Tala I Vaifanua

TA PALOLO OKETOPA 31, ASI OKETOPA 30 AE VAIVAI I TUTUILA

Ua fa'ailoa mai e le vaega a le Fisheries a le Matagaluega e Puipuia le Vaomatua ma le Gataifale o le aso 31 Oketopa, 2018, e ta ai le palolo.

Sa fa'ailoa mai e se sui o le Fishereis, "O le tausaga ua te'a e leai se Palolo na ta i Tutuila, peita'i sa matua tetele i le Manu'atele. Na la'u kula ma ulo ma isi mea uma na maua le tataga i le Manu'atele, ma sa maua mai ai lava nai tufa'aga mai le agalelei o aiga i le Motusa."

I lenei tausaga ua fa'ailoa mai na asia i le po o le aso Gafua, taeao segisegi o Oketopa 30, na maua le i'a ae vaivai. O lea ua toe fautuaina ai, asi lelei le i'a i le vaveao o Oketopa 31, afai lava e vaivai toe asi fo'i ia Novema 1, 2018. O le naunau lava i ai, e maua ai 'ai o le tai.

Ua toe fautuaina mai le mamalu lautele ta palolo, "Se toe fo'i i tu ma aga e tatalia ai le I'a i tausaga anamua, e faia lelei fa'asolo, saunia lelei sulu i ituaiga moli e umi le ola ma susulu malosi, ia manogi le matafaga e o'o i le tai le laga'ali, ula laumaile ma le moso'oi, o ula na e feso'ota'i lelei ma le fa'aosoga o le I'a mai le tai."

O le isi mea ua fa'ailoa mai, "O tausaga lava ua tuana'i e le fa'atauina lava le i'a. Ae o lenei vaitau, ua tetele taui ua maua e le vasega o tautai ona o le fa'atau atu o le i'a, o lea ua fautuaina ai, ‘Alofagia a tele sou faiva, ia fa'asoa nai vaega i nai ou tuaoi ma aiga e nonofo mamao mai vaega o le gataifale e ta ai le palolo’.”

Ua matauina e to'atele i latou o e fai va'a e malaga ia fagotaina mai le Palolo i le taimi e ta ai, ma o i latou fo'i ia e matele ina a'i lelei o palolo.

O le taimi tonu e ao ina amata ta ai le Palolo i Amerika Samoa o le 1:00 i le vaveao se'ia o'o lava i le 3:00 o asiasi pea e i latou i le tai.

O le taina o le Palolo ia Novema, ua le mailoa fo'i, peita'i, o le a fa'ailoa atu i se taimi o i luma.

$4 MILIONA TUPE FESOASOANI - MATAGALUEGA A'OGA & FALEMA'I

Ua fa’ailoa mai ai e le Ofisa o le ali'i o Doug Domenech o le Initeria e $4 miliona ua fa’atulaga mo le Matagaluega o A'oga, Falema'i LBJ Medical Center, Kolisi Tu'ufa'atasi a Amerika Samoa, ma le Vaega o Fa'amasinoga.

Ua fa'ailoa fo'i la le fiafia tele o le tama'ita'i Faipule o Amerika Samoa i le Konekeresi, Aumua Amata ona o lea tulaga, aua ua iloga lava le mana'omia lava ona fa'aauau o tautua i matagaluega ua fa'ailoa e aga'i i ai lea aotelega o le seleni ua toina mai.

"O se mea lelei le mautinoa lava o lo'o fa'atupe mai e le Initeria po'o vaega eseese fo'i o le Malo tele le tele o tautua eseese mo tatou tagata, ma ua fa'afiafiaina fo'i le loto ina ua mautinoa o lo'o fa'aauau mai tautua uma nei,” o se ala lea a Aumua.

O le vaevaeina o lea tupe: ASG $2,166,840.; LBJ $1,499,480.; ASCC $257,760.; ma le High Court $75,920.

