Tala I Vaifanua

FAIA'OGA LEONE MAUA FA'AILOGA FA'APITOA "2018 HTOY"

Ia Iuni 14, 2018 ua fa'alauiloa ai le faamanuiaina o le tama'ita'i faia'oga o le Tala Fa'asolopito o Amerika ma le Lalolagi i Leone, Latalata Samuelu i le fa'ailoga fa'apitoa mai le Gilder Lehrman Institute of American History mo teritori uma o Amerika. O se taimi muamua lenei ua maua ai e se tasi o faia'oga mai le tatou teritori lea fa'ailoga, ma o se fa'aeaga sili ona matagofie fo'i ua ausia e se tasi o faia'oga o lea mataupu i le tatou atunu'u.

O le Gilder Lerhman Institute latou te ofoina i Faia'oga o le History i vaega eseese o le Iunaite Setete fa'ailoga e taualoa ai latou agava'a ma le a'otauina o fanau i lea mataupu aoga, peita'i ona sa milo fa'atasi uma vaega eseese o le Malo Tele ma faia'oga lautogia mai teritori uma o Amerika, ae ua i'u nei le tausinioga a Samuelu o le avea ma sui mo Faia'oga uma i le vasega o Teritori uma o Amerika e tauva fa'atasi ma faia'oga o le Iunaite Setete i ona vaega a le District of Clumbia ma Faia'oga fo'i mai le Department of Defense Schools. O faia'oga e agava'a mo lea tauvaga e a'oa'oina e i latou le History i vasega mai le K5 se'ia o'o i le Level 12.

O Samuelu sa maua lona fa'ailoga Bachelor's mai le Iunivesite o Pasefika i Saute i Suva, Fiti i le tausaga e 1999. Ona amata ai lea ona avea ma faia'oga i le Samoa College i Vaivase, Samoa ma si'itia mai ai e avea ma faia'oga i Amerika Samoa i le tausaga e 2001.

Na faia'oga fo'i o ia i le Mataupu Igilisi, peita'i ua avea nei ma faia'oga o le Tala Fa'asolopito po'o le History. Ua faailoa e ia lona fiafia i tala fa'asolopito fa'apea ma mataupu tau faigamalo, ma ua avea lea ma ala e fiafia ai e a'oa'o le fanau i le Tala Fa'asolopito o le latou Malo tele o Amerika.

E ese mai lona mauaina o le fa'ailoga tupe e $1,000 fa'atasi ai ma se fa'alauiloaga aloa'ia o lenei matati'a ua ia mauaina i Amerika Samoa, o le a taua'aoina fo'i ia te ia se vala'aulia fa'apitoa e auai atu ai i le 2019 Gilder Lehrman Teacher Seminar e faia mo le vaiaso atoa ma e fa'atautaia nei seminar e nisi o faia'oga o le talafa'asolopito lauiloa o le Iunaite Setete o Amerika. E i ai fo'i foa'i tusi o le tala fa'asolopito o Amerika o le a ia mauaina.

Peita'i o le taua'aoina aloa'ia o le fa'ailoga fa'apitoa mo le Faia'oga e mauaina le History Teacher of The Year 2018 e faia lea ia Oketopa 10, 2018 i le fa'atasiga i le a'ai o New York.

FA'AILOGA 50 TAUSAGA O LE MANU'A HIGH SCHOOL - IUNI 2018

Na vave tu'ua e le afioga le Kovana Sili Lolo Moliga ma le aumalaga e to'atele o le komiti o le fa'ailogaina o le 50 tausaga o le A'oga Maualuga a Manu'a le motu nei i Tutuila i le aso Tofi o le vaiso ua te'a, 14 Iuni, ina ia latou auai i le sauniga mamalu na fa'amanatu ai le atoaga o le 50 tausaga o le a'oga Maualuga i Manu'a.

O lenei fa'amoemoe sa amata tapena mai e le Komiti tofia e fa'atautaia sailiga tupe ma fa'amaopoopo mai agaga o i latou uma na soloa'i ane e a'o'oga ma fa'au'u mai ai foi i lenei a'oga maualuga talu mai lona faatuina i le tausaga e 1966.

Peita'i, na fa'ailoa e nisi o i latou sa mua'i foa'i mo le fa'amoemoe, "O lea lava e tatalia se isi fa'asalalauga fa'alaua'itele o le fa'atasiga, ae o lea au maua mai iinei, ua mae'a na faia ananafi. O se mea e ofo ai fo'i nei mea, sa manatu lava e tu'ufa'atasia uma taumafaiga i Tutuila ona fa'ato'a omai fa'atasi lea i le aoga mo se fa'ailogaina matagofie e faia fa'atasi ai."

Ua le manatu lenei sui e faalauiloa lona suafa, ona o lo'o te'i fo'i o ia, ua faia lea sauniga sa tatau lava ona auai fo'i o ia, ma e i ai fo'i ona lagona o'otia ona ua le auai.

Peita'i i le sauniga sa fa'atautaia mai le itula e 1:00 i le aoauli se'ia pa'ia le itula e 4:00 i le afiafi sa fa'ataunu'uina lea i le Faleta'alo o le A'oga Maualuga. Sa faia lava sao o le fanau aoga tulaga muamua fa'apea le aoga maualuga, i a latou fa'afiafiaga ae maimoa fo'i le vasega o sui iloga na vala'aulia fa'apitoa mo le fa'amoemoe.

O le afioga le Faipule i Konekeresi, Aumua Amata sa auai, fa'apea le Kovana Sili, Senatoa Nuanuaolefeagaiga Saoluaga Nua, auai fo'i le Faipule Fetu Fetui Jr o le Sui i le Maota o Sui, fa'apea Faipule Autele Faufano, Fa'atonusili o A'oga Ruth Matagi Tofiga, Komesina o Leoleo Le'i Sonny Thompson, ma isi fa'apea sui mamalu foi o sui o le Komiti Talia Fa'afetai Iaulualo, Fauifono Vaitautolu, Sala Filoiali'i Mataali'i ma le susuga Mataalii ae maise ma isi o i latou uma na mafai ona o'o atu i le Manu'atele mo lea fa'amoemoe taua.

I le sauniga o le fa'au'uga sa fa'ato'a latou taua'aoina ai fa'ailoga fa'apitoa e lua na tapena amata i lenei tausaga, o le sao fo'i o le Sosaiete a Tama ma Teine Tuai o le Aoga Maualuga a Manu'a, e fa'aauau lea i tausaga ta'itasi ao aga'i i luma le tatou soifua galulue ma a'otau fanau a le Manu'atele i le Laumua o le Segaula.

O nei fa'ailoga taua, na foa'iina lea i se tasi na a'oa'oina mai le Manu'a High ua iloga lana tautua i le Malo o Amerika Samoa, lea sa taua'aoina lea i le afioga le Kovana Sili Lolo Matalasi Moliga.

A'o le fa'ailoga lona lua, ua taua'aoina lea i le sui togisilia i tausaga ta'itasi e soloa'i mai, ina ia avea o se sikolasipi e fesoasoani i lea segaula e totogia ai ana a'oga i le Kolisi ua ia filifili e ulufale i ai, pe a mae'a fa'au'u mai le Manu'a High.