Tala I Vaifanua

FA’AAUAU FA’ALAUILOA US COAST GUARD I AOGA MAUALULUGA

Ua i ai le sui o le US Coast Guard (USCG) ua toe fa'asolo mai le taumafaiga e fa'aulufale nisi o fanau a'oga talavou i lea vaega a le malo tele.

O ia lea mai le lala o le USCG i Hawaii o Manny Ramirez, ua ia fa’aalia, "Ua i ai nisi o le fanau fa'au'u [i le teritori] ua mae'a talia mai e le matou vaega, ma ua avea ma se fa'amalosi'au matou te o mai pea lava, aua o lenei le lala o le Vaega Au a le Malo tele e le o to'atele nisi o alo o Amerika Samoa o lo'o tautua ai."

Mai le fa'au'uga a le Manumalo Baptist Academy na mavae atu nei, e to’atasi ua mae'a tapena mo le USCG. Peitai o loma pea fa’auuga a le tele o aoga maualuluga i le teritori.

I le fa'alauiloaga sa faia muamua mai le amataga o lenei tausaga, sa o'o mai ai fo'i sui e to'alua ma la'ua folasia, "O le US Coast Guard ua le a'oa'oina oe e te tau i le taua, ae ua a'oa'oina oe e puipui fa'apitoa le talafatai o le Iunaite Setete ma Teritori uma o Amerika. E tatau ona iloa lelei fo'i puipui ma leoleo lou saogalemu e pei lava o isi lala, ae ua le tofia oe ina ia e auai i le tafa o taua i le taimi o vevesi."

O lea se isi ala ua manatu ai nisi o Matua ina ia una'ia nai o latou fanau i lea lala o le Vaega Au, ma e tele na'ua fo'i penefiti e manuia ai i latou pe afai o le a mae'a le tautua, e pei lava o isi vaega uma o le Vaega Au.

Ua mafai ona maua avanoa o fanau a'oga e fesiligia uma ai fa'amaumauga i totonu o latou lotoa lea ua fa'asolo atu ai le sui na malaga mai a le USCG.

O Ramirez sa malaga muamua mai fo'i fa'atasi ma MST1 Derek Franklin, e amata lenei faiva i le teritori, peita'i o lea ua malaga mai nei na'o ia, e fa'atauanau le fa'amoemoe i vasega fa'aiuaso ua mae'a su'ea le su'ega a le ASVAB ma ausia le 33 le maka lea e ulufale ai i lea tautua.

Ona e fa'alagolago fo'i fa'aiuga a le fanau i matua i lenei vaitau, o lea e tatau ai ona fa'afesiligia e le matua le saogalemu o lona alo, ma ua fesiligia ai Ramirez, ae fa'ailoa mai e ia, "Afai e te manatu i lea tulaga ina ia mautinoa le toe taliu mai o lou alo ma le manuia e tautua fo'i lona malo na soifua a'e ai, e tatau ona e filifilia le US Coast Guard, e le tau ae puipui. E pule lava fo'i le tamaititi talavou pe fa'atutu lana sailiga i avanoa fa'aofisa e le malaga i luga o va'a i le sami ma va'alele i le ea, e faia lava e ia lena fa'ai'uga. O le to'atele lava e mafai ona talosaga pe mafai ona toe tautua i lona lava malo sa ulufale atu ai ma soifua a'e ai fo'i."

TATALA I TAFUNA OFISA S.B.A FA’AUAU AI TAUTUA ‘AFA O GITA

Ua se’e atu i le maota o le Veterans Memorial Center i le Tafuna Industrial Park, le tautua a le Ofisa fesoasoani mo pisinisi a le malo tele, Small Business Administration (SBA), e fa’auau ai, ae ua tapunia le ofisa lea sa faaogaina i Pago Pago e tautua ai le mamalu o le atunu’u e faia maua fesoasoani e ala i nonogatupe talu mai le ‘afa o Gita i le amataga o le tausaga lenei.

O le aso 4 o Iuni lea ua amata ai le SBA i lana tautua o le Disaster Loan Outreach Center (DLOC) i le nofoaga i Tafuna. Ma e tatala le ofisa mai le 8a.m e o’o atu i le itula e 4p.m. mai le aso Gafua e o’o atu i le aso Faraile.

