Molia se ali’i i lona faia o uiga mataga i se teineititi 15 tausaga

E 41 tausaga o se ali’i mai Tafuna ua molia nei i lona faia o uiga le taupulea i se teineititi e 15 tausaga le matua.

O le vaiaso na te’a nei na tula’i ai le ali’i o Valaau Sione i luma o le Fa’amasinoga Fa’aitumalo. Sa tula’i mo ia le ali’i loia fautua lagolago ia Ryan Anderson, ae o le ali’i loia sili lagolago ia Jason Mitchell na tula’i mo le malo.

O loo tu’uaia e le malo ia Sione i moliaga mamafa e 6 e aofia ai moliaga e 2 o le faiaiga ma se teineititi e laititi i lalo o le tulafono; 2 moliaga o le tagofia o itutinosa, ma moliaga e 2 o le faia o uiga le taupulea i se teineititi talavou. O loo tuuaia fo’i o ia i le moliaga mama e tasi o lona faia o gaioiga e ono lamatia ai le saogalemu o fanau laiti.

E $50,000 lea ua faatulaga e totogi ona fa’atoa mafai lea ona tatala le ua molia i tua mai le toese i Tafuna. Afai ae mafai ona tatala o ia i tua, ua faasa ona ia toe taumafai e faafesootai le teineititi o loo a’afia i soo se auala, poo lona taumafai fo’i e fa’afeso’ota’i nisi o lona aiga. Ia auai i soo se taimi e valaau ai lana mataupu, ma ia fesoota’i vava lalata ma lana loia.

Ua poloaina o ia ina ia tuuina atu lona tusi folau e taofi e le loia a le malo, ma ia aua ne’i taumafai e sola ese ma le atunu’u i soo se auala.

O le mataupu lenei na tofu atu i le Ofisa o Leoleo, ina ua talosagaina e le Tina o le teineititi na a’afia se fesoasoani a Leoleo, fa’asaga ia Sione i lona faia o uiga le taupulea i lana tama.

Na taua e le Tina i Leoleo, e fa’alua ona faia e le ua molia uiga le taupulea i lana tama, ae o lana tama e lei atoa lona 18 tausaga le matua. O popolega foi o le Tina, ona e le mamao ese atu mai lo latou fale ma le fale e nofo ai Sione.

E tusa ai o fa’amatalaga na mafai ona maua e Leoleo i le latou suesuega e fa’apea, o le afiafi o le aso 9 o Setema pe tusa o le itula e 6:35 na o ai le teineititi na aafia ma lona tuagane e 8 tausaga e fa’atau i le faleoloa.

Ae ina ua toe fo’i mai le fa’atauga, e na o le tamaititi e 8 tausaga na alu i le fale ae ua leai lona tuafafine. Na fesili le Tina i lana tama e 8 tausaga poo fea o i ai lona tuafafine (le ua molia) ae na tali le tamaititi, “o loo talanoa ma Spunky i luma o le auala”.

O Spunky o le igoa tau valaau lea a Sione ua iloa ai o ia e le tupulaga ma le latou nu’u.

Na tuli e le Tina lana tama e 8 tausaga e alu e fai i lona tuafafine e alu atu i le fale, peita’i e taunu’u ane le tamaitiiti i luma o le auala na ia iloa ai, ua leai lona tuafafine ma Spunky.

Na fiu le Tina e saili lana tama teine i le afiafi lea ua le maua, ae o le te’a laititi o le 7:12 i le afiafi lava lea, ae aga’i atu loa le teineititi i le fale. Sa fesiligia o ia e lona Tina poo fea sa i ai, ae na tali le teineititi, sa la eva ma Sione i lana tama’i fale (shack) o loo i totonu o lona ma’umaga.

Ina ua fesiligia e Leoleo, na fa’amatala e le teineititi e fa’apea, o le masina o Iulai o le tausaga nei na amata mai ai le la faigauo ma Sione. O nisi o taimi e avatu ai e Sione tupe ma meaai ia te ia.

I le masina o Aokuso o le tausaga nei, na la tafafao ai ma Sione i totonu o lana tama’i fale i totonu o lana ma’umaga, ma o iina na faia ai e Sione uiga le taupulea fa’aleulugali’i ia te ia.

O le taimi lona lua na faia ai e Sione uiga ia ia te ia, o le afiafi o le aso 9 o Setema, ina ua la fetaui i luma o le auala, ma ia tauanauina ai loa o ia la te o i tua o lona fale, ma ia toe faia ai fo’i uiga le taupulea fa’aleulugali’i ia te ia.

Ina ua fesiligia e Leoleo ia Sione, sa ia ioeina ai lona faia o uiga mataga i le teineititi na a’afia. Sa ia taua e fa’apea, na te iloa lelei lava e 15 tausaga o le teineititi lea, peita’i, sa malie lava o ia i gaioiga uma sa la fa’atinoina.