Falepuipui le ave pasi na ia fa’amalosia tama’ita’i 17 tausaga

E 7 tausaga le ua fa’asala ai i le toese i Tafuna e le Fa’amasinoga Maualuga le ali’i ave pasi e 25 tausaga mai Nu’uuli, e mafua mai i le fa’alavelave lea na ia fa’amalosia ai se tama’ita’i e 17 tausaga le matua la te fai’aiga, e ui sa matua tete’e i ai le na a’afia.

O le fa’asalaga mo le susuga a Michael Sene, na tu’uina mai lea e le afioga i le ali’i Fa’amasino Sili Lagolago ia Elvis P. Patea, fa’atasi ai ma le lagolago a afioga i ali’i Fa’amasino ia Suapaia Pereira ma Paepae I. Faiai.

O le tama’ita’i loia sili lagolago ia Christy Dunn sa tula’i mo le itu a le malo, ae o le ali’i Loia Fautua le tumau ia Michael White na tula’i mo Sene, lea sa fa’aauau pea ona taofia i le falepuipui i Tafuna talu mai le taimi na pu’e fa’apagota ai o ia e Leoleo i le tausaga na te’a nei, ina ua le mafai ona totogi le tupe e $10,000 na fa’atulaga e tatala ai o ia i tua.

A o le i tuuina atu le fa’asalaga a le fa’amasinoga fa’asaga ia Sene, na muamua fa’ataunu’u le isi ana iloiloga, e mafua mai i lona le usitaia o poloaiga na tuuina atu i ai ina ua ta’usala o ia i le 2014, i lona faia fo’i o uiga mataga i se isi fo’i tama’ita’i e laititi i lalo o le tulafono.

O ni isi o tuutuuga o le nofovaavaaia e 5 tausaga a Sene i lana ulua’i mataupu o le 2014, o le aua lea ne’i ona toe solia se tulafono, ma ia avea o ia ma tagatanu’u lelei. Tolu tausaga mulimuli ane, na toe molia ai fo’i o ia i le fa’amalosia o se tama’ita’i.

Na fa’ailoa e le ali’i loia ia White i le fa’amasinoga, le ioeina lea e Sene o tu’uaiga fa’asaga ia te ia, i lona le usitaia lea o tuutuuga o lana nofovaavaaia. Na talosaga White i le fa’amasinoga ina ia aua ne’i faaleaogaina tuutuuga o le nofovaavaaia a le ua molia, a ia toe tu’u i ai se isi avanoa. Ae afai e manatu le fa’amasinoga e fa’aleaoga lana nofovaavaaia, na talosaga White ina ia tuli fa’atasi ana fa’asalaga.

Ina ua maua le avanoa e talanoa atu ai i le fa’amasinoga, na fa’atoese ai loa Sene e tusa ai o lana solitulafono, ma ia talosagaina ai se isi avanoa mo ia e fo’i atu ai i tua e tausi i ona Tina ua matua. Sa ia fa’atoese i le fa’amasinoga, le malo o Amerika Samoa, o lona nu’u ma lona aiga, ae fa’asilisili ai lana fa’atoesega i le tama’ita’i na a’afia ma lona aiga.

Na faailoa e Sene e fa’apea, e na o ia lava ma lona Tina matua lo la aiga, na te iloa fo’i, ua le oo atu si ona Tina i le fa’amasinoga ona o gasegase o le tino o loo a’afia ai o ia. Sa ia talosaga mo se avanoa e toe fo’i ai e tausi lona Tina.

Saunoa White e fa’apea, e ui i le matuia o le solitulafono sa fa’atinoina e le ua molia, peita’i ua salamo moni o ia ma ua naunau fo’i e fai se isi suiga i lona olaga.