E ui ina ua mae'a tapunia le toe fa'aulu mai oni talosaga mo se nogatupe e fesoasoani i pisinisi, fa’alapotopotoga, ma tagata lautele sa afaina i le ‘afa o Gita, ae ua fa’ailoa mai e le SBA o lo’o i ai pea le avanoa - e oo atu ia Tesema 3, 2018 - e mafai ai e pisinisi ma fa’alapotopotoga tu-maoti ona fa’aulutalosaga mo nonogatupe e fesoasoani i le afaina o le tamaoaiga (economic injury)  talu mai le ‘afa.

E maua fa’amatalaga i le https://disasterloan.sba.gov/ela.

Ua fa’ailoa mai foi e le so’oupu a le SBA, le tamaitai ia Yolanda Stokes e fa’apea e oo mai i le aso Tofi o le vaiaso ua te’a tusa ma le $8.1 million, mai talosaga e 543, ua maea ona talia e le SBA mai pisinisi ma tagata lautele sa afaina ia Gita.

Fa’aalia e nisi o aiga sa afaina o latou fale i le ‘afa, e fa’apea ua fiafia i latou i nei fesoasoani mai le SBA, e mafai ai ona toe fa’alelei o latou maota. O se tasi o tulaga fiafia, ona o le maualalo o pemeni i le masina i nei nonogatupe mai le SBA.

FA'AALIGA SIKAILI ESEESE - FAIA I LE TERITORI MA TAUVA I FAFO

O le isi lea oloa ua matua tele fefa'ataua'iga ua maua ai e Amerika Samoa se vaega tele o le tamaoaiga, o le gaosia lea o lavalava ma fa'atau atu. Sa faia fo'i fa'aaliga o lavalava ua mae'a su'ia ma ua su'i aga'i i sikaili matagofie e fa'aonomea atili ai i latou e la'eia, ma fa'afiafiaina ai i latou e toe fa'atau ma saga fa'atau atu i a tatou laina o fefa'ataua'iga i luga o le initeneti.

O i la'ua e ona le pisinisi o elei vali ma tusia lava e i la'ua, "Off Da Rock Designs" Leuila ma Joseph Ioane, ua iloga mai ua i ai le avanoa matagofie mo i la'ua e avatua ai la'ua lavalava ua mae'a mamanu i a la'ua elei vali i Lonetona le Laumua o Peretania.

O se fa'aeaga sili lea ua maua e i la'ua, ma e vi'ia fo'i le Atua i le fa'asoa o taleni i le fanau talavou, aua e talavou lea aiga, ae ua la'ua faia se pisinisi e matua taulia ana oloa.

E le gata ia i la'ua nei, ae isi pisinisi ua fai si umi talu ona tautuaina Amerika Samoa, le Island Image o lo'o fa'atautaia e le tama'ita'i o Terry Steffany, ma le Lalelei Designs & Store i le Laufou Shopping Center lea ua fa'atautaia e le tama'ita'i faipisinisi o Christinna Lutu Sanchez, ma le MENA designs fo'i lea ua matele ina lavalava ai le to'atele o alo o Samoa o lo'o alaala ma galulue i so'o se setete o Amerika ma isi atunu'u i fafo.

“Ua fa'aleleia atili a outou auaunaga ona o ala o feso'ota'iga i le initeneti, e mafai ai ona maketi oloa e ala i le Facebook ma Websites ma avatu ai i fafo le lalelei fo'i o a outou mamanu ma suiga o lavalava matagofie,” o se tasi lea o fa'amatalaga a le tina o Leuila Ioane, ina ua maimoa i le matagofie o le fa'aaliga na auai le OffDa Rock ma ua maua ai fo'i ma le vala'aulia fa'apitoa e auai atu i Lonetona i lenei masina mo le fa'aaliga tele lea i Europa.

"O le vateatea e muta ai lou avanoa...o lona uiga e leai se muta'aga o manuia pe afai e te loto i ai,” o se tasi lea o manatu fa'amalosi ua maua e i la'ua mai a la'ua uo mamae ma aiga.