Tala I Vaifanua

FA'APIPI'IA FA'AILO O MU I MAOTA O AIGA I AMANAVE ELE KOLUSE MUMU

Ua toe fa'aauau le fa'apipiga o Sailini Fa'ailo o Mu i Maota o Aiga, o se tautua a le Koluse Mumu ma latou pa'aga mai fafo, lea o lo'o fa'auia mai ai le sapalai o nei Sailini Fa'ailo.

"A'o le'i fa'apipi'ia nei masini i totonu o maota ma laoa o aiga i totonu o se afio'aga, e ao lava ina mua'i feutagai i matou ma le afioaga, ae maise o aiga ta'itasi ma faia loa le a'oa'oga, e fa'ailoa atu ai le aoga tele o nei masini, ma o le galuega fo'i e ao lava ina fa'apipi'ia e matou tagata faigaluega. Ua le mafai ona tu'u atu e faia le galuega lea e se tasi o nei aiga uma i so'o se afio'aga ua o'o i ai le savali ma le tautua,” o se tala lea a le tama'ita'i Pule o le Ofisa o le Koluse Mumu i Tafuna, To'afa Leilani  Tu'amoheloa - Tilo.

O sui o lana aufaigaluega, o i latou o lo'o ofoina atu le latou tautua e le totogia, e na o le to’atolu: Apera'amo Levi; Emelini Petelo ma Fritz Fiatu.

Ua fa'ailoa mai, sa matua lava se taimi na fa'aalu e fa'amatala ma fa'ailoa ai i aiga e silia ma le 20 ua mae'a fa'apipi'ia latou sailini fa'ailo, ina ia iloa lelei ona tape le suavai ia le susu le fale, pe afai e le o se mu, a'o se tauasuasu mai se ta'inafi po'o tatou umu lea ua ulu i le fa'ailo lea, ma mafua ai ona e'e.

E muamua lava ona i'i mai le masini, ona iloa lea o le a soso'o ma le ki mai o le vai e fesoasoani e tape ai le mu, pe afai o se mu sa'o lea o lo ua sogitia e le masini fa'ailo lona tauasuasu. Lona lua o aoaoga ua faia mo aiga ua fa'apipia ai masini nei, o le fa'ailoa lea i ai o se latou fuafuaga fa'ataoto i le mea tonu e aga'i uma i ai le aiga atoa, pe afai ua matauina ua mu le latou fale.

"E le mailoa le taimi e tutupu ai nei ituaiga o faalavelave fa'afuase'i i totonu o aiga, o lea e ao ina matua tamau i mafaufau o tagata uma le mea e ao ina faia pe a fa'alogoina le sailini mo le mu ua e'e mai. O faitoto'a e aga'i atu i ai, ma o ese mai ai mai le fale. O lea fuafuaga e ao ina iloa patino uma e tagata o le aiga atoa, o lo'o latou nonofo fa'atasi,” o le isi lea toe fa'apupulaga atili a Tuamoheloa-Tilo.

Ua fa'aauau pea la lenei tautua, o le a mua'i alauta fo'i le isi afio'aga e soso'o ai pe a mae'a ona fa'avasega uma a latou masini e le latou vaega ua totofi mo lea galuega lelei, ma e faia fo'i se fono a le pulega ma le vasega o Pulenu'u o afioaga ta'itasi ina ia avanoa ane i lea aso o le a atofa mo le latou fo'i afio'aga.

I le taimi nei e to'a fitu i latou o Volenitia i le Koluse Mumu, ma afai e te fia ofoina atu lou tagata e tautua ai le mamalu lautele e ala i le avea ma Volenitia i le Koluse Mumu, e mafai ona e susu ane i le latou Ofisa i Tafuna mo le lesitalaina o lou suafa.

FAAAOGA VAEGA A LE LAINA A LE ASPA - FA'ALAUILOA AI LE LATOU TAUTUA

I le malae i lumafale o le ANZ Bank i Tafuna, na faia ai fa'ata'itaiga mo le silafia a le mamalu lautele o le atunu'u, tiute ma faiva o lo'o nafa ma le vaega o laina a le ASPA, Laina o le Eletise, i le aso Faraile na te'a nei.

O lea fa'amoemoe ina ia fa'alauiloa o latou faiva e fa'atino i aso ta'itasi, ma lo latou agava'a fo'i i o latou tiute fa'atino pe a mana'omia se fesoasoani ele atunu’u. Ma o se aso na fa'atasia ai ma o latou aiga pele.

