E LE O OE O SE SULI MONI

Vaega 132

O le naunau o le tama’it’ai o Ianeta na te fia iloa pe i ai se mea ua tupu i le Tina o si ona to’alua, na oso atu ai ma uu le lima o Laneselota ma fa’apea atu i ai, “Honey, e i ai se mea ua tupu i si o tatou Tina”. E le i gagana Laneselota i se upu, se’i vagana ai lona pulunaunau atu i lona to’alua, la te faanatinati atu i le fale a nai ona matua se’i vaai poo a mai laua. “Se honey, e i ai ea se mea ua tupu i le olomatua ua mafua ai ona e natinati mai fa’apena”. E pisi lava Ianeta i le tau faamaulu lona ofu ma fesili lava ia Laneselota i lona fia iloa poo a mai le olomatua ma le toeaina. O le fafine o Lucy i le taimi lea, ua le mautonu lona mafaufau ona o le alofa ia Laneselota ma ona matua. “Vaai oulua si a’u fanau, o mai loa e o manu e lei taitai le afiafi, a oulua taunu’u i le fale ae i ai se mea o tupu, ia vave fa’afesoota’i mai a’u poo le lua Tama fo’i.” Na ona mae’a lava ona sauni o Ianeta ma Laneselota, tuli oso loa i le ta’avale ma aga’i atu loa i le aai o loo i ai matua o le tamaititi milionea. E lei leva ona alu ese atu le ta’avale a Ianeta ma lona to’alua ae taunu’u loa le ta’avale a le tamaloa o Meki ua fo’i mai. “Talofa oe si a’u pele Lucy, a o fea si a’u fanau”. O le fesili fia malamalama atu lea a le tamaloa o Meki. “E te iloa oe si o’u to’alua, o loo faatopetope atu i laua i le fale o matua o Laneselota, pei uma lava e i ai se mea o loo tupu i le olomatua ma le toeaina na mafua ai ona vili mai le olomatua ma la talanoa ma Laneselota, o le mafua’aga lena o le toe fa’anatinati atu o si a’u fanau i le la itu o le aai.”

Na vaaia e Lucy foliga popole o si ona to’alua, ona ia fesili lea pe i ai se mea o tupu. “E leai se mea o tupu, pau lo’u popolega, o lea fa’atoa maua mai si a’u fanau na ave fa’amalosi e le fafine o Mekala ma lana vaega faatupu fa’alavelave. O lea la ou te popole ina ne’i toe tula’i mai fo’i se tulaga fa’apena ao la aga’i atu i luga o le ala, ae aua e te popole o lea o le a ou valaau i la’u vaega e galulue ane e fesoasoani ia Ianeta ma Laneselota.  O le naunau o le tamaloa o Meki ina ia mautinoa e saogalemu i sana fanau, na ia fa’afesoota’iina ai loa lana vaega ma fa’ailoa i ai si ana fanau lea o loo aga’i atu i luga o le ala i le ta’avale a lona to’alua, e fia aga’i i le nofoaga o tagata milionea e asi matua o le ali’i o Laneselota. “Boss, aua e te popole, o lea lava matou te tiute i le vaega tonu lava o le aai lea e te talonoa mai ai.” E le i uma lelei atu le talanoaga a Meki ma lana vaega ae vaaia loa e le vaega a Meki le pasi ane o le ta’avale a laneta ma lona to’alua i se saoasaoa uiga ese, ona faia ai loa lea o le tonu o le a latou mulimuli i tua o le ta’avale ina ia mautinoa lo laua saogalemu. O le naunau tele o le ali’i o Laneselota i le fia oo i le fale a ona matua, na ia le manatu ai lava i tulafono i luga o le alatele i totonu o le aai o tagata milionea, ae ua atili ai le saoasaoa o le ta’avale i lona fia oo atu lea i le fale o loo i ai ona matua.

E taunu’u atu le ta’avale i le pa muamua lava o loo pito i fafo o le lotoa, o loo loka, e le o i ai fo’i se Leoleopo i le faitoto’a. Na ona fiu lava o Laneselota e tauvalaau se Leoleopo, aapa ane loa ma le ali’i i lana fuifui ki o loo i ai ma aumai ai le ki o le faitoto’a ma tatala ai loa le pa ae la ulufale i totonu. O le lotoa e ulufale i totonu o le fale o le ulugali’i milionea lenei, e leai lava se isi tagata e i ai ki o le ulua’i faitoto’a, se’i vagana ai lava le ulugali’i ma le tama o Laneselota. E taunu’u atu Laneselota ma Ianeta i le faitoto’a lona lua, o loo tiute mai ai le Leoleopo. E fou le vaai a le Leoleopo i le ta’avale lea o loo aga’i atu, o le mafua’aga lea na tuai ai ona ia tatalaina le faitoto’a, ae sa savali i fafo na te fia iloa poo ai o loo alu atu i le ta’avale. “Faamolemole, tatala le faitoto’a mo a’u.” O le augani ane lea a Laneselota i le Leoleopo na vave ai ona tatala le faitoto’a ma ulufale ai loa le ali’i ma lona to’alua i totonu o le lotoa. O se vaaiga fa’anoanoa na vaaia e le ali’i, ina ua tau atu lana vaai i nai ona matua, o loo nonofo mai i luga o le nofoa ma foliga fa’anoanoa, e pei uma lava ua i ai se mea ua tupu.