Tala I Vaifanua

SAUNIGA LOTU FA'AILOGAINA 50 TAUSAGA A'OGA MAUALUGA FAGAITUA:

O le sauniga lotu na fa'atautaia i le Malumalu EFKAS i Fagaitua i le aso aoauli o le aso Sa, Iuli 1, 2018, sa tatala aloa'ia ai le fa'ailogaina o le 50 tausaga o le Aoga Maualuga a Fagaitua.

Na to'atele fo'i i latou na o'o atu mo lea fa'amoemoe, ae maise o Tama ma Teine Tuai a Faga'itua High ma o latou aiga. Na va'aia fo'i le fa'ato'a feiloa'i ai iina ma isi na malaga mai fafo ina ia auai i lenei vaiaso taua.

"O lenei lava le puavai o le atamai, e moni lava sa gasolo atu i fafo ma fa'aauau le sailiga, ae ao lava ina toe taliu mai i fanua, aua ua atoa le 50 tausaga talu ona tula'i le a'oga, ua tatau fo'i ona o'o mai e molimau ma togi se ma'a i le fa'atasiga,” o se tala lea a le tama'ita'i o Trixie Taua, se tasi o tama'ita'i na fa'au'u mai Fagaitua, toe avea fo'i o ia ma tausala Lalelei o Amerika Samoa, ae ua alaala nei i Washington State ma faigaluega ai.

O le sauniga sa ta'ita'ia e le susuga le Faife'au EFKAS i Alofau Rev. Tafu Afusia, o se tasi o le vasega fa'aiuaso o le ulua'i fa'au'uga na faia i le 1969. O nisi o vaega o le sauniga e pei o le Faitauina o le Tusi Pa'ia: sa fofogaina lea e Pr. Rudolf Tilo o le tama fa'au'u mai Faga'itua ma o lo'o avea ma Faife'au i le Ekalesia Full Gospel Voice of Christ i Aua. O le tatalo sa si'itia e le susuga Rev Pou Taua'a, o se tasi fo'i sa fa'au'u mai Fagaitua ae ua avea nei ma Faife'au EFKAS i Utumea i Sasa'e.

O se upu fa’amalosi mai le taitai o le sauniga, sa tima'ia e ia i latou, "Ina ia outou filifili i le Ola, ae le o le oti!"

"O le toe tima'i lea a Mose i le fanauga a Isaraelu ina ua vaivai o ia, ma ua iloa ua latalata mai Kanana, e le laasia fo'i e ia le nu'u na folafolaina. Ia matua fa'aaogaina taleni ua outou maua, ae sa fofoaina atu i le Laumua lenei, ina ia toe fo'i mai ma aoga ai i ou matua ma lou aiga, fai sou aoga i lou malo ma ona tagata, ae aua fo'i ne'i galo ia te oe lau toe fa'afo'i i le Atua e ona mea uma, sa puipuia oe mai mea leaga uma, sa ia fesoasoani e fa'ataunu'u lou fa'amoemoe ua e sapi ai nei i ma'a o malie."

Sa ia toe fa'aauau lana tima'i, "Afai fo'i ua e inu ma e malie, ua e ai fo'i i mea lelei, aua nei galo lau fa'afetai i le Atua ua ia fa'amanuia tele mai. A'o oe Timoteo, ia e onosa'i i mea e tiga ai, .... ia e matua fa'ai'uina ou faiva!"

"O lo'o tima'i mai mo i tatou ina ia o atu ma tausaili, aua le fiu gofie, ia matua tu'u i ai lou malosi ma lou loto atoa, naunau ia maua lou fa'amoemoe na mafua ai ona e tausaili, aua o taumafaiga uma e faia ma le loto e manuia. A maua manuia fa'aaoga lelei, o lena ua e ola, ua e manuia fo'i, ia matua fa'amae'a ou faiva!"

Na tula'i le tina Senovefa Seumanu Pritt  ma fa'ailoa nisi o le latou vasega fa'au'u.  "Ua le o toe to'atele nisi o le matou vasega o totoe, o nisi fo'i o lo'o i ai pea. O le matou vasega e auai ai le Faife'au Ta'ita'i o lenei sauniga."

Na ia fa'ailoa fo'i lena vaitau i lona eseesega ma lenei vaitaimi i mea e fa'aaogaina i meaa'oga, "E na'o le api lava ma le penitala, o tusi faitau fo'i e le tele, ae fa'afetai na maua ai lava le malamalama, lea ua tatou folau ai i lenei vaitaimi i le atamai saili i na vaitau. O le tou vaitaimi nei, ua tele masini e fa'aaogaina e saili ai e outou mea uma e mana'omia mo le sailiga o le poto.”

