ia i moliaga e 27, lea e aofia ai moliaga mamafa e 5 o le faiaiga fa’amalosi; 10 moliaga mamafa o le tagofia o itutinosa o se tama’ita’i; 5 moliaga mamafa o le faiaiga i se tagata e aiga i ai, ma moliaga mama e 6 o lona faia lea o ni gaioiga e ono lamatia ai le saogalemu o fanau laiti.

O le tama’ita’i loia fautua lagolago ia Anna Wells sa tula’i mo Fa’aleo i lana ulua’i iloiloga, ae o le ali’i loia sili lagolago ia Jason Mitchell na tula’i mo le malo.

E $200,000 le tupe lea ua fa’atulaga e le fa’amasinoga e totogi ona fa’atoa mafai lea ona tatala Fa’aleo i tua mai le toese. Afai ae tatala o ia i tua, ua fauatuaina o ia ina ia tausisi i tulafono uma a le malo, aua ne’i taumafai e sola ese ma le atunu’u, ma ia tuuina atu lona tusi folau e taofi e le loia a le malo.

Ua fautuaina fo’i o ia ina ia aua ne’i taumafai e fa’afesoota’i molimau a le malo, e aofia ai lona to’alua ma lona afafine o loo a’afia i lenei mataupu.

Na teena e le afioga i le ali’i fa’amasino ia Fiti Sunia le talosaga a Wells ina ia fa’aitiitia i le $50,000 le tupe e tatala ai i tua Fa’aleo. Saunoa Sunia e fa’apea, talu ai le matuia o tu’uaiga fa’asaga i le ua molia, o le mafua’aga lea ua manatu ai le fa’amasinoga, o loo talafeagai le tupe ua mae’a ona fa’atulaga e tatala ai o ia i tua.

TAGI A LE MALO

O le mataupu lenei na tofu atu i le Ofisa o Leoleo i le vaiaso na te’a nei, ina ua talosagaina e le Tina o le tama’ita’i na a’afia (o le to’alua fo’i lea o Fa’aleo) se fesoasoani a Leoleo, e faatatau i le mataupu na fa’aoolima ai Fa’aleo ia te ia ma lana tama i le po o le aso Sa, Nov. 25 i lo latou aiga.

Na taua e le Tina i Leoleo le ta tu’i e le ua molia o ia ma mafua ai ona pau i lalo. Sa fa’asaga atu fo’i le ua molia ua fasi lana tama teine, ma folafola lona fasiotia o i laua. Ina ua mae’a ona faia e Fa’aleo nei gaioiga uma, sa ia tago loa i le telefoni a lona to’alua ma sola ese loa ma le fale.

E lei toe oo Fa’aleo i lona aiga talu mai le aso Sa na tula’i mai ai le vevesi. Ae i le taeao o le aso Gafua na sosoo ai, Nov. 26, na vaaia ai e le fafine ia Fa’aleo o loo nofonofo i se Fale Faatali pasi, ma faatu ai loa e le fafine le pasi ae nofo e aumai lana telefoni na alu ma Fa’aleo.

O le talanoaga a Fa’aleo ma lona to’alua sa fai ai le taimi lea, na toe tula’i mai ai fo’i le isi vevesi, ma vili ai loa e le fafine Leoleo mo se fesoasoani. Na taunu’u Leoleo ma latou ave uma le ulugali’i i le Ofisa o Leoleo i Fagatogo ma fa’atalatalanoa loa e uiga i lenei mataupu.

Ao fa’atalatalanoa e Leoleo ia le to’alua o Fa’aleo e uiga i le vevesi sa tula’i mai, sa fa’ailoa atu ai loa e le fafine i Leoleo le mataupu e fa’atatau i uiga le tau pulea sa faia e le ua molia i lana tama teine ua 14 tausaga i le taimi nei.

O ia uiga mataga e pei ona taua e le fafine i Leoleo, e aofia ai se mafutaga fa’aleulugali’i i le va o Fa’aleo lona to’alua ma lana tama teine. Na taua e le Tina i Leoleo le mae’a lea ona ia talanoa ia Fa’aleo i le tele o taimi na alia’e mai ai lenei mataupu ina ia taofi le mea o loo ia faia, peita’i sa le’i fa’alogo le ua molia.

Na fesiligia e Leoleo le tama’ita’i na a’afia e uiga i tu’uaiga fa’asaga i lona Tama fai, ma faamaonia ai e le tama’ita’i i Leoleo le la mafutaga fa’aleulugali’i ma Fa’aleo, lea na amata mai i le masina o Aperila seia oo mai lava i le masina o Setema.

Na ta’utino le teineititi i Leoleo, e fa’atele ona la momoe ma Fa’aleo, e fa’atele fo’i ona la faia uiga mataga fa’aleulugali’i. O nisi o taimi e alu atu ai Fa’aleo ia te ia ona la fa’atinoina lea o nei uiga mataupu.

Ina ua fesiligia e Leoleo ia Fa’aleo, sa ia ioeina ai lona faia o uiga mataga i lona afafine fai e 13 tausaga le matua.