Solofua moliaga sa faia fa’asaga ia Sio Godinet Jr

O le aso Lulu o le vaiaso na te’a nei na solofua ai e le afioga i le ali’i Fa’amasino ia Fiti Sunia moliaga mamafa e 4 o le umia fa’asolitulafono o fualaau fa’asaina o le aisa ma le mariuana fa’asaga ia Sio Godinet Jr, ina ua le mafai e le malo ona tuuina atu mau fa’amaonia e lagolagoina ai le latou tagi fa’asaga i lenei ali’i.

O Godinet Jr, o se tasi lea o i latou e to’atolu na pu’e fa’apagota mai e Leoleo i Pago Pago, ina ua osofaia ni fale se 2 e ala i se poloaiga mai le fa’amasinoga i le afiafi o le aso 15 Me, 2018.

O lea osofaiga e pei ona tu’uaia e le malo, sa maua ai e Leoleo fualaau fa’asaina ma mea e fa’aaoga e tagata e fa’atau atu ai nei fualaau fa’asaina i le atunuu i le fale o Godinet Jr. O mea o loo finau le malo sa maua e aofia ai se vaega tele o le fualaau faasaina o le mariuana, pauta o le aisa, faapea ai ma mea e fa’aaoga e faatau atu ai nei fualaau fa’asaina.

Sa maua ai foi ni paipa tioata se 4 ua uma ona utu i le aisa, paipa tioata e 2 ua uma ona utu i le mariuana, o tama’i pepa iila e utu i ai fualaau fa’asaina, o straws ua uma ona tipi tulimanu, aemaise ai le anoano o telefoni sa maua i totonu o se tama’i potu i le fogafale i lalo o le foga falelua o loo sosoo ma le fale o Godinet Jr.

Saunoa le afioga Sunia e fa’apea, e ese le fa’alavelave lea na mafua ai ona molia e le malo ia Godinet Jr i le umia faasolitulafono o fualaau fa’asaina, ese le mataupu lea sa autu i ai le fa’amatalaga a le molimau a le malo i le taimi o le ulua’i iloiloga e saili ai ni mau e lagolago ai le tagi fa’asaga i le ua molia.

Ona o lea tulaga, na fa’amanino ai loa e Sunia e fa’apea, e le mafai ona aumai elemeni mai le isi mataupu e lagolago ai moliaga na afua mai i le isi fo’i mataupu. Ona o lea tulaga, na solofua ai loa e le fa’amasinoga le tagi a le malo fa’asaga ia Godinet Jr.

Na taofia Godinet Jr i le toese talu mai Me 15 ina ua pu’e fa’apagota o ia e Leoleo, ina ua le mafai ona ia totogi le $30,000 sa fa’atulaga e tatala ai o ia i tua. Ae ina ua mae’a lana ulua’i iloiloga sa faia i le aso Lulu o le vaiaso na te’a nei, na toe tatala ai loa o ia i tua.

O le tama’ita’i loia sili lagolago ia Christy Dunn na tula’i mo le malo, ae o le ali’i loia ia Ryan Anderson sa tula’i mo le ua molia.

O moliaga mamafa e 4 sa molia ai Godinet Jr e aofia ai le moliaga o le umia faasolitulafono o le mariuana, umia faasolitulafono o le mariuana ma le fa’amoemoe e tulei atu i isi tagata, umia fa’asolitulafono o le aisa, atoa ai ma le umia fa’asolitulafono o le aisa ma le fa’amoemoe e tulei atu i isi tagata.

O le ali’i Leoleo ia Justin Thomsen mai le Vaega e Suesueina Fualaau Fa’asaina i le Ofisa o Leoleo, o ia lea o le molimau a le malo sa valaau e molimau i le iloiloga.

Na taua e Thomsen i lana molimau e fa’apea, o le masina o Fepuari o le tausaga nei na amata latou tulimata’iina ai le fale o Godinet i Pago Pago, i le mae’a ai lea ona fa’ailoa atu e se molimau fa’atuatuaina o ni gaioiga o lo o faia i lea nofoaga, na ono masalomia ai ni fefa’atauaiga o fualaau fa’asaina.

O se tasi o tulaga sa taua e le molimau fa’atuatuaina lenei i Leoleo, o le to’atele lea o tagata ma ta’avale e aga’i atu i le fale o Godinet Jr i aso ta’itasi, aemaise lava i le taimi o le po, ma ua pei ai lava lea nofoaga o lo o i ai se faleoloa. Ae o le mea moni, e leai se faleoloa a Godinet Jr.

O le molimau fa’atuatuaina e pei ona taua e Thomsen i lana molimau, o se tagata e masani ona alu ma fa’atau mai fualaau fa’asaina mai ia Godinet, ua lava fo’i lona silafia na te iloa ai le eseesega o ituaiga fualaau fa’asaina e i ai le mariuana ma le aisa. Sa vaai fo’i le molimau fa’atuatuaina nei i le taimi na faia ai fesuiaiga o tupe ma fualaau fa’asaina i le fale o Godinet Jr, atoa ai ma lona lagonaina o talanoaga a Godinet Jr ma isi tagata, e fa’atatau i le tupu olaola lea o lana pisinisi o loo fa’atau atu ai fualaau fa’asaina, lea o loo la galulue fa’atasi ma le tama’ita’i o Merika Lomu.

O Lomu, o le isi lea e to’atolu i ai i latou na pu’e fa’apagota e Leoleo i lenei mataupu, ma o loo molia fo’i o ia e le malo i le umia fa’asolitulafono o fualaau fa’asaina.

O le maua ai e Leoleo o nei fa’amatalaga uma mai le molimau fa’atuatuaina, na fa’atulaga ai loa se isi auala ina ia atili ai ona mausali le latou mataupu. Na tuu e Leoleo se tupe i le molimau fa’atuatuaina, e alu fa’atau mai ai fualaau fa’asaina mai ia Lomu, i se taimi lea o le masina o Aperila o le tausaga nei lava.

I le aso na faia ai le fa’atau, sa i ai Lomu fa’atasi ma Godinet Jr i totonu o le ta’avale a Godinet Jr. Na ave e le molimau fa’atuatuaina le tupe ia Lomu, ma tuu atu ai e Lomu le pepa o loo i ai mariuana i le molimau fa’atuatuaina. Na fo’i le molimau fa’atuatuaina ma ave le pepa mariuana i Leoleo, ma sauni ai loa Leoleo e osofa’i le fale o Godinet i Pago Pago.

I le aso o le osofaiga, na maua atu ai e Leoleo ia Lomu ma le isi ali’i i totonu o se tama’i potu o loo i le foga falelua o loo i tafatafa o le fale e nofo ai Godinet Jr. I totonu o le tama’i potu lea, sa maua i ai le tele o fualaau fa’asaina.

E lei maua Godinet Jr i totonu o le tama’i potu lea na maua i ai fualaau fa’asaina, ae sa maua o ia i totonu o lona fale, lea e le mamao ese mai i le fale foga falelua.

Saunoa le afioga Sunia e fa’apea, ana faapea o moliaga o loo tuuaia ai Godinet Jr na afua mai i le osofaiga sa faia i lona fale, e mafai e le fa’amasinoga ona fa’amaonia mau a le malo. Peita’i o le fa’afitauli, e ese le mataupu lea o loo fa’avae ai moliaga fa’asaga ia te ia.