Tala I Vaifanua

lFA'ASIMA McCONNELL DOWELL ELEELE MO FA'ATASIGA AOGA PAVAIAI

I le A'oga Tulaga Muamua a Pavaiai e le maua lava se nofoaga lelei e faia ai latou fa'atasiga, e fa'atutu lava fale'ie i lumafale o le a'oga, ma taumafai ona fa'atasia uma i ai le aoga i mea e fa'atino. O le latou fale'ai fo'i e fai si la'ititi e le ofi atoa i ai le a'oga atoa.

Peita'i, o le fasi eleele lava i lumafale o le a'oga atoa, o iina e fa'aofiofi ai le tele o mea e tu'ufa'atasia ai le a'oga atoa.

O lena la le eleele ua manatu le McConell Dowell o le a avea ma latou galuega fa’aopo fai mo le lelei o tagata lautele i lenei tausaga, ae o se meaalofa sili ua mafai ona latou fa'atinoa mo le fanau a'oga, le aufaigaluega ma faia'oga uma i le Pavaia'i Elementary School, Pavaiai.

O Pavaiai o se tasi o aoga tulaga muamua a le malo, e to’atele fanau aoga mai le Level K5 se'ia pa'ia le Level 8.

Ua fa'ailoa mai e le peresitene o le PTA a le aoga a Pavaiai, Apoga Custodio, "Ua matua ta'amilomilo solo le PTA i le tausaga ua te'a ma lenei fo'i tausaga e tau sailia se fesoasoani, ia vave ona tino mai se nofoaga e fa'atasi i ai le a'oga, aua e momomo le loto pe a va'ai i le to'atele o fanau e feomia'i lava i lalo o faleie, ma tau fa'aofiofi i lea avanoa ae le gatasi fo'i. Lea ua tali mai lenei kamupani a McConnell Dowell, fa'afetai i lo latou agaga i fanau o le lumana'i lea o le atunu'u."

O le susuga ia Toetau Poutu Tufuga o le McConnell Dowell na tali mai i se fa'atalosaga atu a Larry Sanitoa, aua o ia lea na fa’afeso’otai e Pavaiai elementary mo se fesoasoani.

"Ua lelei fo'i lenei avanoa, e avatu au le fa'afetai i le ma'ema'ea fo'i ma le taumafaiga ua au a lea sui o le itumalo ua fa'aleleia ai lenei eleele mo le fa'afaigofie ona fa'atasia le fanau a'oga i Pavaiai. O lea ua fa'alauleleia le eleele ma ua fa'afaigofie ona fa'atutu faleie ma fa'aofiofi le fanau a'oga pe a fa'atasia uma,” o se tala lea a le tama'ita'i pule a'oga.

O lea fo'i eleele ua fa'asimaina ma fa'alaugatasia atoa, o le nofoaga lava lea e masani ona pu'eina ai ata o faia'oga uma mo le latou aso fa'apitoa, faia ai le tele o latou fa'atasiga ma isi mea uma talu mai lava ona fa'atuina lea a'oga.

FA’AKONEKARATE STAR KIST SAMOA TU'UAPAINA AI LE I'A KOSHER TUNA

Ua fa’akonekarate le Star Kist Samoa e tu'uapaina le taumafa “Kosher Tuna” mo le Jewish Education i Greater Niu Ioka, lea ua latou fa'atautaia pisinisi i le igoa "The Jewish Education Project.

I pepa o fa’amatalaga mail e Jewish Education Project sa fa'ailoa ai o lo ua latou auina mai ni a latou supavaisa i Amerika Samoa e tagai i galuega mo le fa’atulagaina o le “Kosher Tuna” i le StarKist Samoa.

O le aotelega o le fanau a'oga i lea fo'i fa'alapotopotoga a tagata Iutaia e 50,000 ma o i latou na e fagaina i lea sapalai o le i'a tu'u apa pe fa'ataga. E ala fo'i ona pasia muamua e nei supavaisa fa'apitoa a le Jewsish Foundation, ina ia mautinoa o lo'o gaosia le i'a lea e tusa ma aiaiga o mea taumafa a tagata Iutaia, lea e mama ona tapena, e matua leai se toto o totoe ai i le a'ano o le i'a.

