Tala I Vaifanua

SUI O LE CDC - TUTUFA'ATASIA SUESUEGA MANA'OMIA GASEGASE TUMAU

E toalua tama'ita'i mai le Ofisa o le CDC, i lona vaega o suesuega fa'apitoa i gasegase tumau [Chronic Diseases], i lo’o iinei e aga'i i le fa'atinoga o le suesuega o lo'o nafa ma le DOH ma le DHSS, ina ia mautu aotelega o le aofai o tagata o lo’o a'afia i gasegase tumau.

O gasegase e aofia ai Ma'i Suka, Ma'i Fatu, Kanesa o so'o se ituaiga, Gugu, Fatuma'a ma le Fa'amama o le Toto ma isi ma'i fita fa'apena.

 O i la'ua nei o Omoye Imoisili MD/MPH ma Mays Shamout e sailia togafitiga atoa ai ma fa'amaumauga ma suesuega e tusa o nei ituaiga o gasegase. O le la'ua fo'i o'o mai, ua galulue fa'atasi ai ma le Matagaluega o le Soifua Maloloina [DOH] lea e nafa ma le aoina o fa'amaumauga mai tagata uma o le atunu'u,e fa’afia i nei gasegase.

Na amata fa'atautailua le suesuega lenei ua asia mai e nei sui o le CDC ia Aukuso 2017, peita'i sa fa'atulaga ina ia o'o mai ia Tesema 2018 ua tatau ona mae'a.

O se suesuega e ala ona faia ina ia fa'amatu'u mai fo'i nisi fesoasoani mai le CDC, ma fa'aaogaina fo'i mo lipoti i le WHO ina ia maua mai nisi togafitiga ma ni fa'atupega e talosagaina fo'i mo galuega tima'i e fautuaina ai le atunu'u.

E leai ni fa'amaumauga tele o lo'o mana'omia, ae na'o na mautinoa ua sa'o lelei lou suafa, le aofa'iga o ou tausaga, lou aso soifua ma lou numera falemai pe afai e i ai, lou mamafa ma gasegase o lo'o e inu vai ai mo togafitiga.

Afai fo'i e te malaga mai e faia au talavai masani i le Falemai o le LBJ i Faga'alu po'o se isi lava o falema'i fa'aitumalo, o lo'o ua taua'aoina ia te oe le suesuega pu'upu'u ina ia maua lelei fo'i au fa'amaumauga i lea suesuega.

O le suesuega muamua sa mua'i faia mo le CDC na mae'a faia i le tausaga e 2004, ma ua agatonu ai ona faia le isi suesuega lenei mo ni fa'amaumauga fou.

O lea suesuega ua fa'aigoaina NCD Hybrid Survey, ma e tele fo'i le aoga o lenei suesuega pe a mae'a lelei ona fa'atautaia.

E lua ituaiga o suesuega o lo'o fa'atautaia mo le NCD - o le isi e na'o talia lava o fa'afesili ae fa'amaumau e le au suesue au tali, ma le isi suesuega e lua i ai, e faia fa'atasi lau suesuega fa'atumu pepa ma fua ou pauna ma lou suka ma le toto, fa'amaumau ma au fuala'au o lo'o inumia mo togafitiga o ou gasegase o e talavai ai.

O le suesuega lona lua la lea, e maua mai le pepa e fa'amaumau ai ou tui ma le maualuga o lou suka ma le toto fo'i. I se isi tala matagofie, e i ai taimi e mafai ai ona maua nai meaalofa iti mai le au suesue, mo i latou e fa'atautaia ai suesuega, i le vaega lua lea, ae le o se mea taua lena taui.

Afai o le a maea atoa le atunu'u i le suesuega lenei a le NCD, o le a toe fa'alauiloa atu le i'uga fa'atasi ai ma le aotelega o le a fa'amauina, pe o fa'ateleina pe ua fa'aitiitia le faitau aofai o i latou ua maua i nei fa'ama'i, talu mai le suesuega na faia 15 tausaga talu ai.