E ese mai lea sa ia fa'ailoa fo'i aga a le fanau a'oga. "E savavali uma lava i le a'oga, e leai ni ta'avale e o mai ai i le a'oga i na tausaga, o le a lava le mamao e tulivae mai lava. E leai ni pasi a'oga i le matou vaitau. E fa'aaloalo fo'i le fanau teine i tama, e fa'apena fo'i tama i teine, ae leai ni faigauo e iloga i totonu o matou vasega. O lenei vaitaimi ua iloga mai le mafi o na mea."

Na o'o fo'i lana talatala i le tulaga o mea e fa'atau e le fanau mo i latou i lenei vaitau. "O na taimi a maua se seleni e faatau ai le lole po'o le pululole e a'ai uma fa'atasi ai lava ma uo teine ma nai tama, a aisi atu i tama e aumai lava aua e i ai le fa'aaloalo a i latou i tama'ita'i. O fa'au'uga fo'i latou, e o mai i le senoir ball, ae toe o lava i le fale, e le'i siva lava ma se isi. E tasi le pasi e o mai uma ai le vasega i le siva, a uma fo'i ona toe o fa'atasi uma fo'i lea i le fale. Ailoga e toe sao se mea fa'apena i le vaitau lenei?"

I le tau fa'aiuga o le sauniga na tula'i lea o le Peresetene o le Asosi a Tama ma Teine Tuai a Fagaitua High, Tuimavave Tauapa'i Laupola, ma ia fa'afetai ia i latou na auai, ae maise o le vasega o fetu mai sasa'e na malaga mamao mai mo le fa'amoemoe, ae maise o le latou poloketi o lo'o fa'atino aua so latou leo e fia fa'ao'o i le vasega o i latou e mafai ona fa'amanatuina e i latou le 100 tausaga o Fagaitua. O lea poloketi e fa'ato'a toe tatala lava lea fa'amau i le atoaga o le 100 ma e i ai a latou tusi e faia ma teuina i totonu o le ma'a fa'amanatu i le Lotoa i Fagaitua High.

TATALA FONOTAGA FANAU TALAVOU - FA'AMASANI I LOU MALO:

I le tatalaga o le fonotaga a Fanau Talavou i le Pago Pago Youth Center, sa aofia fa'atasi i ai le Kapeneta a le Kovana i lea fa'amoemoe. O lea fonotaga mo talavou, ina ia mafai e ta'ita'i o le Malo ona fa'autagia i latou i mataupu ogaoga e ao ina latou nofouta i ai, a'o fa'agasolo lo latou ola taumafai i a'oaoga, e fa'alautele atili lo latou atamai i so'o se ituaiga galuega o manatu e sailia ai latou tomai fa'apitoa, ma soifua mautinoa fo'i i fa'aiuga o lo'o faia e ona ta'ita'i, ina ia sologa lelei le folauga a Amerika Samoa e o'o atu i o latou vaitaimi e avea ai i latou ma ta'ita'i o le atunu'u.

O lo'o i ai mataupu ua mae'a fa'avasega e le Faigamalo ina ia fa'ailoa i talavou ua aofia le mafuaga o le faia o fa'aiuga a le Malo i ai.

O nisi o nei mataupu o lo'o aofia ai le tulaga o gataifale fa'asao ma le mataupu i fagotaga. O le isi mataupu o le Feagaiga i le va o Amerika Samoa ma le Iunaite Setete o Amerika. Le afuaga o le le mafai ona maua e tagata Amerika Samoa o le Sitiseni o Amerika, ae ua tu'uina mai le Nesionale o Amerika ia i latou.

I le tautalaga a Kovana Lolo Moliga, sa ia fa'ailoa ai, "E afua ona mua'i tapuia outou le tupulaga talavou i lenei vaitau o lo outou soifua, ina ia outou nofouta i mea o taumafai i ai le malo e pasia, ina ia fa'afaigofie le folauga a le Malo pe a o'o atu i o outou taimi, e avea ai outou ma ta'ita'i o le tatou Malo.”

O le fofoga fa'apitoa na tofia mo se folasaga fa'amalosi i le fanau o le tama'ita'i Foma'i ia Dr. Mafutaga Tagaloa- Tulifau lea ua ia fa'atautaia lana pisinisi i Kalefonia ma o se mea e le'i faigofie ae na ia mafaia ona ua lava ana a'oa'oga fa'apitoa i lana matata ua agava'a ai, ma ua gafatia fo'i ona o le fa'amalosi mai o le Atua ia te ia.

E fa’amae’a le fonotaga i le taeao nei.