Ua fa'ailoa mai, i tausaga ta'itasi e auina atu ai e le ASPA nisi o latou tama agava'a mai le vaega a le Laina Eletise, e auai i le International Brotherhood of Eletrical Workers, peita'i o lenei tausaga ona ua a'afia i tatou i le afa o Gita ia Fepuari, ua le gafatia ai ona malaga le latou vaega na tu'u e auai i lea fo'i fefa'asoa'iga o tomai ma fa'alautele atili ai fo'i le iloa i faiva o tautua ai le lautele o le atunu'u. O lea ituaiga o fa'atinoga e fa'aigoaina o le Rodeo.

E silia ma le 40 sui faigaluega i le Laina na fa'atauva ai i latou 'au eseese, ma e ui ina fa'atauva i nei 'au, ae sa fa'atino ai lo latou agava'a ma le iloa i o latou faiva o fa'atino i aso faigaluega ta'itasi. O lenei fo'i aso sa latou toe fa'amanatu ai le soifua tautua o latou sui iloga i le tautua a le Eletise, Suavai Taumafa ma le Suavai Lafoa'i ua tu'ua le malo ma le galuega. O se tasi o nei sui iloga o le Pule Sili sa umi se taimi o latou mafuta ma galulue fa'atasi, le afioga le Matua Utu Abe Malae.

MANA'OMIA ONA TINEIA LE ITUAIGA LOI NINI'I FA'ALAFUA

Ua talosagaina le to'atele o aiga o le atunu'u e va'ai patino le ituaiga loi nini'i ae matua fa'ateleina vave lava, ae e le'i leva fo'i ona matauina, ua maua i o tatou laufanua ma totonu o maota i lenei vaitau.

Ona o lea ituaiga o Loi ua fa'ailoa mai e a'afia ai tele fua o fa'aeleeleaga, ae maise fo'i o nisi o mea aoga i le siomaga i Amerika Samoa, o lea ua fa'ailoa mai ai e le Matagaluega o Fa'ato'aga ina ia tautuana le mamalu a va'aia i lou fale po'o lau fa'ato'aga ia fa'atama'ia loa lava a'o matua'i nofoia e lea ituaiga o loi lau fa'ato'aga atoa.

Ua galulue so'otau'au nei le Matagalugea o Fa'ato'aga ma le ASCC i le latou Nofoaga o Suesuega fa'apitoa [Etomology Lab] i se fa'asalalauga tusitusia e tusa o lea ituaiga o Loi ma lona a'afiaga e ono fa'aleaogaina ai le tele o fua o fa'aeleeleaga i le atunu'u.

I le taimi nei, o le ituaiga o iniseti fa'alafua lea ua fa'alauiloa mai e ao ina tineia atoa i le atunu’u, ae maise i le motu lava o Tutuila. O le susuga le ali'i Foma'i Casper Vanderwoude o le Iunivesite o Hawaii lea ua fa'ailoa maia le igoa o lea ituaiga o Loi o le "Wasmannia Auropunctata" ma e mafai e so'o se tasi ona ta lea igoa i so'otaga o le Initeneti ma faitau i ai i le natura o lea ituaiga o loi po'o le iniseti.

O lenei ituaiga o Loi na maua lava i Setete Tutotonu i South America, peita'i o lea ua o'o mai i o tatou laufanua nei ma ua latou nofoia nei le tele o malo fa'aatumotu o le pasefika e aofia ai Hawaii, Guam, Amerika Samoa, New Caledonia, Frech Polynesia, Solomona Islands, Vanuatu, Wallis & Futuna ma Papua Niu Kini. E tula'i mai e le'i nofoia e lea Loi le malo o Samoa.

O lenei ituaiga o Loi e matua la'ititi lava e matua maini lava lana u ae maise fo'i e mageso ai nisi i lana u lava lea. Na mua'i matauina le o'o mai i eleele o Amaerika Samoa e tusa ma le 16 tausaga talu ai.

O lea ituaiga o Loi e matele fo'i ina nofo mau i totonu o pa'u o la'au, o'o mea fo'i o lo'o matele ina fa'aputu i ai lau la'au mamago. E matua malosi fo'i le latou fa'atama'ia o ituaiga loi lelei e le afaina ai le siomaga ma fa'ato'aga toto i le atunu'u.

O le afaina e matele ina a'afia ai le la'au toto i lea ituaiga o Loi, ona e fiafia e miti'ia le sua suamalie o la'au ola, ma fai ai o latou moega tumau e mitiia ai pea e i latou le sua o nei la'au, ma i'u ai ina mate le la'au ona o nei manu nini'i fa'alafua.

O le a mana'omia e le vaega a le ASCC :Land Grant se lipoti mo i latou pe afai o le a va'aia lea ituaiga o Loi i lou fale po'o lau fa'ato'aga. Numera 699-1575.