Falepuipui le sa avea ma pule o le Ofisa o le McConnell Dowell

O le vaiaso nei lea na tu’uina atu ai e le fa’amasinoga maualuga lana fa’asalaga fa’a falepuipui fa’asaga i le tama’ita’i sa avea ma Pule o le Ofisa o le kamupani a le McConell Dowell, lea na ta’usala i lona ave fa’agaoi lea o tupe a le kamupani.

E 28 masina na manatu le fa’amasinoga e fa’asala ai Fonotaga Jasmine Fa’anu i le toese i Tafuna, peita’i o le a fa’amalumalu lona tuliina o le 12 masina, ae o le a tuli na o masina e 8 i le toese, e aofia ai ma le silia i le 4 masina lea na taofia ai o ia i le falepuipui e fa’atali ai le lauina o lana fa’asalaga.

Na fa’atoese ma loimata Fa’anu i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i lona aiga e tausi si ana fanau laiti e to’a 5, ma fesoasoani i lona to’alua i le tau atina’eina o le aiga.

Sa ia fa’atoese fo’i i le kamupani sa galue muamua ai o le McConnell Dowell, o lona nu’u o Masefau ma lona aiga, aemaise ai tagatanu’u o Amerika Samoa.

Na taua e le ua molia e fa’apea, e le o ni faalagona lelei le aumau ai i le toese, aemaise lava le misia o le mafutaga ma si ana fanau. Sa ia taua lona aoaoina o se lesona taua mo lona olaga, lea ua avea ma oso lelei mo ia i le lumana’i.

Na maua foi le avanoa e molimau ai lona uso matua i luma o le fa’amasinoga. Na taua e lona uso matua e fa’apea, o ia o loo tausia le fanau e to’a 5 a Faanu talu mai lava le taimi na taofia ai o ia i le falepuipui.

Sa ia taua fo’i tulaga faigata o loo feagai ma ia i le tausiga o le fanau a le ua molia, ona e i ai taimi e mana’omia ai lona malaga atu i fafo mo ana talavai. Sa ia talosagaina le fa’amasinoga mo se avanoa e vave ai ona tatala atu le ua molia i tua e tausi lona aiga ma lana fanau.

Na finau le loia fautua a Fa’anu ia Richard deSaulles i le fa’amasinoga ina ia fa’asala le ua molia i se fa’asalaga faanofovaavaaia, e aunoa ma le toe tu’uina atu i ai o se fa’asalaga faa falepuipui.

Nataua e deSaulles e fa’apea, o Fa’anu, o se Tina talavou e 25 tausaga le matua, ua ia lagona le salamo moni mai lana mea sese sa faia. O ia o se tagatanu’u e le i solitulafono muamua, e le o se tagata fo’i e ono lamatia ai le saogalemu o tagata lautele pe a tatala mai i tua.

I le tulaga o le tupe e toe totogi i le kamupani, na faamanatu e deSaulles i le fa’amasinoga tuutuuga o le maliliega aufa’atasi a Fa’anu ma le malo, lea na tali ioe ai le ua molia i lona ave faagaoi o siaki e 2 a le kamupani.

E tusa ai o le fa’afinauga a deSaulles, toe $3,225.65 le tupe e tatau ona totogi e Fa’anu i le kamupani, ona o lea ua mae’a ona ia toe totogi le isi vaega o le tupe, peita’i, afai e manatu le kamupani o loo tele le tupe o loo aitalafu ai Fa’anu, e i ai le avanoa latou te finauina ai lea mataupu i luma o le fa’amasinoga o mataupu savili.

E le i finau le loia a le malo ia Christy Dunn mo se fa’asalaga mamafa mo Fa’anu, ae sa ia manatu e taoto atu pea i le pule faito’atasi a le fa’amasinoga. Sa ia lagolagoina fo’i le tulaga e pei ona finau ai le loia a le ua molia, i le maua lea o le avanoa o le kamupani na a’afia e faila ai sa latou talosaga i le fa’amasinoga, pe afai latou te manatu e tele le tupe o loo nofo aitalafu ai Fa’anu i le kamupani.

Mai moliaga e 44 na tu’uaia ai e le malo ia Fa’anu, e na o le 2 moliaga ua ta’usala ai o ia, ae o isi moliaga e 42 sa totoe ai ua solofua e le fa’amasinoga. O moliaga e 2 o le gaoi atoa ai ma lona faia o faamaumauga tau fa’asese.

E ta’i tausaga na manatu le fa’amasinoga e fa’asala ai Fa’anu i le moliaga e tasi i le toese, peita’i o le a fa’amalumalu lea faasalaga, ae ua faanofovaavaaia o ia mo le 7 tausaga i lalo o tuutuuga e ao ona ia usita’i i ai.

O ni isi o ia tuutuuga e aofia ai lona tuliina o le fa’asalaga faa falepuipui i le toese, atoa ai ma lona totogiina o le tupe e $3,225.65 i le kamupani na a’afia.

O le afioga i le ali’i Fa’amasino Sili lagolago ia Elvis P. Patea na fofogaina le fa’asalaga a Fa’anu, lagolagosua i ai afioga i ali’i Fa’amasino Lagolago ia Satele Lili’o Satele ma Suapaia Pereira.

O le mataupu lenei na tofu atu i le Ofisa o Leoleo, ina ua logo e se sui o le Faletupe o le ANZ Bank le sui o le kamupani o le McConnel Dowell, e fa’atatau i se tagata faigaluega sa ia taumafai e faaliliu tupe se siaki e silia i le $9,000 a le kamupani.

I suesuega sa faagasolo e uiga i lenei mataupu na iloa ai, e silia i le $400,000 le tupe a le kamupani ua leiloa mai gaioiga fa’asolitulafono a Fa’anu sa faia. Na faailoa e Faanu i se ali’i suesue mai Niu Sila e fa’apea, o se vaega o le tupe sa faaaoga e faafou ai lona fale ae o le isi vaega sa tufatufa atu i uo ma aiga.