Falepuipui mo le 15 aso le ali’i sa avea ma Leoleo

E 15 aso i le toese i Tafuna lea ua fa’asala ai e le afioga i le ali’i Fa’amasino ia Fiti Sunia le ali’i sa avea ma Leoleo a le malo, ina ua ta’usala o ia i le moliaga mama o le fa’aoolima i le tulaga tolu, e mafua mai i le fa’alavelave lea na ia tagofia ai itutino o se tama’ita’i Leoleo i se auala e fa’ailoa atu ai lagona tu’inanau.

O le aso Tofi o le vaiaso na te’a nei na tula’i ai Siaosi Aiono i luma o le Fa’amasinoga Fa’aitumalo mo le lauina o lana faasalaga. Sa tula’i mo ia le ali’i loia tua ia Marcellus T. Uiagalelei, ae o le tama’ita’i loia sili lagolago ia Christy Dunn na tula’i mo le malo.

E le i finagalo Aiono na te faaleoina lana fa’atoesega i le fa’amasinoga, ae sa ia tu’u le avanoa i lana loia fautua ia Uiagalelei e fai ma ona sui. Na taua e le ali’i loia ia Uiagalelei e fa’apea, ua matua salamo moni lava Aiono e tusa ai o lana solitulafono sa faia, ma ua ia ta’utino fo’i i le sese o le gaioiga sa ia faia.

Na taua e Uiagalelei e fa’apea, e le mafai ona ia talanoa pe na fa’apefea ona alia’e mai le mataupu e pei ona a’afia ai Aiono, pau lana fa’amatalaga, o Aiono ua salamo. Sa ia talosagaina le fa’amasinoga mo se fa’asalaga mama, e aofia ai le fa’anofovaavaaia o Aiono e aunoa ma le tuuina atu i ai o se fa’asalaga fa’a falepuipui.

Na lagolagoina e le loia a le malo le talosaga a le itu tete’e, ina ia fa’asala AIono i se fa’asalaga fa’anofovaavaaia.

“O le a tonu lava le uiga o le upu lea nofovaavaaia,” o le fesili lea a Sunia i loia e itu e lua.

“O le nofovaavaaia, o se avanoa lea e tuuina atu i le tagata ua molia e suia ai lana amio, suia mai le sese aga’i i le sa’o. E fia malamalama le fa’amasinoga poo le a se mea lelei o le a maua mai e Aiono pe afai ae nofovaavaaia o ia.”

“O le a tonu lava la le mafua’aga ua ala ai ona oulua finau mai e fa’anofovaavaaia Aiono,” o le isi lea fesili a Sunia i loia.

Na faailoa e Sunia e fa’apea, soo se tagata lava e ta’usala i le tagofia o le ‘ava malosi ae lei atoa le 21 tausaga, e mana’omia e ia ni aoaoga fa’a faufautua ina ia fesoasoani ai i lona olaga. E faapena fo’i i le tagata e ta’usala i le tagofia o le ‘ava malosi, ma le tagata e fa’amisa i nofoaga faitele, la te mana’omia uma ni aoaoga fa’a faufautua.

Saunoa Sunia e fa’apea, o le galuega Leoleo, o se tofiga pito sili lea ona maualuga i totonu o le malo lenei, aua o le Leoleo, na fa’atauto latou te faamalosia le tulafono ma puipui le saogalemu o tagata lautele.

“Tatou te le o iloa atu mea o loo tutupu i totonu o le Ofisa o Leoleo. Tatou te le o iloa atu fo’i mea o loo tu’uaia ai amioaga a isi Leoleo fa’asaga i isi Leoleo, ae o le fa’alavelave e pei ona ta’usala ai le ua molia i lona tagofia o itutinosa o se tama’ita’i Leoleo, e ui tatou te lei iloa le mea moni sa tupu, peita’i, o lea ua amata ona tatou vaaia le alia’e mai o uiga nei sa lilo,” o le saunoaga lea a Sunia.

E tele naua mataupu eseese o loo tutupu i totonu o le ofisa o Leoleo e pei ona saunoa Sunia, o ni isi o ia mataupu e aofia ai le faaitu’au, mataupu o le tau lamalama o le isi i le tasi, mataupu i amioga le tau pulea o isi Leoleo, e aofia ai fo’i ma le mataupu i le le sa’o ona faia o tulaga o Leoleo.

“E le o ituaiga amio nei na fa’atauto oe e te faia,” o le saunoaga lea a Sunia ia Aiono.

“Afai e le mafai e le isi Leoleo ona fa’aaloalo i le isi Leoleo, e i ai fo’i le avanoa e le mafai ai e Leoleo ona fa’aaloalo i le atunu’u lautele,” o le saunoaga lea a Sunia.

I le fa’aiuga o saunoaga a le ali’i fa’amasino, na ia poloaina ai loa le taofia o Aiono i le toese mo le umi e 15 aso.

Na talosaga Uiagalelei i le fa’amasinoga, pe mafai ona tuu se avanoa ia Aiono e fo’i atu ai i lona aiga e tapena ona laei ma aga’i atu ai loa i le toese i se taimi o le aso lava lea, peita’i na teena e Sunia. Saunoa Sunia e fa’apea, taoto le tulaga o le tapenaina o laei o Aiono e fa’atino e lona aiga, ae o Aiono ua i lalo o le vaavaaiga a le malo i le taimi lava lea.

O le moliaga mama o le faaoolima i le tulaga tolu lea ua ta’usala ai Aiono, e mafai ona fa’asala ai se tasi i le toese mo le umi e le silia i le 15 aso, pe faasala foi i le salatupe e le silia i le $300.

O le fa’alavelave e pei ona ta’usala ai Aiono na tula’i mai i le masina o Aperila o le tausaga nei, ina ua ia tagofia itutinosa o se tama’ita’i Leoleo sa i lalo o lana vaavaaia i le Ofisa o Leoleo i Tafuna. E fa’atino e Aiono le solitulafono a o laei lona toniga Leoleo.