Fasi lona to’alua ina ua musu le fafine la te momoe

E 7 moliaga mama ua tu’uaia ai e le malo se Tama, ona o tu’uaiga i lona fa’aoolima lea i lona to’alua, ina ua musu le fafine la te momoe.

Na taofia e Leoleo le ua molia i le toese i Tafuna i le po o le aso Lua na te’a nei, ma tula’i ai o ia i luma o le Fa’amasinoga Fa’aitumalo i le taeao o le aso Lulu na sosoo ai. Na teena e le ua molia moliaga fa’asaga ia te ia, ma fa’atulaga ai loa e le afioga i le Tama’ita’i Fa’amasino ia Gwen Tauiliili-Langkilde le $300 e totogi ona fa’atoa mafai lea ona tatala o ia i tua e fa’atali ai taualumaga o lona fa’amasinoga.

Afai ae mafai ona tatala o ia i tua, ua fa’asa ona ia toe taumafai e fa’afesoota’i lona to’alua i soo se auala, pe na te toe taumafai fo’i e faia ni uiga e ono fa’amata’u ai o ia. Ua faasa ona ia toe tagofia le ‘ava malosi poo fualaau fa’asaina, ma ia auai i soo se taimi e valaau ai lana mataupu.

Na finau le loia a le ua molia ia Ryan Anderson e tatala o ia i tua e aunoa ma se tupe e totogi, peita’i na tete’e i ai le loia a le malo ia Bianca Lherisson. Na taua e le loia a le ua molia e fa’apea, e ui i le matuia o le faalavelave sa tula’i mai, peita’i o se taimi muamua lea ua aafia ai le ua molia i se solitulafono.

Na tete’e i ai le loia a le malo. Na taua e le loia a le malo e fa’apea, e le tatau ona tatalaina i tua le ua molia e aunoa ma se tupe totogi, ina ia mautinoa e le toe tula’i mai le fa’alavelave e pei ona a’afia ai lona to’alua.

Na talia e le afioga a Tauiliili-Langkilde le talosaga a le malo ma ia fa’atulaga ai loa le tupe e $300 e totogi ona fa’atoa mafai lea ona tatala le ua molia i tua.

Na taua i fa’amaumauga a le fa’amasinoga e fa’apea, o lenei mataupu na tofu atu i le Ofisa o Leoleo, ina ua faila e le fafine lana tagi fa’asaga i lona to’alua, e tusa ai o se faalavelave na tula’i mai i lo latou aiga.

Na taua i fa’amaumauga a le fa’amasinoga e fa’apea, na avea le ita o le ua molia ina ua musu lona to’alua e avatu se tupe ia te ia, ma auala na amata ai loa ona fa’amisamisa, sosoo ai ma le tauai solo o meatotino i totonu o le fale, seia oo ai lava i lona faaoolima i lona to’alua.

O le fefe tele o le fafine i gaioiga a lona to’alua sa faia ia te ia, na mafua ai ona e e i luga i lona fia maua o se fesoasoani. O le ita tele o le ua molia i le e e i luga o lona to’alua, na la’a atu ai loa i tua i le umukuka o le fale ma aumai le agaese, ma savali atu ua tuu i le ua o lona to’alua ma folafola i ai lana mea e fai ia te ia, pe afai e fa’aauau pea ona e e i luga.

O le fefe tele o le fafine i lona ola na mafua ai loa ona usita’i ma le toe e e ai loa i luga.

O le aso na sosoo ai, na toe tula’i mai ai fo’i le isi fa’alavelave ma faaoolima ai fo’i le ua molia i lona to’alua. Na taua e le fafine i Leoleo e fa’apea, i le aso na sosoo ai, na alu atu ai lona to’alua ia te ia mo se la mafutaga fa’aleulugali’i, peita’i sa ia teena ma fai i ai e leai.

O le ita o le ua molia ina ua le taliaina e le fafine lona fanoga mo se mafutaga fa’aleulugali’i, na ia toe faaoolima ai fo’i ia te ia e ala i lona ta tu’i o ia.

Ua poloaina e le fa’amasinoga le ua molia ina ia aua ne’i toe taumafai e fa’afesootai lona to’alua i soo se auala, ma ia saili fo’i se isi nofoaga e nofo ai ao fa’agasolo ai lana mataupu.

O le aso 30 Iulai lea ua fa’atulaga e toe fofogaina ai lana mataupu i luma o le Fa’amasinoga o Aiga, Ava Malosi ma Fualaau Fa’asaina.