Le faigofie fela'ua'iga o uta ma pasese i Manu'a

O le fa'atinoga o tiute o le 'auva'a ma kapeteni o lo'o nafa ma le fela'ua'iga o oloa ma uta fa'apea ma le tautuaina o pasese femala'i i le  "MV Manu'atele" e le faigofie lava, aua e le taula sa'o le va'a i le Uafu i Faleasao, ae tu mai tai, ae fela'ua'i uma uta ma pasese e fa'aaogaina ai le tama'i va'a afi "Uilaolesami."

Ina ua maua le avanoa e fa'atalitalia ai se avanoa e malaga mai ai i Tutuila e ala i lea Sa o le malo, sa maua fo'i se taimi e va'ai patino ai i le fa'atinoga o faiva ma tiute o le auvaa ma Kapeteni, ua iloga ai le fitaituga o lo'o feagai pea ma i latou a'o fa'atino latou tiute e tautua ai le mamalu o le Manu'atele.

O le va'aiga i le feoa'iga o tagata po'o pasese a le va'a, e leai se faigofie, aua e oso i lalo mai le Uafu i Faleasao pe tusa ma le 6 futu i le Uilaolesami, ma toe oso i luga o le Manu'atele. E leai se apefa'i e fa'afaigofie ai mo tagata matutua, e feololo lava mo tupulaga talavou, ae o tama ma tina matutua e tau si'i i latou.

E fai galuega uma i le mugala i luga o le Uafu, a timu fo'i ona faia lea i timuga. O oloa ma mea uma e la'u atu ma fa'aputu i le mutinitini o le la. A'o le 'au fa'atali avanoa i le taimi e fa'ato'a tatala ai le o atu i luga o le va'a, e pae i lalo o niu lea e tuafale mai i ai le Uafu i Faleasao.

Afai ae tagai i ai se Korea po'o se Saina, e toeititi ona fa'aaoga tatau lea e se faipisinisi mai Asia lea avanoa, e lisia ai se fale o lena a'iga e lumafale i le Uafu, e fa'atula'ia ai se faleoloa ma toe fausia sina fale e fa'amalu ai le au pasese uma lea e su'e lava lau aulama e saofa'i lelei ai i lalo o le niu. A uma fa'aaoga fo'i e taotooto ai ma tapua'ia faiva o tama ia mae'a ona fa'ato'a maua lea o se avanoa mo le Manu'atele.

O aga fa'apenei, ua manatu le to'atele ua le toe faia i Amerika Samoa. Ua tatau ona mae'a tapena tautua uma, ae ua le mautinoa fo'i, po'o iloa nei mea uma ma taumafai lea e faia se fale fa'atali pasese e pei o le uafu laititi i Fagatogo nei.

Ua fa'ailoa mai e nisi o le Manu'atele, "E fa'apena uma lava matou Uafu!"

Ali'i fo'i ma Faipule o le Manu'atele, ua tatou le toe feoa'i mai i Va'a, ua outou fiafia e feoa'i mai i va'alele, ae le gapatia fa'atasi ma o outou tagata o itumalo. Va'ai se suiga lelei e ao ina faia, ia mautu mea e fa'aaoga e le auva'a ma Kapeteni, ae maise o tagata lautele o lo'o femalaga'i ma uta o mea taumafa e fa'aaoga mo le soifua maloloina.