"Fa'amalo i le galuega faifai pea i nei vaega o le tatou Malo, aua afai ae toina mai fa'atupega a le Malo tele i a outou matagaluega, ua iloga ai o lo'o fa'aauau pea ona faia a outou galuega ma le fa'amaoni,” o se toe fa'aopoopo mai lea a Aumua.

Ua ia fa'afetaia fo'i le tofa Fofogaosamoa Ryan Zinke, Doug Domonech ma Nikolao Pula mo le toe toina mai lea fo'i fa'atupega mo Amerika Samoa.

FA'ALUAINA AOFA’I O TUPE FETARLE MO AMERIKA SAMOA FY 2018

Ua fa'aluaina ma sili atu le aotelega o tupe mai le fetarale e ala i nisi o matagaluega ese a le malo tele mo Amerika Samoa i le tausaga fa’aletupe 2018 (FY 2018) pe a fa’atusatusa i le FY 2017.

O le tausasga fa’aletupe 2018 sa ma’ea ia Setema 30, 2018 ae ua o’o nei i le tausaga tupe fou, 2019 (FY 2019) - lea na amata ia Oketopa 1, 2018.

Fa’ailoa mai e le Faipule o Amerika Samoa i le Konekeresi, Aumua Amata, o le aotelega mo le tausaga fa’aletupe 2018 e $70.6 miliona e na'o le $34.9 miliona i le FY 2017.

Ua silia ma le $30miliona ua fa'ateleina ai le aofai o nei vaega tupe i le tausaga faaletupe 2018 nai lo le tausaga e 2017 ma ua matele ina fa'auia mai e le FAA ma le DOI po'o le Initeria.

O tupe mai le FAA e $23.3miliona mo le toe fa'aleleia o le malae va'alele, peita'i o le DOI sa latou fa'auia mai tinoitupe e lua $10.60miliona  ma le $9.61miliona mo le galueaina lava o le malae va'alele.

I le tausaga fa'aletupe 2017 e tasi lava le tinoitupe toina mai a le DOT e $10miliona mo le Malaeva'alele ia toe fa'aleleia atili le Malae e sese'e ai va'alele i Tafuna. Ua ese fo'i le tinoitupe e $1miliona mo le fa'aleleia o le malae e sese'e ai va'alele i Tafuna International Airport, ma ua i ai ma le isi tinoitupe e $500,000. ina ia fa'aleleia ai le malae sese'e o va'alele i Ofu ma le Malae $500,000. for mo le malae va'alele i Fitiuta. O isi tupe tetele na toina mai e le Malo tele o tinoitupe mo le Matagaluega o Alamanuia mo tagata lautele ma le matagaluega o le Soifua maloloina.

SAVAII O LE FAIA AI TA'AMILOSAGA FUSU PACIFIC GAMES 2019

I lipoti mai le malo o Samoa, ua fa’ailoa ai e fa’apea o le Ta'amilosaga Fusu a le Pacific Games i le 2019 - lea e talimalo ai Samoa - e faia i le motu o Savaii.

Saunoa le CEO o le Komiti Fa'afoe o Ta'aloga a le Pasefika, Hele Matatia, "O le a lava se mea lelei e fa'atino i le taligamalo i Savaii, o le leleiga fo'i lea o Samoa i lana taligamalo."

"O le tele fo'i o le tamaoaiga sasa'a atu i Savaii ona o lenei taligamalo, o le a aoga fo'i lea i le atina'e o le Motu Tele i Salafai. O lona uiga, o le una'ia o le fusu ia lelei a i latou uma e alaala i Savaii, o le lelei fo'i lea mo le taligamalo a Salafai. O lea fo'i faiga ua una'ia malosi ai lea o au ta'a'alo a i latou e alaala i Salafai ia matua malolosi lava aua se 'ai o Samoa i faipelega."

E tusa ai ma le tulaga taua tau nofoaga e alaala ai 'au ta'a'alo mai motu o le Pasefika, ae ua fa'ailoa e Hele Matatia, "Ua lava ma totoe le tele o faletalimali i Salafai mo lea fa'amoemoe."