Na finau le loia a le malo ina ia fa’asalaga Sene i se fa’asalaga pito sili ona maualuga o loo fa’atulaga mai e le tulafono. Na taua e Dunn e fa’apea, e fai lava si matuia o le gaoiga sa faia e lenei ali’i, ae sili ai ona matuia, ona o le taimi lona lua lenei ua ta’usala ai o ia i lona faia o uiga mataga i tama’ita’i e laiti i lalo o le tulafono.

Na finau atili Dunn i le fa’amasinoga ina ia poloaina Sene na te tuua le atunu’u ae toe fo’i atu i Samoa, pe afai ae magalo mai o ia mai le toese. Na fa’ailoa e Patea ia Dunn e fa’apea, e tusa ai o le ripoti mai le Ofisa o Femalagaaiga, o Sene ua avea nei o ia o se tagatanu’u o Amerika Samoa, ona o se tasi o ona matua sa fanau i Amerika Samoa.

I le mae’a ai ona iloilo e ali’i Faamasino o mau fa’amaonia uma o lenei mataupu, na fa’amalieina ai ali’i fa’amasino i fa’amaumauga, e tasi lava le ituaiga solitulafono lea fo’i ua toe molia mai ai Sene.

“I lau mataupu i le 2014 lea na ta’usala ai oe i lou tagofia o itutinosa o se tama’ita’i, sa tu’u atu ai e le fa’amasinoga le avanoa ia te ia. Fa’atoa 22 ou tausaga i le taimi lea, ma ua e matua fo’i. Peita’i 3 tausaga mulimuli ane, na e toe fa’atinoina ai fo’i le ituaiga solitulafono lava lea e tasi,” o le saunoaga lea a Patea ia Sene.

“Mo lau mataupu fou e pei ona ta’usala ai oe i lou faia o uiga mataga fa’afeusuaiga i se tama’ita’i talavou, ua fa’asalaina oe mo le 7 tausaga i le falepuipui.”

“Mo lau mataupu muamua lea sa fa’anofovaavaaia ai o ia, ua fa’aleaogaina nei tuutuuga o lau nofovaavaaia, ma ua poloaina oe ina ia tuli tausaga e 5 sa fa’amalumalu e le fa’amasinoga. Lona uiga, e 12 tausaga lea la’a taofia ai oe i le falepuipui,” o le saunoaga lea a Patea.

Na faailoa e Patea ia Sene, le taumafai lea o le ali’i fa’amasino e tali le fesili faigata sa i o latou mafaufau, pe tatau ona taofia o ia i le falepuipui mo le umi e 12 tausaga.

“Sa matou vaavaai i le laititi o lou soifua, ae o le 12 tausaga o se taimi umi tele lea. Sa matou vaavaai fo’i i le tele o isi solitulafono e a’afia ai tama’ita’i ua oo mai i luma o le fa’amasinoga, fa’atusatusa lea i lau solitulafono, ma matou iloa ai, e fai lava si matuia o le gaoiga sa e faia. Ui o lea, ua matou manatu e tu’u atu le avanoa mulimuli lenei mo oe, o le a le taofia oe i le toese mo le 12 tausaga, ae o le a tuli fa’atasi lau fa’asalaga, lona uiga, o le a na o le 7 tausaga e loka ai oe i le falepuipui,” o le saunoaga lea a Patea.

O isi tuutuuga o le fa’asalaga a Sene, o le lesitalaina lea o ia i le lisi o tagata ua ta’usala i le faia o uiga mataga i fanau laiti, ma ia faia se suiga o le siama o le HIV i lona tino.

O le aso 31 Oketopa 2017 na pu’e fa’apagota ai e Leoleo ia Sene, i le mae’a ai lea ona faila e le tama’ita’i na a’afia o sana tagi fa’asaga ia te ia, i lona ave lea o ia i se fale tuufua i Nuuuli ma fa’amalosi ai o ia.

Na taua e le tama’ita’i na a’afia i Leoleo e fa’apea, na fiu e tete’e Sene peita’i sa matua malosi lava o ia, ma i’u ai lava i lona fa’amalosi ona faiaiga ia te ia.