Tofu le mataupu a Henry O’Brien i le fa’amasinoga maualuga

Ua tofu atu nei i le fa’amasinoga maualuga le mataupu fa’asaga ia Henry O’Brien, ina ua mae’a le ulua’i iloiloga sa faia i luma o le fa’amasinoga fa’aitumalo i le aso Lulu o le vaiaso nei, ma fa’amaonia ai e le afioga i le ali’i Fa’amasino ia Fiti Sunia, le lava o mau sa tuuina atu e le malo e lagaolagoina ai le latou tagi fa’asaga i le ua molia.

O loo molia e le malo ia O’Brien i le moliaga mamafa e tasi o le umia faasolitulafono lea o vaega o le pauta fa’asaina o le aisa, o se vaega D lea o solitulafono mamafa, lea e mafai ona fa’asala ai se tasi mo le umi e le itiiti ifo i le 5 tausaga, pe fa’asala foi i le salatupe e le itiiti ifo i le $5,000, poo le fa’asala fo’i i fa’asalaga uma ia e lua.

O le ali’i loia fautua ia Ryan Anderson na tula’i mo O’Brien i le taimi o lana ulua’i iloioga, ae o le ali’i loia sili lagolago ia Jason Mitchel na tula’i mo le malo. O le ali’i leoleo suesue ia Det. John Seumanutafa, o ia lea sa valaau e le malo e fai ma molimau i le taimi o le ulua’i iloiloga.

Na taua e Seumanutafa e fa’apea, o le mataupu fa’asaga ia O’Brien, o se tasi lea o mataupu ua leva ona galulue i ai le Vaega o le Vice & Narcotics Unit a le Ofisa o Leoleo, i le taumafai lea e tuu faatasi fa’amatalaga sa latou maua mai i tagata e fa’atatau i le fa’atauina atu o fualaau fa’asaina.

O le aso 25 o Iuni 2018 na maua ai loa e Leoleo le kopi o le poloaiga a le fa’amasinoga, e fa’ataga ai le sailia e Leoleo o le fale o Misi Siua i Mesepa, faapea ai ma ta’avale e 3 e pei o le ta’avale numera #6549, o le ta’avale numera #5212, ma le ta’avale numera #7244. Sa aofia ai fo’i i totonu o le poloaiga a le fa’amasinoga le sailia o ni tagata se to’atolu e aofia ai Siua, o O’Brien ma Sili Kelemete.

O le aoauli o le aso 28 Iuni na osofa’i ai loa e Leoleo le fale o Siua i Petesa, i le mae’a ai lea ona sailia o lana ta’avale.

Ae pe tusa o le itula e 5:45 i le afiafi o le aso lava lea, na taofi ai loa e Leoleo le ta’avale numera #7244 i se vaega o le alatele i Tafuna. O lea ta’avale, o se piki apu lanu siliva, ma sa fa’afoeina e le ua molia, le susuga a O’Brien.

Na faailoa e Leoleo ia O’Brien le mafua’aga ua taofi ai lana ta’avale, ona o se poloaiga mai le fa’amasinoga e saili ai lana ta’avale faapea ai lona tino.

Na taua e le ali’i loia ia Seumanutafa i lana molimau e fa’apea, e lei i ai o ia i le taimi na taofi ma su’e ai le ta’avale a O’Brien, ona o le taimi lea o loo gafa ai o ia ma le suesueina o le mataupu fa’asaga i ali’i ia na pu’e faapagota mai i Peseta.

O le mae’a ai ona su’e e isi Leoleo le ta’avale ma le tino o O’Brien, na latou maua ai loa i le taga o lona ofu sa fai se paipa tioata o loo totoe ai vaega o le pauta o le aisa. Na faia se suega i vaega o le pauta o le aisa sa totoe i totonu o le paipa, ma faamaonia ai, o vaega ia o le pauta oona o le aisa.

O le ali’i o Det. Jimmy Sitagata na ia momolia le paipa tioata ia Seumanutafa o loo i le ofisa o Leoleo i Tafuna.

Ina ua maua le avanoa o le loia a O’Brien e fesiligia ai le molimau, sa ia osofaia ai le auala na momoli atu ai le paipa ia Seumanutafa. Na taua e Anderson, e le iloa pe na faapefea ona momoli atu le paipta mai Tafuna i le vaega na saili ai le ta’avale a O’Brien, agai atu i le ofisa o Leoleo o loo i ai Seumanutafa.

Na fesili Anderson i le molimau pe sa i ai i le taimi na maua ai le paipa tioata i le tino o O’Brien, na tali le molimau, e leai.

I le faaiuga o le iloiloga, na saunoa ai Sunia e fa’apea, ua manino i molimau a le malo, o lo o i ai mau e lagolagoina ai le tagi fa’asaga i le ua molia.

E pei ona taua e le malo i le latou tagi tusitusia e faapea, ina ua fesiligia e Leoleo le ua molia i le aso na su’e ai lana ta’avale e fa’atatau i le paipa tioata, na tali ai le ua molia e fa’apea, o se paipa tioata sa ia maua i luma o se faleoloa, ona ia tago loa lea ma tuu i totonu o le taga o lona ofu sa fai.