Mae’a suesuega faapitoa sa fa’atautaia Ofisa Puipuiga Saogalemu Lotoifale

Ua mae’a aloaia nei se suesuega faapitoa sa fa’atautaia e le Matagaluega o le Puipuiga o le Saogalemu Faalotoifale (ASDHS), fa’asaga i se tagi sa fa’aulu e se tama’ita’i mai le atunu’u o Filipaina, fa’asaga lea i faiga fa’apologa sa faia e le pule o le kamupani sa galue muamua ai, o lana sponsor muamua fo’i lea.

O le pule o le kamupani ma le sponsor, o le afioga lea i le tama’ita’i faipule mai le itumalo o Tualauta, afioga Vui Florence Saulo, lea e pulea le FSA Land Development, lea fo’i e pulea ma le Siniva & Armelia’s Sewing Shop.

I se talanoaga ma le Fa’atonusili o le Matagaluega o le ASDHS, afioga Samana Semo Ve’ave’a i luga o le telefoni i le vaiaso nei, na fa’amaonia mai ai e le afioga a Samana i le Samoa News, le tapunia aloaia lea o le latou suesuega sa faia ina ua leai ni mau fa’amaonia e lagolago ai le tagi a le fafine Filipino fa’asaga i le afioga i le tama’ita’i faipule ia Vui.

“O lea ua mae’a aloaia la matou suesuega sa faia, ma ua fa’amaonia i lea su’esu’ega le leai o ni mau e fa’amaonia ai tu’uaiga o le faia o ni uiga fa’apologa fa’asaga i tagata mai fafo, e pei ona faia e le fafine mai Filipaina i le afioga ia Vui. Ua tapunia aloaia nei la le suesuega, ma ua taoto atu loa le mataupu i le va o le loia a le fafine Filipaina ma le ofisa o Femalagaaiga,” o le saunoaga lea a Samana.

Saunoa atili le afioga i le Fa’atonusili e fa’apea, o ia lea sa fesiligia le fafine Filipino e tusa ai o lenei mataupu, ma atagia mai ai le leai o ni mau fa’amaonia e lagolago ai tu’uaiga e pei ona faia fa’asaga ia Vui.

E le i manuia taumafaiga a le Samoa News e saili se finagalo mai le loia a le fafine Filipino ia Joselyn M. Intila, le susuga i le ali’i loia ia Richard deSaulles e uiga i lenei mataupu.

I le 2 vaiaso talu ai, na fa’amaonia mai ai e deSaulles i le Samoa News, le i ai lea o se suesuega ua faia e le ASDHS fa’asaga ia Intila ma le sa avea muamua ma ana Pule i le galuega, o ia fo’i lea sa avea ma ana ulua’i sponsor, o le mafua’aga lena ua le mafai ai ona tuua e Intila le atunu’u ae toe fo’i atu i lona atunu’u i Filipaina, ona o lo o fa’atali se fa’aiuga o le suesuega.

Ae talu ai la o lea ua mae’a le suesuega ma ua leai ni mau e lagolago ai tu’uaiga fa’asaga ia Vui, o le fesili ua tula’i mai, pe ua le tatau lea ona fa’afo’i Intila i lona atunu’u, ona o lea ua mae’a le aoga o ona pepa nofomau e fa’ataga ai ona aumau pea i totonu o Amerika Samoa.

E le i manuia fo’i taumafaiga a le Samoa News e saili mai ai se finagalo o le Pulesili o le Ofisa o Femalagaaiga, afioga Peseta Dennis Fuimaono. Na taua e se tasi o lona Ofisa, o lo o i ai pea lava Peseta i atunu’u i fafo i le taimi nei.

Ae na taua e se sui o le Ofisa o Femalagaaiga i le Samoa News e fa’apea, afai o lea ua mae’a suesuega ma ua leai ni mau e fa’amaonia ai tu’uaiga sa faia, ua tatau loa ona tuua e Intila, Amerika Samoa ae toe fo’i atu i lona atunu’u, ona o lea ua mae’a le aoga o lona pepa nofomau i le teritori.

O le aso 31 Me, 2018 na mae’a ai le aoga o le pepa e nofo ai pea Intila i le atunu’u, o le mafua’aga lea na talosagaina ai loa e Vui ia le Komiti Fa’afoe o Femalagaaiga, ina ia fa’afo’i lenei tama’ita’i i lona atunu’u, ma fa’asa ona toe ulufale mai mo le isi 10 tausaga.

Na taua e se sui o le Komiti Fa’afoe o Femalagaaiga e fa’apea, ua mae’a ona tuu’uina atu ia Intila aso e 20 na te tuua ai Amerika Samoa i lona lava faitalia, afai ae mae’a le taimi e le alu ese o ia, ona fa’amalosia loa lea e le Ofisa o Femalagaaiga le tulafono, ma ave ese faamalosi loa o ia mai le atunu’u, poo le tipoti ese ma Amerika Samoa.