Ioe Okesene Alo i lona faia o uiga mataga i se teineititi

O le ali’i Leoleo lea sa tumau pea lona tete’e i tu’uaiga o lona faia lea o uiga mataga i se teineititi e i lalo o le 16 tausaga le matua na galue i le Falepuipui o Tamaiti i Tafuna (JDC), ua ia ta’utino i le Fa’amasinoga Maualuga, e moni ma fa’amaoni tu’uaiga fa’asaga ia te ia.

O le vaiaso fou lea na fa’atulaga e amata aloaia ai le fa’amasinoga iloilo a Okesene Alo, talu ai o lona teena o le tagi a le malo fa’asaga ia te ia, peita’i o le vaiaso nei na fa’ailoa ai e loia a itu e lua, le mae’a lea ona latou sainia o se maliliega e fa’amuta ai lenei mataupu.

Na ulua’i tu’uaia e le malo ia Alo i moliaga mamafa e 3 e aofia ai le faiaiga fa’amalosi ma se teineititi e i lalo o le 16 tausaga, moliaga o le faia o gaioiga mataga fa’afeusuaiga, fa’apea ai ma lona tagofia o itutinosa o se tama’ita’i e laititi i lalo o le tulafono.

Ae i lalo o le maliliega na sainia e Alo ma le malo, ma ua talia fo’i e le fa’amasinoga maualuga, ua malie ai le ua molia e tali ioe i le moliaga lona lua, o lona faia lea o uiga mataga i se tama’ita’i laititi.

I lona tali ioe ai i le moliaga lona lua, na ta’utino ai Alo e fa’apea, i se taimi o le aso 21 o Me, 2016, a o galue ai o se Leoleo i totonu o le JDC i Tafuna, sa ia faia ai ni uiga mataga i se teineititi e i lalo o le 16 tausaga le matua, e ala i lona tagofia lea o lona itutinosa. Na ta’utino atili le ua molia e fa’apea, o lana gaioiga sa faia i lea aso, sa le tusa lea ma ala o le tulafono.

O le ali’i loia ia Richard deSaulles mai le Ofisa Loia a le RDA o loo tula’i mo Alo, ae o le tama’ita’i loia sili lagolago ia Christy Dunn o lo o tula’i mo le malo i lenei mataupu.

E 2 tagi eseese na faila e le malo fa’asaga ia Alo. O le tagi muamua, sa tu’uaia fa’atasi ai Alo ma isi Leoleo e to’a 3 mai le JDC i moliaga eseese e aofia ai le umia fa’asolitulafono o fualaau fa’asaina, atoa ai ma le fesoasoani e fa’asosola i tua tamaiti pagota sa i lalo o le latou vaavaaiga.

O le masina o Iuni o le tausaga nei na fa’ataunu’u aloaia ai le fa’amasinoga autu a Alo e tusa ai o le tagi muamua a le malo fa’asaga ia te ia. O le fa’aiuga o lea fa’amasinoga iloilo, na ta’usala ai o ia e le vaega iloilo iuga i moliaga e 7, lea e aofia ai moliaga mamafa e 4, fa’apea ai ma moliaga mama e 3. O le aso Faraile o le vaiaso nei, Setema 28 lea na fa’atulaga e le fa’amasinoga e lau ai le fa’asalaga a Alo e tusa ai o le mataupu e pei ona ta’usala ai o ia.

Mo le tagi lona lua fa’asaga ia Alo, o le vaiaso fou lea na fa’atulaga e faia ai lana fa’amasinoga autu, peita’i, ua le taunu’u lea fa’amasinoga iloilo, ona o lea ua malie le ua molia e talia le ofa sa tu’uina atu e le malo ia te ia.

O le mae’a ai ona talia e le fa’amasinoga maualuga o le tali ioe a Alo, na fa’atulaga ai loa ma le aso 2 o Novema, 2018 e lau ai lana fa’asalaga, peita’i na talosaga ia Dunn, pe mafai ona toe tolopo le lauina o le fa’asalaga a Alo lea na fuafua e faia i le vaiaso nei, e lau fa’atasi ma lana fa’asalaga lea ua fuafua mo le aso 2 o Novema.

Na talia e le afioga i le ali’i fa’amasino sili ia Michael Kruse le talosaga a loia mai itu e lua.

E pei ona taua i le tagi a le malo e fa’apea, e to’alua tama’ita’i e i lalo o le ta’i 16 tausaga le matutua na taofia i le JDC na a’afia i gaioiga a le ua molia.

O lenei mataupu na alia’e mai ina ua fa’amaonia i se suega sa faia e Leoleo, le fa’aaoga lea e se ali’i talavou sa taofia i le JDC o le fualaau oona o le aisa, ma tofia ai loa le ali’i Leoleo Suesue ia Det. Filiemoni Amituana’i na te suesueina i lenei mataupu.

I le ulua’i iloiloga a Alo sa faia i luma o le fa’amasinoga fa’aitumalo i le masina o Me o le tausaga na te’a nei, na taua ai e Det. Amituana’i e fa’apea, e to’alua tama’ita’i talavou sa taofia i le JDC na a’afia i gaioiga fa’asolitulafono a le ua molia, o le tama’ita’i e 14 tausaga le matua ae o le isi e 15 tausaga le matua. Sa taofia i laua nei e to’alua i totonu o le sela e tasi.

Na taua e le tama’ita’i e 15 tausaga le matua i Leoleo e fa’apea, i se taimi o le masina o Me o le tausaga e 2016, sa alu atu ai Alo i lona potu ma tatala mai i tua o ia, ma ula a laua sikaleti i fafo o le falepuipui.

O le taimi lea na amata ai loa ona faia e le ua molia ni amiioaga e atagia mai ai ona uiga tu’inanau, seia oo lava ina taunu’u i tulaga matuia e aofia ai ma feusuaiga (tulou).

E le i mafai e le malo ona faamaonia moliaga fa’asaga ia Alo, e mafua mai i uiga mataga sa faia i le tamaitai e 14 tausaga le matua. Na matua finau le loia sa tula’i mo Alo i le taimi o lana ulua’i iloiloga lea e fa’apea, o le tagi a le malo o loo fa’avae lea i luga o tala fa’alogo e aunoa ma ni mau fa’amaonia.

I le mae’a ai o le ulua’i iloiloga a Alo, na fa’amaonia ai loa e le fa’amasinoga faaitumalo le i ai o mau e lagolago ai moliaga mamafa e 3 fa’asaga ia te ia, ae solofua ai isi moliaga ina ua le mafai e le malo ona tu’uina atu ni mau e lagolagoina ai le latou tagi.