Feiloa’iga ma Sui Tauva mo le Tofi Sui Aoao i le Konekeresi i Kolisi Tuufaatasi o Amerika Samoa

 – Matagaluega Fa’alea’oa’oga o Mataupu tau Pisinisi

O upu lava e fai i le faiva o le gataifale e faapea: o le a matou lē toe ta i utuma’au, pe fālō le ‘afa loloa i o outou paia sausaugatā, aua o le i’a e iviivia, o le fue lavelave ma le vao filifili. Taoto la faamaene i le tai loloto mamalu ia, aua e le o matou ni tufuga upu o le vāogagana o le atunuu, matou te toe atofuli fa’a-lē-atoa le maota o le atunuu ua soo lona ta’iao ma e tulutulu i tao, tulou. Nu’unu’u la paia ia, i le ‘au talaia ma tootoo au o le atunuu, o la latou nafa tausi vaatele lea, e puipui malu i paia faataotooto o le atunuu.

Ae o le a faga tonu le ū o le tologa i le niusina ma ifo le tuamafafilimalae o le manulautī o lenei faasalalauga.

Ua ta’oto nei i lagatonu le fetu’una’iga o le muniao i le tōfā liuliu ma le faautaga sa fesoua’i faamuli auma eseese i le Matagaluega Fa’alea’oa’oga o Mataupu tau Pisinisi ae maise ai le faalapotopotoga o tagata aooga ua tā’ua o le BAOA (Business Ambassadors of American Samoa), ina ia valaaulia aloa’ia le mamalu o le atunuu mo se faamoemoe tatou te umufono talatala ai ma ulu mea fatu fala i le Kolisi Tuufatasi o Amerika Samoa i le Aso Lua o Oketopa 23, mai le 12:30pm i le 1: 50pm i le Multipurpose Center (MPC) i totonu lava o le laumua. O le a maua le avanoa e feiloa’i ai ma sui tauva, e pei o le Afioga i le Sui Aoao ia Aumua Amata Coleman-Radewagen, faatasi ai ma le Susuga i le Sui tauva ia Tuika Tuika Jr., faapea ma le Susuga i le Sui tauva ia Meleagi Suitonu-Chapman. O lenei faamoemoe ua faaigoaina o le “Fofoga mo a Taeao” ma o le a fesiligia ai sui tauva ta’itasi mo le Tofi o Amerika Samoa i le Fono Faitulafono o Upu Fai o le Mālō o le Iunaite Setete.

O le tatalo, ia mamao ni tuātāfalu ma ni laumea e toli e le savili i lo outou soifua, ina ia maua ni uafa’alanumā’ave’ave e laei ai ni manatu mo le faamoemoe mo a tatou sui tauva i le Konekeresi, ma ia tafia ala o manū ae tu’ua laulelei o manū, tatou te laulua fesilafa’i ai i vaelupe maua i lea aso atofaina.

Afai e iai se fesili mo lea faamoemoe, faamolemole telefoni mai i le Kolisi Tuufaatasi o Amerika Samoa i le numera e 699-9155, ona fesili lea ia Dr. Faofua Faatoafe poo le fa’afeso’ota’i fo’i i le numera telefoni faapitoa e 382.

Ua faia lenei faasalalauga ma le ava tele, faafetai.