Toe fa’asala fo’i e le Faamasinoga Lewis Lokeni i le falepuipui i Tafuna

O le ali’i e 31 tausaga le matua lea na fa’asala e le fa’amasinoga i se fa’asalaga fa’a falepuipui i le 2013 ina ua ta’usala o ia i lona faia o uiga le taupulea i se teineititi e 14 tausaga le matua, ua toe fa’asalaina nei o ia i le falepuipui mo le umi e 5 tausaga, ina ua fa’amaonia e le fa’amasinoga le moliaga o lona umia fa’asolitulafono o vaega o le pauta fa’asaina o le aisa.

O le aso Faraile o le vaiaso na te’a nei na lau ai le fa’asalaga a Lewis Lokeni i luma o le Fa’amasinoga Maualuga.

O le afioga i le ali’i Fa’amasino Sili ia Michael Kruse na iloiloina le fa’asalaga a Lokeni, ae lagolagosua afioga i ali’i Fa’amasino Lagolago ia Faamausili Pomele ma Muasau T. Tofili.

E 2 tagi na faila e le malo fa’asaga ia Lokeni. I le tagi muamua, o loo molia ai o ia i le moliaga mama o lona faia lea o uiga e ono lamatia ai le saogalemu o fanau laiti. O lea mataupu o loo faagasolo pea lona iloiloina i luma o le Fa’amasinoga Fa’aitumalo.

I le tagi lona lua, na molia ai e le malo le ua molia i le moliaga mamafa o lona umia faasolitulafono lea o le pauta faasaina o le aisa. O lea mataupu ua mae’a ona ta’usala ai e le fa’amasinoga ia Lokeni i le moliaga o le umia faasolitulafono o le pauta o le aisa.

O le ta’usala ai o Lokei i lona umia faasolitulafono o fualaau faasaina, ua atagia mai ai lona le usitaia o tuutuuga o lana nofovaavaaia sa tuuina atu i le 2013. E lua mataupu na fa’asala ai Lokeni i le aso Faraile na te’a nei, e le gata o le mataupu i lona umia faasolitulafono o vaega o fualaau faasaina, ae faapea fo’i ma le mataupu e pei ona ta’usala ai o ia i lona le usitaia o tuutuuga o lana nofovaavaaia.

Ina ua maua lona avanoa e fa’atoese ai i le fa’amasinoga, na talosagaina ai e le ua molia se isi avanoa e toe fo’i atu ai i lona aiga e tausi lona atalii. Sa ia faatoese i le fa’amasinoga e tusa ai o lana solitulafono, ma ia talosagaina ai se isi avanoa se tasi mo ia.

Na taua e Lokeni e faapea, i masina e 4 talu ona taofia o ia i le toese, ua ia aoaoina ai se lesona taua mo lona olaga, ua ia manatu e aoga mo lona lumana’i. Na ta’utino Lokeni i le fa’amasinoga e fa’apea, ua ia iloa le leaga o le solitulafono, e le gata ua valavala ai ma lona aiga, ae ua tele ai fo’i aso o lona olaga ua ma’imau i le falepuipui.

Na ia ta’utino i le fa’amasinoga, na te le toe solia lava se tulafono. O le a ia taumafai fo’i e taumamao mai le fa’afitauli o le tagofia lea o fualaau fa’asaina.

Na finau le loia a Lokeni ia Michael White e fa’apea, o le ua molia o se Tama talavou e aafia o ia i le faafitauli o le tagofia o fualaau faasaina. O lea fa’afitauli, e le mafai ona taofia sei vagana ua togafitiina o ia. Na finau White mo se faasalaga faanofovaavaaia, ina ia mafai ai ona maua e le ua molia le avanoa e toe fuata’i ai se taeao fou mo lona olaga.

Ae mo le isi mataupu e pei ona faamaonia e le fa’amasinoga fa’asaga ia Lokeni, i lona le usitaia lea o tuutuuga o lana nofovaavaaia sa tuuina atu i le 2013, na talosaga ai White ina ia tuli fa’atasi le faasalaga mo le mataupu fou, ma se faasalaga a le fa’amasinoga e tuuina mai mo le mataupu o le 2013.

E lei finau le loia a le malo ia Christy Dunn mo se fa’asalaga, ae sa ia faailoa i le fa’amasinoga, ina ia talia le fautua ua mae’a ona faataoto e le Ofisa Faanofovaavaaia i le latou ripoti ua mae’a ona folasia i luma o le fa’amasinoga.

E pei ona saunoa Kruse e fa’apea, pe tusa o le itula e 11:55 i le taeao o le aso Lua o le vaiaso nei, a o taumafai pea Leoleo e tau saili le ua molia, na fa’afuase’i ai ona vaaia o ia o loo nofonofo i luma o se faleoloa i Fagaima, ma latou pu’e fa’apagota ai loa o ia.

Ina ua mae’a ona loka lima o Lokeni, sa faia muamua i ai e Leoleo se suega i lona tino ina ia mautinoa ai, na te le o tauaveina ni a’upega e ono a’afia ai se soifua o Leoleo. I le taimi o lea suega, sa maua ai e Leoleo se sikaleti mariuana ua uma ona taai i le taga o lona ofu, faapea ai ma se paipa tioata e ula ai le pauta o le aisa.

I totonu o le paipa tioata, sa maua i ai e Leoleo vaega o le aisa o loo totoe ai. Sa faia se suega i le sikaleti ma le pauta sa i totonu o le paipa tioata ma faamaonia ai, o le mariuana ma le aisa mea ia na maua i le tino o le ua molia.

Na musu Lokeni e fai sana fa’amatalaga i Leoleo ina ua fesiligia o ia. Pau lana tala sa tuuina atu i Leoleo, “O le a le aoga e koe fai ai se kala, ua maua a’u.”

Mo le moliaga o le umia faasolitulafono o vaega o le pauta faasaina o le aisa, e 5 tausaga le ua faasala ai e le fa’amasinoga le ua molia i le toese i Tafuna.

Ae mo le mataupu i lona le usitaia o tuutuuga o lana nofovaavaaia, e le i faaleaogaina e le fa’amasinoga tuutuuga o lana nofovaavaaia, ae ua faaopoopo i ai le tuutuuga faapitoa e tasi, o le faia lea o ni suega i lona tino i soo se taimi ina ia faamaonia ai, na te le o toe tagofia vaega o le pauta fa’asaina o le aisa.

Saunoa atili Kruse e fa’apea, o Lokeni, o se tagata e matua lamatia ai lava le saogalemu o fanau laiti. E mafua lea manatu o le fa’amasinoga, ona o le teineititi lea na a’afia i le solitulafono a le ua molia i le 2013, e na o le 14 tausaga le matua, ae o le mataupu fou e pei ona molia ai nei o ia, o lona atali’i e tasi le tausaga le matua lea na a’afia i lana gaioiga.

E le o se taimi muamua lenei ua tula’i ai Lokeni i luma o le fa’amasinoga. I le tausaga e 2013, na fa’asala ai e le Fa’amasinoga Maualu Lokeni ma isi ali’i e to’atolu e taofia i le falepuipui mo le umi e ta’i 28 masina, e mafua mai ina ua ta’usala i latou e le fa’amasinoga i le moliaga o le faia o uiga mataga faafeusuaiga fa’asaga i se tama’ita’i e 13 tausaga le matua.