GAOSIA O LE TUIGA - MEASINA A SAMOA - FA'AALIGA I NIU SILA

I le tasi o laulau na faia o latou sao i le SOS - Polokalama mo Aiga o Fitafita ua maliliu i le VA Cener i Tafuna i le aso Gafua na te'a nei, o le sao lea o le afioga Tuifa'asisina Korina Seiuli Lee i le gaosiga o Tuiga mo Tausala & Manaia Samoa.

Na tutula'i le tama'ita'i ma ia fa'alauiloa, "O lenei tofi, e le'i tausailia fua, ae ona ua agaga e fa'atautaia le Ausiva a le talavou ‘Tausala Manaia Dance Production,’ na mafua ai ona faliu ane e saili se tomai e fausia ai tuiga mo le fanau ina ia mafai ona sausaunoa ma o latou tuiga e taualuga ai fa'afiafiaga."

"Ua avea lea ma ala ua faia ai ma le sailiga tonu, o le uiga ma le agatonu o lou fa'aaogaina o le Tuiga i lau sausaunoaga. Ua iloga e tatau i ai le Tuiga, ua fa'alagi fo'i le mamalu o suafa e auga i ai le Tuiga pe afai e tupuga mai ai le fanau o le a sauni mo le taualuga."

"Ua mautinoa le titi faitama o le pa'ia o aiga, i so'o se taimi e sausaunoa ai o latou alo e taualuga fa'afiafaiga a le Taupou Manaia, ma e le'i i ai lava se taimi ua o'o mai ai se fa'asea a se isi e tusa o le fa'aaogaina o suafa Augafa'apae o latou aiga i a latou fanauiti. Ua mautinoa ai, e tusa lava po'o le a le laiti o fanau sa latou tau'avea le Tuiga i fa'afiafiaga, ua agatonu lea measina ia i latou, e tautoto i latou i suafa ma tiute ua latou taumafai e fa'atino,” o se tala lea a Tuifa'asisina.

Lona lua loa o Tuiga o le "Tuiga Fatu." E matua nonoa le fa'apatu e le tausala ma ia fa'aumi aga'i i luga, e fatufatu aga'i i ai le tuiga, ae mana'omia fo'i le matua mau lava o le fa'apatu lea, ina ia le pa'u ese le tuiga pe a siva le tausala po'o le manaia.

O lea ituaiga o Tuiga, ua fa'ailoa mai e le Fale Mata'aga i Niu Sila, ua fa'akonekarate nei le Tausala Manaia Productions ina ia latou tapena atu e fa'amatala, fausia ma ia tu'uina ai le Tuiga Samoa i totonu o le latou Falemata'aga i Ueligitone, Niu Sila.

Ona o le a atoa i le tausaga fou fo'i le 20 tausaga o le Taupou Manaia, o lea ua fa'ailoa ai e le tama'ita'i sa ia amata mea lelei i lea ausiva, Tuifa'asisina "E ui ina le'i faigofie le folauga a le Taupou Manaia Production mai lona amataga mai se'ia o'o mai i lona 20 tausaga ua savalia nei, ae ua ou iloa ai le agalelei o le Atua, lona alofa e le tu'ua ai a'u ma le fa'amoemoe o lenei ausiva ina ia fa'aauau pea ona fa'amausali Measina a Samoa e tusa o aga o Fa'afiafiaga a Samoa ma mea uma e fa'aaogaina ai!

I le folasaga i lea aso i le SOS Polokalama mo Aiga Pele, sa fa'ata'ita'ia ai le gaosiga o le Tuiga Fatu fa'atasi ai ma le fa'atinoga o lona fa'aaogaina i le sausaunoaga a le tama'ita'i tausala ua la'eia le Tuiga.

"O le Tuiga o le Mamalu ma le Matagofie lea o Tausala ma Manaia Samoa. O le fa'amau fo'i lea o le fa'aeaga ua se'ei ai se Manaia po'o se Taupou i lona aiga, ma e talafeagai fo'i ma le tama'ita'i e amio pulea, fa'aaloalo ma le mata'u tele i so'o se tulafono a le afio'aga ma aiga.”