Toe tolopo le fa’amasinoga iloilo mataupu afioaga Pago Pago

Ua toe tolopo e le Vaega o Fanua ma Suafa o le Fa’amasinoga Maualuga a Amerika Samoa le iloiloga autu o le mataupu i le va o le Pulega a alii ma faipule o le afioaga o Pago Pago, ma le tofa a Tuaolo Lemoe, i le mae’a ai lea ona talia e le fa’amasinoga o se talosaga na fa’aulu e le ali’i loia ia Charles Alailima, mo se avanoa e toe tolopo ai le iloiloga i le masina o Setema.

O Alailima o loo tula’i mo le afioaga o Pago Pago, ae o le ali’i loia, le afioga i le Matua ia Togiola T. A Tulafono o lo o tula’i mo Tuaolo.

O le iloiloga sa faia i le vaiaso nei, na fa’aaogaina ai fesootaiga tau fetelefoni e talanoa mai ai Alailima i luma o le fa’amasinoga, ona o lo o i ai nei o ia i Amerika i le taimi nei, ma ua fa’amoemoe e malaga mai i le atunu’u i le masina o Setema, mo le fa’ataunu’uina o ni isi o ana galuega i le teritori nei e aofia ai ma le mataupu lenei.

Na taua e Alailima i lana talosaga lona faanaunauga ina ia toe tolopo le iloiloga seia aulia Setema, ona o lo o i ai ni isi o mataupu e tatau ona talanoaina ma le pulega a ali’i ma faipule o Pago Pago a o lumana’i ai le iloiloga.

O ni isi o ia mataupu e aofia ai le fa’atalatalanoaina o ni isi o molimau, ona o se tasi o molimau autu mo le afioaga, le susuga Fanene Morris Fanene ua tuumalo. Sa ia taua fo’i le ono i ai o le avanoa e talanoaina ai se leleiga i le va o le afioaga ma Tuaolo.

Na faauilavea le afioga i le ali’i fa’amasino sili ia Michael Kruse ma ia saunoa ia Alailima e fa’apea, e le o fia fa’afofoga le fa’amasinoga i ni talanoaga e fa’atatau i se leleiga. E le o le mataupu lea o lo o i luma o le fa’amasinoga i le taimi nei.

I le mae’a ai ona talia e le fa’amasinoga o le talosaga e toe tolopo ai le iloiloga o lenei mataupu ia Setema, na talosagaina ai loa e Kruse ali’i loia ia Alailima ma Togiola, ina ia galulue ma le Failautusi a le Fa’amasinoga, mo le fa’atulagaina o se aso talafeagai e fofoga aloaia ai lenei mataupu.

Ina ua fesiligia e le Samoa News le afioga i le Maoputasi ia Mauga Tasi Asuega i le masina na te’a nei e fa’atatau i lenei mataupu, na taua ai e Mauga le mana’omia lea o se taimi e toe feutana’i ai ma le tofa Tuaolo, ma vaavaai pe i ai se avanoa e mafai ai ona toe teuteu i tua lenei mataupu.

Na fesiligia pe aisea ua tuai ai ona faia se gaioiga e toe fa’aleleia ai le afioaga ma le tofa Tuaolo, ae na saunoa le afioga i le Maoputasi, e leai se faigata ona toe teuteu o tulaga fa’aletonu e pei ona tula’i mai, pau le lagona ua i ai i le taimi nei, e tatau ona fesiligia muamua loia, ona o lea ua i luma o le fa’amasinoga le mataupu.

O le mataupu i le va o le afioaga i Pago Pago ma le tofa Tuaolo, na alia’e mai ina ua aveese e le pulega a ali’i ma faipule a Pago Pago le suafa o Tuaolo mai le lisi o aiga o lo o maua fa’amanuiaga tau tupe mai le lisi a le National Park e ala i le fa’aaogaina o eleele o le afioaga.

O le tula’i mai ai o lea tulaga, na talosagaina ai loa e le loia a Tuaolo ia Togiola se poloaiga mai le fa’amasinoga, e taofia ai le pulega a ali’i ma faipule mai lo latou fa’aauauina o lea tulaga, sei vagana ua mae’a le iloiloga o lenei mataupu.

I le mae’a ai o le iloiloga sa faia ia Aperila o le tausaga nei, na poloaina ai loa e le fa’amasinoga le toe fa’afo’i o le tulaga sa i ai le aofa’i o aiga na fa’amanuiaina i le lisi o fanua ma le vaega a le National Park.

Sa fautuaina fo’i e le fa’amasinoga le pulega a ali’i ma faipule atoa ai ma Tuaolo, ina ia taumamao mai le faia o ni talanoaga mo se leleiga e aunoa ma le auai o ali’i loia. Ae sili ai i lo lena, talu ai o le mataupu ua i luma o le fa’amasinoga, lona uiga, o le auala fo’i a le fa’amasinoga e mafai ai ona toe teuteu le mataupu.