Tala otooto o Faamasinoga

IOE SUI TAGO JR UMIA O FUALAAU FA’ASAINA O LE AISA

O le aso 28 o Novema 2018 lea ua fa’atulaga e tuu atu ai le fa’asalaga a le Fa’amasinoga Maualuga fa’asaga i le susuga a Sui Tago Jr, i le mae’a ai lea ona fa’amaonia e le fa’amasinoga o le moliaga e pei ona ta’usala ai o ia.

Na ulua’i molia e le fa’amasinoga ia Tago Jr, 40 tausaga le matua, i le moliaga mamafa o le umia faasolitulafono o vaega o le pauta fa’asaina o le aisa, o se solitulafono e mafai ona faasala ai o ia i le toese mo le umi e le itiiti ifo i le 5 tausaga, poo le faasala i le salatupe e le itiiti ifo i le $5,000.

Ae i lalo o le maliliega e pei ona sainia e Tago Jr ma le malo ma ua talia e le fa’amasinoga, ua malie ai le ua molia e tali ioe i le moliaga muamua lea ua toe teuteu e le malo, o le umia faasolitulafono lea o vaega o le pauta fa’asaina o le aisa, o se solitulafono e mafai ona faasala ai o ia i le toese mo le umi e mafai ona oo atu i le 5 tausaga, pe faasala i le salatupe e mafai ona oo atu i le $5,000, poo le fa’asala fo’i i fa’asalaga uma ia e lua.

I le tali ioe ai o Tago Jr i le moliaga e pei ona ta’usala ai o ia, na ia ta’utino ai e faapea, i se taimi o le aso 28 o Iuni, 2018 i Amerika Samoa, sa ia umia fa’asolitulafono ai se pepa iila sa tumu i vaega o le pauta fa’asaina o le aisa.

E pei ona taua i le maliliega e fa’apea, i le masina o Iuni na fa’atinoina ai e se vaega o Leoleo Suesue mai le Vice & Narcotics Unit a le Matagaluega o Leoleo se osofaiga i Tafuna, mo le sailia o fualaau fa’asaina.

O nofoaga sa aga’i i ai lea osofaiga e aofia ai le taavale pikiapu faapea ai ma se fale i Peseta. E to’atolu ni ali’i sa i totonu o le ta’avale pikiapu ina ua osofa’i e Leoleo i luma o se faleoloa i Tafuna. O i latou e to’atolu sa i ai i totonu o le ta’avale e aofia ai Misi Siua, o ia lea e ana le ta’avale, o se tasi fo’i o loo molia i lenei mataupu, faapea ai Tago Jr ma le isi ali’i na mulimuli ane toe tatala i tua e Leoleo.

Na saili e Leoleo le tino o Tago Jr ma maua ai se pepa iila o loo i ai vaega o le pauta o le aisa i totonu o le taga o lona ofu sa fai. Ina ua fesiligia e Leoleo ia Tago Jr poo ia mea o loo i totonu o le pepa iila, na tali le ua molia, o vaega o le pauta oona o le aisa.

E tele fa’aamatalaga na tuuina atu e Tago Jr e uiga i le pepa sa maua ia te ia, atoa ai ma le ta’avale sa latou malaga ai. Na taua e Tago Jr i Leoleo e fa’apea, o latou fa’atoa fo’i mai i Vaitogi, na latou o e momoli le fa’atau a se tasi o ali’i. E $100 le aofa’i o le fa’atau o fualaau fa’asaina a le ali’i mai Vaitogi, lea na latou o ma Siua e momoli.

Na taua atili fo’i e Tago Jr i Leoleo lona vaaia o se vaega tupe tele i totonu o le ta’avale a Siua. O le pepa aisa fo’i sa i totonu o lana taga, na foa’i fua atu e Suia ia te ia e aunoa ma se totogi. E le agta i lea, ua tusa ma le 4 masina talu ona ia fesoasoani ia Siua i le tulei atoa ai ma le fa’atauina atu o vaega o le pauta o le aisa i isi tagata. O le tele fo’i o taimi, e fa’aaoga ai e Siua lona fale i Petesa e fa’atau mai ai vaega o fualaau fa’asaina o le aisa.

