Teena talosaga e fa’aitiitia ai le tupe e tatala ai i tua Tumuatasi Lefatia

aUa teena e le afioga i le tama’ita’i Fa’amasino ia Gwen Tauiliili-Langkilde le talosaga na tuuna atu e le ali’i loia ia Marcellus T. Uiagalelei, mo se avanoa e fa’aitiitia ai le tupe e tatala ai i tua Tumuatasi Lefatia mai le toese i Tafuna.

I le teena ai e le fa’amasinoga o le talosaga a le itu tete’e, na fa’atulaga ai loa fo’i ma le aso e faia ai le ulua’i iloiloga a Lefatia, o le aso Faraile lea o le vaiaso fou, Setema 28 2018 i le itula e 10:30 i le taeao.

E $100,000 le tupe na fa’atulaga e le fa’amasinoga i le aso Faraile o le vaiaso na te’a nei e totogi, ona fa’atoa mafai lea ona tatala Lefatia i tua mai le toese.

O le aso Lulu o le vaiaso nei, na talosagaina ai e le ali’i loia ia Uiagalelei o loo tula’i mo Lefatia le fa’amasinoga, ina ia fa’aitiitia i le $50,000 le tupe e tatala ai i tua le ua molia.

O ni isi o mafua’aga na faailoa e Uiagalelei i le fa’amasinoga, e le gata o Lefatia o se tagatanu’u o Amerika Samoa ua tele tausaga o soifua ma ola i le atunu’u, ae o lona nofoaga mau lava Amerika Samoa, o loo i ai uma ona aiga aemaise ai lona to’alua ma lana fanau.

Na taua e Uiagalelei e fa’apea, o Lefatia, e le o se tagata e ono lamatia ai le saogalemu o tagata lautele pe afai ae tatala i tua, e le o i ai fo’i se fa’anaunauga o Lefatia e sola ese ma Amerika Samoa pe afai ae tatala o ia i tua.

I le fa’aiuga o le folasaga a Uiagalelei, sa ia talosaga ai loa i le fa’amasinoga ina ia fa’aitiitia le tupe e tatala ai le ua molia i tua.

Na tete’e malosi le loia a le malo i le talosaga a le itu tete’e. Na taua e le tama’ita’i loia sili lagolago ia Christy Dunn e fa’apea, ua lava ma totoe le tupe lea ua mae’a ona fa’atulaga e le fa’amasinoga e tatala ai i tua Lefatia.

Afai e mafaufau i le siosiomaga o moliaga o loo tu’uaia ai o ia, atoa ai ma le talitonuga o le malo e fa’atatau ia te ia, ona manatu ai lea o le malo, e le saogalemu le atunu’u lautele pe afai ae toe tatala i tua Lefatia. Na finau malosi le loia a le malo i le fa’amasinoga, ina ia fa’atumau pea le tupe e tatala ai le ua molia i tua i le $100,000.

Na taua atili e Dunn e fa’apea, e matuia tu’uaiga fa’asaga i le ua molia. O mau fa’amaonia fo’i na maua mai e le malo i le osofaiga, ua lava ma totoe e lagolagoina ai le latou tagi fa’asaga ia te ia.

E ese mai i le tagi fou fa’asaga i le ua molia, ae na taua fo’i e Dunn tulaga e fa’atatau i lona le usitaia lea o poloaiga o lana nofovaavaaia sa tuuina atu e le fa’amasinoga i le tasuaga na te’a nei.

O ia tulaga uma e pei ona taua e le loia a le malo, ua lava ma totoe e atagia mai ai, o le ua molia, o se tagata e le maua ai se saogalemu o tagata lautele pe afai ae tatala o ia i tua. I le fa’aiuga o le fa’afinauga a le malo, na talosagaina ai loa e le tama’ita’i loia ia Dunn le fa’amasinoga ina ia fa’atumau pea le tupe e tatala ai i tua Lefatia i le $100,000.

Saunoa le tama’ita’i fa’amasino ia Tauiliili-Langkilde e fa’apea, e le gata sa iloilo toto’a e le fa’amasinoga fa’amaumauga o le tagi a le malo fa’asaga ia Lefatia, ae sa maua fo’i le avanoa e iloilo ai e le fa’amasinoga tulaga o lana nofovaavaaia.

“I le mae’a ai la ona iloilo e le fa’amasinoga o tulaga uma e pei ona taua, ua tula’i mai ai loa ma le fa’aiuga, e le taliaina lau talosaga Uiagalelei sa tuuina atu, mo se avanoa e fa’aitiitia ai le tupe e tatala ai i tua le ua molia,” o le saunoaga lea a Tauiliili-Langkilde.

Saunoa atili le tama’ita’i fa’amasino e fa’apea, o le a tumau pea le tino i tupe e $100,000 e tatala ai i tua Lefatia.

Na fesili Uiagalelei i le tama’ita’i fa’amasino e fia malamalama, poo le a sa’o le auala e fa’atupe ai le tatalaina o Lefatia i tua, poo le tinoitupe e $100,000, poo meatotino e au lo latou tau i le maualuga e pei ona fa’atulaga.

Ae na saunoa le tama’ita’i fa’amasino e fa’apea, o le tinoitupe e mana’omia e tatala ai i tua Lefatia.

O lo o taofia pea i le toese le ua molia e fa’atali ai lana ulua’i iloiloga lea ua fa’atulaga e faia i le vaiaso fou.

O tu’uaiga fa’asaga ia Lefatia, na afua mai ina ua osofa’i e Leoleo le nofoaga o le AUTE i le aso Lulu o le vaiaso na te’a nei, i lalo o se poloaiga mai le fa’amasinoga, ma maua ai e Leoleo se vaega tele o fualaau fa’asaina o le aisa ma le mariuana.