Tala I Vaifanua

MIKAELE AUNOA: TULAGA LUA TAUVAGA TINO TEUTEU - OCEANIA

O le ali'i talavou na suia Amerika Samoa i le Tauvaga Teuteutino i Rarotonga, Atu Kuki, ua ia maua le tulaga lua i le Oceania Bodybuilding.

O le susuga Mikaele "Mike" Aunoa, o le Sauia IFBB Bodybuilding & Fitness Federation lea na fai ma sui o Ameika Samoa. Peita'i o le a tatalia pea fo'i se taumafaiga a le ali'i teuteutino a Brock Goodwin, lea e malaga fo'i e tauva i le taimi nei i Spain.

Ua fa'aalia fo'i le fiafia o le ali'i peresetene o le Sauia IFBB, Peter Reid Jr. ona o le taumafaiga a Aunoa ua ta'ua ai fo'i le igoa pele o Amerika Samoa. Sa tauva Aunoa i le Men's Physique lea e le taulia ai vae, ma ua fa'aaogaina ai e i latou ofu vae bermuda ae ua fa'amasinoina mai o latou manava ma lima ma tau'au.

I taumafaiga uma Aunoa e aofia ai fo'i lona avea o le tulga lua i le tauvaga a Shawn Ray's Hawaiian Classic Open Mens Physique i le tausaga e 2017. I le 2018 na toe tauva ai o ia i le NPC Ikaika Classic i Honolulu Hawaii ma na tulaga lua ai i le Masters Class B.

FA'AAOGA ASOSI VOLLEYBALL - 'ASVBA' - FA'AIUGA ALE KOMITI ULU ASNOC

Ua mae'a pasia e le fonotaga a le Komiti Fa'afoe a le ASNOC le fa'aaogaina e le Asosi Volley Ball a Amerika Samoa, lea sa fa'aigoaina o le American Samoa Volleyball Federation, le igoa "American Samoa Volley Ball Association”.

Ina ua latou usita'ia aiaiga uma sa fa'atulaga e mafai ai ona latou fa'atautaia o le Asosi Volleyball  Association, ua fa'ataga ma fa'alauiloa atu ai lea suiga i le fa'atautaiga o lea fo'i Fa'agatama taua i tupulaga i le atunu'u.

"O lenei suiga lelei, ua iloga ai ua amata ona galulue ma ta'a'alo fiafia fa'atasi uma tupulaga o Amerika Samoa i le autasi ua i ai nei o finagalo ma lagona, e tusa o lea fa'agatama i totonu o le atunu'u. O se miti sa moemiti ma momo'o i ai, ua mafai ona ausia aua ua loto fa'atasi uma fa'auluuluga o 'au ta'a'alo fa'atasi ma fanau talavou o lo'o fiafia e ta'a'alo e fa'aaoga latou taleni i lea fa'agatama i Amerika Samoa. Alo maia, tatou sapaia lenei leleiga, aua o se mea fiafia tele, le tasi o loto o le 'auuso i taimi uma. O se tatou sao fo'i lea i le finagalo o le Atua e ona le malosi uma lava, ina ia tatou nofo fealofani,” o tala lea a le ali'i peresetene o le Asosi Volley Ball i le atunu'u, Ben Solomona Sauvao.

Mai le ta'amilosaga volleyball i le fa'aiuga o le vaiaso na te'a nei, ua fa'ailoa mai ai, ua tumau pea le talita sa i a'ao malosi o le Annex Men's Volleyball Team ae ua se'ia nei le talita a le vasega o tama'ita'i sa umia e le BTI mai Nuuuli talu mai le amataga o le Liki lenei o ta'amilosaga mo le Talita.

O le ta'aloga faitaulia i le va o le Misuno Girls ma le BTI i le aso Toona'i na te'a nei ua se'ia ai le talita ma ua mau ai nei maiu'u o le Misuno Girls i lenei vaiaso.

O le talita o le Ta'amilosaga a le U19 Boys Volleyball ua fa'ailoa mai ua se'ia ai nei e le Ali'itaoso lea sa fetaui ma le 'au malosi a le taulaga Le Laumuatasi U19 sa latou umia mai le talita.

O lona uiga ua se'e atu nei le talita lea i a'ao o le Ali'itaoso U19. Se'i va'ai po'o le a se umi e mau ai fo'i i a'ao o le Ali'itaoso le talita, ma ua saunia fo'i i latou mo ta'aloga faitaulia o le fa'aiuga o lenei vaiaso i le Faleta'alo lava i Malaeloa.