O le vaega lea o le Kosher, o i latou na e vailiilia le gaosiga o le i'a po'o talafeagai mo tausami a le fanau a'oga, ma ali'i Rapi e to'atolu ina i latou auiliilia le gaosiga o le tatou i'a tu'u apa pe o talafeagai ma mea'ai fa'a Iutaia a lea to'atele o le fanau.

O le vaiaso muamua lenei o Novema o le a to'ai taunu'u mai ai le aumalaga lea a Rapi e to'atolu e ta'ita'ia mai e Rapi Binyamin Gruber mo le fa’amoemoe.

Ua fa'ailoa mai e 100+ a'oga i Amerika o le a kiliva i ai e le Kosher Jewish Education Project le latou apa i'a lea o le a gaosia fa'apitoa atu iinei, peita'i e le'i mailoa le vaitaimi tonu e tatau ona amatalia ai ona gaosia le apa i'a lea e le tatou Kamupani I'a.

MAUTINOA E LE TOE LAVA LE POPO MO OLOA GAOSI A SAMOA

I fa’asalalauga mai le malo o Samoa o fa’ailoa ai, ua toe u'una'ia malosi le au fai fa'ato'aga ina ia toe totoina niu fou. I le taimi nei, ua iloga mai e tauau e le toe lava le popo maua mai le atunu'u, ina ia mafai ona gaosia ai le suau'u mai le popo lea e fa'aaogaina i afi moli e sapalaia mai ai le eletise, fa'atasi ai ma isi oloa gaosia mai le suau'u o le popo.

E tusa ai ma lipoti a le Minisita o Fa'ato'aga e tusa ma le 80 o niu i Samoa ua matutua ma ua tau le maua ni fua se tele e pei o niu i le taimi a'o talavou. O lona uiga e le o toe tele popo e maua mai le niu e tasi, e pei o le mea sa i ai mai le amataga ona toto niu.

O le susuga Moafanua Tolo Iosefo, o le Sui Pule o Metoto i lea vaega o le malo o Samoa, ua ia fa’ailoa, "I le taimi nei o le tele o le popo i totonu o le atunu'u ua fa'asolo aga'i i lalo, ua le toe a'e i luga, ua iloga mai ua fa'ateleina le mana'omia mai fafo o le fagu'u mai le popo a Samoa, ma isi oloa e o'o lava i le ga'o mai le popo, ae maise fo'i le suau'u, peita'i ua le gafatia nei ona toe lava le suau'u e auina atu i fafo pe afai e fa'asolosolo aga'i i lalo le aotelega o le popo e la'u mai mo lea fa'amoemoe e faifa'ato'aga i Samoa."

"O le isi mea e mafai ona fa'atula'ia, o le tatala lea avanoa i nisi malo tuaoi, e aofia ai Tokelau ma Amerika Samoa pe afai o tele ai le popo, ae tatau ona toe totoina vave le niu e faifa'ato'aga i le taimi nei."

O nei feutaga'iga uma sa faia i le fonotaga fa'apitoa sa usuia ma auai ai lea sui o Samoa, lea sa ia tatalaina ai lea fonotaga a le Coconut Industry Development of the Pacific, Train the trainers Program [CIDP-TTT]. O lea fonotaga e aotelega i ala e mafai ai ona fa'aleleia atili le tamaoaiga o atumotu uma o le Pasefika.

O le isi 5 tausaga, ua lu'ia nei le matagaluega ina ia toe fa'aosofia le fiafia o faifa'ato'aga e toe totoina le niu e tusa ma le 80-90 o niu fou, aua e tai 5 tausaga fa'ato'a matua le niu e fua mai ni ona fua. Peita'i ua tapena fo'i le malo ina ia latou totogia ponesi e toto ai e le aufaifa'ato'aga le niu ma ia tausi lelei ia olaola lelei ma fua tele mai.

O le fa'amoemoe, ia tele le popo i le isi 10 tausaga o lumana'i i le atunu'u. O le ponesi lea, ua totogia le faifa'ato'aga e toto le niu ma e totogia i latou i le niu e tasi e totoina ma tausia lelei. I tausaga ua te'a e $1.50 i le niu e tasi ma e ta'i ono masina ma totogia ponesi a le aufaifa'ato'aga ae asiasi lelei fo'i e le 'au pasi niu fa'ato'aga niu ia mautinoa le aotelega o au niu o toto ma tausi lelei.