Molia ni ali’i se to’atolu i le fa’ao’olima i o latou ta’ito’alua

E to’atolu ni ali’i na pu’e fa’apagota e Leoleo i le vaiaso na te’a nei, ona o tu’uaiga i lo latou fa’ao’olima lea i o latou ta’ito’alua. O nei fa’alavelave na tutupu i nofoaga eseese, ae na mafai ona ripotia atu i Leoleo ma faia ai loa suesuega fa’asaga i ali’i ua molia.

Ina ia puipuia le fa’alauiloaina o i latou sa faia fa’asaga i ai nei soligatulafono, o le mafua’aga lea ua le mafai ai e le Samoa News ona faailoa suafa o i latou e to’atolu ua molia e le malo.

O le vaiaso na te’a nei na tutula’i ai i latou nei i luma o le Fa’amasinoga Fa’aitumalo, ma latou teena ai moliaga ta’ilua fa’asaga ia te i latou, le moliaga o le faatupu vevesi i nofoaga faitele atoa ai ma le fa’aoolima i le tulaga tolu.

O le ali’i loia fautua ia Ryan Anderson o lo o tula’i mo i latou nei e to’atolu ua molia, ae o le ali’i loia sili lagolago ia Jason Mitchell o lo o tula’i mo le itu a le malo. O le mae’a ai o ulua’i iloiloga a i latou nei i le vaiaso na te’a nei, na fa’atulaga ai loa e le afioga i le ali’i fa’amasino ia Fiti Sunia tupe ta’i $1,000 e tatala ai isi ali’i e to’alua, ae o le isi ali’i na tatala i tua e aunoa ma se tupe na fa’atulaga e totogi.

O nei fa’alavelave na tula’i mai le isi i Pago Pago, Tafuna ma Malaeimi.

FA’ALAVELAVE I PAGO PAGO

Pe tusa o le itula e 3:12 i le aoauli o le aso Tooona’i o le vaiaso i ona tua atu na tula’i mai ai le fa’alavelave i Pago Pago, ina ua fa’aoolima le ua molia i lona to’alua i luma o le bus stop. O se ulugali’i matutua na aga’i atu le la ta’avale ma la molimauina lenei solitulafono, e le gata sa laua faafesoota’i le Ofisa o Leoleo mo se fesoasoani, ae sa la tutu fo’i e fesoasoani mo le fafine na a’afia.

Na taua e le ulugali’i i Leoleo e fa’apea, e fetaui lava le oo atu o le la ta’avale i luma o le bus stop ae la vaaia loa le fafine ua pau i lalo ua tu’i e lona to’alua, sosoo ai ma le fa’asaga atu o le tamaloa ua kiki le papatua o le fafine a o ta’atia i lalo. E le i umi se taimi ae taunu’u Leoleo ma amata loa le suesuega o le fa’alavelave.

Na taua e le fafine na a’afia i Leoleo e fa’apea, na fa’ateia o ia a o la talanoa ma lana uo tama i le fale fa’atali pasi ae fa’afuase’i loa ona oso atu lona to’alua, ma ia po lona gutu ma fetoai ai lona ulu ma le pou sima o le fale faatali pasi. O le taimi lea na tu ai i luga lana uo tama sa la talanoa ma alu i le atoa.

Na toe tago atu lona to’alua ua titina lona ua ao saofa’i pea o ia i lalo i le taimi lea. Na avea lona taumafai e tu i luga ma itu na tu’i ai loa e lona to’alua ona foliga ma pau ai loa i lalo. A o ta’atia i lalo, sa ia faalogoina le tau o kiki e 2 i lona papatua.

Na taua e le ali’i na molia i Leoleo e fa’apea, na ia faaoolima i lona to’alua ona o le tiga o lona loto i le mea sa tupu, ina ua ia maua atu lona to’alua o loo talanoa ma le isi tamaloa i le fale fa’atali pasi. Na taua e le ua molia e fa’apea, ua leva tele o ia fa’alogo i fa’amatalaga e fa’atatau i lona to’alua ma le tamaloa lea, a o lea fa’atoa ia mauaina i laua i le aso lea.

Na taua atili e le ua molia i Leoleo e fa’apea, a o fai lana galuega kamuta i Pava’ia’i, sa fa’afuase’i ona telefoni atu se teine o lona aiga ma faailoa atu ia te ia, o lona to’alua o loo talanoa ma le isi tamaloa i le fale faatali pasi i Pago Pago. Na tia’i lana galuega i Pava’ia’i ae aga’i mai i Pago Pago, ma ia maua mai ai lona to’alua o loo nonofo fa’atasi ai ma se tamaloa i le fale fa’atali pasi o loo talanoa. E le i toe fa’atali ae fa’ao’olima loa i lona to’alua.

