Maliu se tagata faigaluega i Manu’a ina ua oso le ta’avale i le sami

O le fa’alavelave tupu fa’afuase’i lea ua ma’imau ai le soifua o se Tama e tusa ma le 50 tausaga o lona soifua, ina ua oso le ta’avale na malaga ai i tua o le ala laupapa e fesootai ai Ofu ma Olosega i Manu’a i le aoauli o le aso Lua na te’a nei, ua manino ai le moni o upu a le atunu’u, e momoe ma manu e le fati, ae sau mala e atia’e.

Na tuai atu se fesoasoani mo lenei ali’i, ma maliu ai lava o ia i totonu o le ta’avale sa malaga ai.

Na taua e se molimau mai Ofu i Manu’a i le Samoa News e fa’apea, o le fa’alavelave na tula’i mai ina ua latalata i le taimi e manava ai galuega.

O le ali’i ua maliu, e sau mai le afioaga o Sili, Manu’a, ua lata i le 30 tausaga o tautua i le Matagaluega o Pulega o Uafu ma Taulaga a le malo i Manu’a, ma o ia o le Ta’ita’i o le lala i Manu’a.

O le mae’a ai o galuega i le aso Lua na te’a nei, na alu ai loa le ta’avale e momoli tagata faigaluega i Olosega.

O le toe fo’i mai o le ta’avale mai Olosega na tula’i mai ai loa le fa’alavelave, ina ua oso le ta’avale i tua ma le auala laupapa ma pau atu ai i le sami.

Na taua e se molimau e fa’apea, e taunu’u atu le fesoasoani ua siliga tali i seu se lavea’i mo lenei ali’i.

O le itula e 3:45 i le afiafi o le aso lava lea, na taunu’u atu ai loa le va’alele a le Samoa Airways na totogi fa’apitoa e le Matagaluega o le Soifua Maloloina, ma auina mai ai loa le tino maliu o lenei ali’i i le falema’i o le LBJ i Faga’alu.

O lo o fa’agasolo i le taimi nei suesuega a le Ofisa o Leoleo e tusa ai o lenei fa’alavelave. E le i maua mai se ripoti autu mai le Ofisa o Leoleo e tusa ai o lenei fa’alavelave.

Na taua e le molimau i le Samoa News e fa’apea, e i ai masalosaloga na maliu lenei alii ina ua malemo o ia.

Sa i ai ni manu’a i ona lima, e foliga mai sa taumafai o ia e tatala le tioata pito i tua o le ta’avale ina ia mafai ona sao mai ai i tua, peita’i ua tuai se gaioiga lavea’i ma siliga taliiseu ai se fesoasoani mo ia.