O loo taofia pea Tago Jr i le toese i Tafuna e fa’atali ai le aso lea ua fa’atulaga e lau ai lana fa’asalaga.

IOSEFO N. SAGOTE

E 5 tausaga lea ua faanofovaavaaia ai e le Fa’amasinoga Maualuga se ali’i e 43 tausaga le matua, lea na maua i ai se vaega itiiti o le laau fa’asaina o le mariuana ina ua ia ulufale mai i Amerika Samoa i se taimi o le tausaga nei.

E leai se fa’asalaga fa’a falepuipui na tuuina atu e le fa’amasinoga i le ali’i o Iosefo N. Sagote, se’i vagana ai le poloaina o ia e totogi le salatupe e $2,000.

Na ulua’i tu’uaia e le fa’amasinoga ia Sagote i le moliaga mamafa o le umia fa’asolitulafono o vaega o le laau fa’asaina o le mariuana, o se fa’asalaga e mafai ona faasala ai o ia i le toese mo le umi e le itiiti ifo i le 5 tausaga, pe faasala i le salatupe e le itiiti ifo i le $5,000.

Ae i lalo o le maliliega lea ua sainia e Sagote ma le malo, ua malie ai o ia e tali ioe i le moliaga lea ua toe suia e le malo, le moliaga o le umia faasolitulafono o vaega o le laau fa’asaina o le mariuana, o se solitulafono e mafai ona faasala ai o ia i le toese mo le umi e mafai ona oo atu i le 5 tausaga, poo le salatupe e mafai ona oo atu i le $5,000, poo le fa’asala fo’i i fa’asalaga uma ia e lua.

I lona tali ioe ai, sa ia ta’utino ai e faapea, i se taimi o le masina o Ianuari o le tausaga nei, sa ia umia faasolitulafono ai se vaega laititi o le laau o le mariuana, ina ua ia ulufale mai i le teritori i le malae va’alele i Tafuna.

Ina ua maua lona avanoa mai le fa’amasinoga, na fa’atoese ai Sagote e tusa ai o lana solitulafono sa faia, ma ia talosagaina ai se isi avanoa mo ia se’i fa’aauau ai pea lana tausiga i lona aiga. Na tautino le ua molia e fa’apea, na te le toe solia se tulafono a le malo.

Na faapipi’i atu i le fa’atoesega a Sagote le talosaga a lana loia fautua ia Marcellus T. Uiagalelei, ina ia fa’asala le ua molia i se fa’asalaga fa’anofovaavaaia, e aunoa ma le tuuina atu i ai o se fa’asalaga fa’a falepuipui. Na taua e Uiagalelei i lana fa’afinauga e fa’apea, o le taimi muamua lea ua ta’usala ai Sagote i se solitulafono, o ia o se ali’i e galue malosi mo le tausiga o lona aiga, e le tele fo’i se vaega o le laau faasaina o le mariuana na maua i totonu o lana ato.

Na lagolagoina e le loia a le malo ia Christy Dunn le fa’afinauga ina ia fa’asala Sagote i se fa’asalaga faanofovaavaaia e aunoa ma lona tuliina o se taimi i le toese i Tafuna.

E tasi le tausaga i le falepuipui ma le salatupe e $5,000 na manatu le fa’amasinoga e faasala ai Sagote, ae ina ua mae’a ona fa’afofoga le fa’amasinoga i talosaga ma fa’afinauga a itu e lua, na manatu ai loa e faanofovaavaaia le ua molia mo le 5 tausaga i lalo o tuutuuga e usita’i ia i.

O ni isi o ia tuutuuga e aofia ai lona totogi o le salatupe e $2,000, aua ne’i ona toe tagofia fualaau fa’asaina poo le ‘ava malosi, ma ia tausisi i tulafono uma a le malo i soo se taimi.