E $1,000 lea ua fa’atulaga e totogi ona fa’atoa mafai lea ona tatala le ua molia i tua. Afai ae mafai ona tatala o ia i tua, ua poloaina le fa’asa lea ona ia toe taumafai e fa’afesoota’i lona to’alua i soo se auala, fa’asa fo’i ona toe alu i le latou fale, se’i vagana ua mae’a taualumaga o lana mataupu.

FA’ALAVELAVE I TAFUNA

Pe tusa o le itula e 9:21 i le po o le aso Gafua i le vaiaso i ona tua atu na logo ai e le fafine na a’afia le ofisa o Leoleo mo se fesoasoani, ina ua fa’ao’olima lona to’alua ia te ia, e ala i le fa’alua lea ona ia tu’i ona foliga.

Na taua e le fafine na a’afia i Leoleo e fa’apea, ao matamata le latou TV ma lana fanau, ae manava atu loa lona to’alua i le fale e ‘ona. E le i umi ona i ai lona to’alua i le latou fale ae amata loa ona pisa o ia ma foliga mai o le a amata se taugaupu. Na fa’ai’u puta le taugaupu i le va o ia ma lona to’alua, ina ua masalosalo lona to’alua o loo faia se la faigauo ma se alii ave taxi.

Na taua e le fafine i Leoleo e fa’apea, a o ia taumafai e fa’amalamalama i lona to’alua le mataupu, na fa’afuase’i ona tu atu lona to’alua ma toso lona ulu, sosoo atu ai lava ma ana po lapopo’a e lua i ona foliga.

Ina ua fesiligia e Leoleo, sa ta’utino ai le ua molia, e sa’o sa ia fa’aoolima i lona to’alua. Sa ia talosaga fo’i i Leoleo ina ia fa’amagalo o ia, ae tuu atu se isi avanoa mo ia. Ae talu ai le tausiga o le filemu i le aiga atoa ai ma le saogalemu o le fafine ma lana fanau, na mafua ai ona faia le faaiuga e taofia le ua molia i le toese i le po lava lea.

Ua toe tatala i tua le ua molia e aunoa ma se tupe e totogi, i lalo o tuutuuga e aofia ai le aua lea ne’i ona toe fa’atupuina se vevesi i totonu o lona aiga.

FA’ALAVELAVE I MALAEIMI

O le po o le aso Lua i le vaiaso i ona tua atu na logoina ai e se Tina matua le ofisa o Leoleo mo se fesoasoani, ona o lana tama teine ua fasi e lona to’alua. Na taua e le Tina i Leoleo e fa’apea, ina ua ia faalogoina le e e mai o lana tama teine mai le fale o loo nonofo ai ma lona to’alua ma le la fanau, na ia tamo’e atu ai loa e vaai poo le a le mea ua tupu. Ina ua taunu’u atu, sa ia vaaia le tamaloa o loo ia titina lana tama i le isi ona lima, ae o loo ia uu i le isi ona lima se naifi fai mea’ai ma tu’u i le ua o lana tama. Na sola ese le tamaloa ina ua ia vaaia o ia ua alu atu.

Ina ua fesiligia e Leoleo le fafine na a’afia, sa ia faamaonia ai le molimau a lona Tina. Na taua e le fafine na a’afia i Leoleo e fa’apea, o le tupe na mafua ai le la vevesi ma lona to’alua, ina ua masalosalo lona to’alua o loo ia fa’aaoga fa’anana ni isi o la tupe mo lona aiga e aunoa ma lona iloa. E le gata fo’i i lea, o loo masalosalo fo’i lona to’alua e fai lana faanunumi ma le isi tamaloa o le aulotu.

Na taua e le fafine na a’afia le titina e lona to’alua o lona ua, atoa ai ma le tuuina o le tamaiti naifi fai mea’ai i lona ua. Sa folafola fo’i e lona to’alua lona fasiotia o ia. O le po lava na tula’i mai ai le fa’alavelave, na pu’e fa’apagota ai e Leoleo le ua molia.

E $1,000 lea ua faatulaga e totogi ona fa’atoa mafai lea ona tatala le ua molia i tua. Afai ae mafai ona tatala o ia i tua, ua fa’atonu o ia e saili se isi nofoaga e nofo ai, ma aua ne’i ona toe taumafai e fa’afesoota’i lona to’alua ma lana fanau.