TAFUNA HIGH NHS - 5KILIMITA LE TAMO'EGA - FA'ALALO LE RHD MA'I FATU

"O le tele o lima e mama ai se 'avega, o le tele fo'i o sulu e maua ai i'a!" O lea se fa'atofala'iga ua alofaiva atu i ai le vasega o fanau a'oga o lo'o maualuluga togi i mataupu o tau'avea i a'oa'oga i le A'oga Maualuga i Tafuna i lenei tausaga [NHS]

Ua fa'apa'aga nei le NHS Tafuna High ma le Matagaluega o le Soifua Maloloina a le tatou malo ina ia avatu i finagalo o le fanau talavou ma latou aiga fo'i, lea fe'au taua, tete'e i le Ma'i Fatu, aua o Amerika Samoa fo'i lea ua numera tasi i le to'atele na'ua o latou tupulaga talavou, fanau o lo'o ua ulufale i aoga ua maua i le Rheumatic Heart Disease.

O le galuega ua mafuli i latou e fa'atino, o se tamo'ega e fa'aautu i se gaoioiga e faatino ina ia fa'alauiloa ai lea manulauti. O le a faia lea tamoega e 5 kilomita le umi ia Novema 17, 2018 ae o lona auga ela e fa'alauiloa ai e i latou o totino uma o le NHS i Tafuna.

E amatalia le tamo'ega i le 5:30 i le vaveao, ua fa'apa'aga fo'i i latou ma le Matagaluega o le Soifua Maloloina ma e to'atele i latou o le a tamomoe i lea taeao.

"O le toe fa'amalosia o fanau talavou ina ia fa'amalositino, e fa'aalu ai le afu, ma fa'aitiitia ai le so'ona mamafa o tino, o se manulauti e suia ai le olaga o le tagata soifua, ia malosi lona tino ma to'aga e fa'atino tiuite fai i le aiga, atoa ai ma le ola soifua maloloina lelei,” o se tala lea a se tasi o sui tama'ita'i o le NHS, Nellie Leisala, Vasega 11, Tafuna High.

FA'AOPOOPO MALAGA HAWAIIAN AIR - KERISIMASI & TAUSAGA FOU

Ua fa’aopoopo malaga a le Hawaiian Airlines i le va o Honolulu ma Amerika Samoa i le Kerisimasi ma le tausaga fou. O malaga fa’aopoopo e faia lea i aso Sa ma o le malaga muamua ia Tesema 2, 2018 e o’o atu ia Ianuari 13, 2019.

O nei malaga fa’aopoopo e taunu’u i Pago Pago i le po e pei ona i ai i le taimi nei malaga e lua a le Hawaiian Air i le po o le aso Gafua ma le aso Tofi.

ASO E MUTA AI TALOSAGA - NOGATUPE A LE SBA

Mai le Ofisa o le US Small Business Administration i Sacramento, Kalefonia ua fa'amanatu mai ai e le fa'atonu Tanya N. Garfield i le vasega o Pisinisi Laiti i Amerika Samoa le aso e muta ai talosaga mo ni nogatupe e fa'aleleia ai ni mea fa'aleagaina ona o le Afa o Gita na lutia ai le atunu'u, Fepuari 7-12, 2018.

O lea aso o Tesema 03, 2018 ma e ao ina fa'aulu atu nei talosaga uma i e SBA. O nei pisinisi uma e agava'a e talosaga atu e aofia ai pisinisi o so'o se ituaiga e aofia ai ma pisinisi tumaoti, pisinisi e faia e le mo se polofiti, o pisinisi fo'i e fa'atautaia e NGO.

O le tetele o ia nogatupe e mafai ona au i le $2miliona ina ia mafai ona toe fa'aleleia pisinisi sa a'afia ma le ausia ai e i latou ala o latou tautua sa fa'atautaia mo le mamalu lautele. O vaega tupe e maua mai i nei nogatupe e mafai ona fa'aaogaina e totogia ai tagata faigaluega, faaleleia atili ai le auaunaga sa fa'atino e lea pisinisi a'o aluga lelei a'o le'i sofa'ia le atunu'u e le afa o Gita.

I le taimi nei, ua mae'a fa'amaonia ma atofa nogatupe mai pisinisi na talosaga i le SBA ma o lea aotelega e $1,956,700; ae o isi talosaga mo nogatupe mo tagata ta'ito'atasi e 635 aiga, ua fa'aalu ai e le SBA le aotelega e $9,226,700.00

O ituaiga nogatupe nei e laititi lava le latou tupe fa'asili po'o le initelesi ua fa'aopoopoina i ai, e na'o le 3.58% mo kamupani tumaoti, 2.5% mo pisinisi e fa'atautaia e fa'alapotopotoga e le faia mo se polofiti.