Tala otooto o Fa’amasinoga

ETI MUAGUTUTIA

O le ali’i e 35 tausaga le matua lea na tu’uaia e le malo i lona faia o uiga mataga i se teineititi e 13 tausaga le matua, ua ia ta’utino i le fa’amasinoga maualuga, e moni ma fa’amaoni tu’uaiga fa’asaga ia te ia.

O le vaiaso na te’a nei na tula’i ai Eti Muagututia mo le fa’alauiloaina o se maliliega ua mae’a ona latou sainia ma le malo. Na tula’i mo ia le ali’i Loia Fautua ia Michael White, ae o le ali’i loia sili lagolago ia Woodrow Pengelly na tula’i mo le itu a le malo.

Na ulua’i tu’uaia e le malo ia Muagututia i moliaga mamafa e 2 o le tagofia lea o itutinosa o se tama’ita’i e talavou i lalo o le tulafono i le tulaga muamua, o vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000.

Na tu’uaia fo’i e le malo le ua molia i le moliaga mama o lona faia lea o ni gaioiga e ono lamatia ai le saogalemu o fanau laiti, o le vaega A lea o solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, pe fa’asala foi i le salatupe e le silia i le $1,000, poo le fa’asala fo’i i fa’asalaga uma ia e lua.

A i lalo o le maliliega lea ua sainia e Muagutitia ma ua talia fo’i e le fa’amasinoga, na malie ai Muagututia e tali ioe i le moliaga mamafa e tasi o lona tagofia lea o itutinosa o se tama’ita’i e laititi i lalo o le tulafono.

I lona tali ioe ai i le moliaga e pei ona ta’usala ai o ia e le fa’amasinoga maualuga, na ta’utino ai Muagututia e fa’apea, i se taimi o le aso 7 o Aperila, 2018, sa ia tagofia ai itutinosa o se teineititi e 13 tausaga le matua, e ala i lona tago atu i lona fatafata.

Na ta’utino atili Muagututia e fa’apea, na mafua ona ia tagofia itutinosa o le teineititi na a’afia, o le naunau lea ina ia fa’amalie ai ona lagona tu’inanau sa i ai. O lana gaioiga fo’i sa faia i lea aso, sa le tusa ai ma ala o le tulafono.

O se vaega o le maliliega a le malo ma Muagututia, o le talosaga lea o le malo i le fa’amasinoga maualuga, ina ia fa’anofovaavaaia le ua molia, e aunoa ma le tu’uina atu o se fa’asalaga fa’a falepuipui.

Ae na fa’ailoa e le afioga i le ali’i fa’amasino sili ia Michael Kruse ia Muagututia e fa’apea, o tuutuuga o le latou maliliega ma le malo, e le tamauina ai le fa’amasinoga, e pule lava le fa’amasinoga i le ituaiga fa’asalaga e fa’asala ai o ia, fuafua i le mamafa o le solitulafono sa ia faia.

O lo o tumau pea tuutuuga o loo tatala ai i tua Muagututia ina ua ia totogi le $10,000, e fa’atali ai le aso 2 o Novema lea ua fa’amoemoe e tula’i ai i luma o le Fa’amasinoga Maualuga mo le lauina o lana fa’asalaga.

VINCENT TAGALOA

Ua tatala i tua e le afioga i le ali’i Fa’amasino ia Fiti Sunia se ali’i na taofia i le falepuipui i Tafuna e aunoa ma se tupe e tatala ai o ia i tua, ina ua fa’ailoa e le itu a le malo i le vaiaso na te’a nei, latou te le failaina ni moliaga fa’asaga ia te ia.

Na taofia e Leoleo ia Vincent Tagaloa i le vaiaso na te’a nei, ma tu’uaia i le moliaga mama o le fa’atupu vevesi i nofoaga faitele, e mafua mai i le fa’alavelave lea na manu’a ai se ali’i mai Tafuna ina ua tuiina i se a’upega maai.

I le aso o le ulua’i iloiloga a Tagaloa, na fa’ailoa ai e le loia a le malo ia Jason Mitchell le sauni o le malo e faila moliaga mamafa fa’asaga ia Tagaloa.  Ae ina ua toe valaau le mataupu a Tagaloa i le vaiaso na te’a nei, na fa’ailoa ai loa e le loia a le malo i le fa’amasinoga, e leai ni moliaga mamafa e faila fa’asaga ia Tagaloa, se’i vagana ai le moliaga mama o le fa’aoolima i le tulaga tolu.

O tuutuuga ua tatala ai i tua Tagaloa e fa’atali ai le isi ana iloiloga i le masina fou o Oketopa, o le fa’asa lea ona ia toe soli se tulafono a le malo, fa’asa ona ia toe fa’afesoota’iiina le ali’i na a’afia i soo se auala, a ia avea o ia ma tagatanu’u lelei e tausisi i tulafono uma a le malo.

O le vevesi na tula’i mai i le taimi o se inugapiai le va o Tagaloa ma se tasi o ana uo, na mafua ai ona manu’a le na a’afia, ina ua fa’aaoga e le ua molia se tioata e tui ai lona ulu.

O manu’a na a’afia ai le ali’i na a’afia, e le o ni manu’a e ono oo ai le oti ia te ia, e pei ona taua e le itu a le malo i luma o le fa’amasinoga. Na taua e molimau i Leoleo e fa’apea, na amata le tafaoaga a Tagaloa ma ana uo i se inugapia ae fa’ai’u ai loa i se vevesi, ma i’u ina fa’afesoota’i ai loa e aiga tuaoi le ofisa o Leoleo i Tafuna mo se fesoasoani.