Amata aloaia fa’amasinoga autu o se ali’i Leoleo Falepuipui o Tamaiti

O le aso Lua na te’a nei na amata aloaia ai le fa’amasinoga autu o se ali’i Leoleo sa galue i le Falepuipui o Tamaiti i Tafuna (JDC), lea o lo o tu’uaia i moliaga eseese e aofia ai le fa’ataga o tamaiti e sosola i tua, umia faasolitulafono o fualaau fa’asaina, atoa ai ma le gaoi.

E 13 moliaga o lo o tu’uaia ai e le malo ia Okesene Alo. O ia moliaga e aofia ai moliaga mama e 3 o le faia o gaioiga e lamatia ai le saogalemu o fanau laiti; faapea ai  ma moliaga mamafa e 10 e aofia ai moliaga e 2 o le umia faasolitulafono o vaega o le fualaau faasaina o le aisa; 2 moliaga o le umia faasolitulafono o le aisa ma le fa’amoemoe e fa’atau atu i isi tagata; 1 le moliaga o le gaoi; 3 moliaga o le fa’ataga o tamaiti e sosola i tua, ma moliaga e 2 o le fesoasoani lea i fanau e tagofia fualaau faasaina ma le ‘ava malosi.

O le tama’ita’i loia sili lagolago ia Christy Dunn o loo tula’i mo le malo i lenei mataupu, lea e fesoasoani i ai le Loia Sili lagolago ia Lornalei Meredith, fa’atasi ai ma le ali’i Leoleo sa autu i ai le suesueina o lenei mataupu, susuga Det. Filemoni Amituana’i.

O le ali’i loia ia Richard deSaulles o loo tula’i mo Alo, ae lagolago i ai le ali’i loia ia William Olson, o i laua uma ia e o mai i le Ofisa Loia a le RDA Law Firm.

E to’a 6 sui o le vaega iloilo iuga o loo latou iloiloina se fa’aiuga amiotonu o lenei mataupu, lea e aofia ai tama’ita’i e to’alua ma ali’i e to’afa.

ULUA’I FOLASAGA A LE MALO

Na taua e le loia a le malo i lana ulua’i folasaga e fa’apea, o le nofoaga o le JDC lea e taofia ai tamaiti laiti, e faapitoa lava lea mo fanau ua tuuaia i solitulafono, poo i latou foi ua tuli faasalaga ina ua faamaonia solitulafono. O i latou ia e amata mai i le 10 e oo atu i le 18 tausaga le matutua.

I le masina o Iuni 2016, o Alo, sa avea ma se tasi o ia Leoleo na galue i le JDC.

I le va o le masina o Aperila ma Setema 2016, o le taimi lea o loo tuuaia e le malo na fa’aauau ai ona le usitaia e Alo tulafono a le JDC, e aofia ai ma le le amanaia o aia tatau o fanau sa taofia ai.

E le gata na ula e Alo le fualaau o le aisa i totonu o le JDC, ae sa ia fa’atau atu foi i tamaiti laiti. Sa ia tuuina atu ia te i latou le ‘ava malosi, na te tuua lana sifi i le po ae alu e fai isi mea e mana’o i ai, na te aveese mai fo’i meaai mai le JDC e fa’afesuia’i ma fualaau faasania e aunoa ma se fa’atanaga. Na te fa’ataga fo’i isi tamaiti e vili a latou matua mo ni tupe e fa’atau ai fualaau fa’asaina.

Na taua atili e Dunn e fa’apea, o nisi o po e alu ai Alo ma ave nisi o tamaiti e vaai o latou aiga ma matua, ae o tamaiti nei e le fa’atagaina ona o latou tuua le lotoa o le JDC.

O le aso 15 Setema 2016 na maua ai loa Alo, ina ua molimauina e se isi Leoleo se tamaititi o lo o loka i le JDC, e foliga mai o loo lele o ia i fualaau faasaina. Na logoina Leoleo e tusa ai o lea vaaiga, ma faia ai loa se suesuega faapitoa i le tamaititi pagota lea.

Sa faia se suega i le tino o le tamaititi ma faamaonia ai, o loo i lona tino le vailaau oona o loo maua i le pauta o le aisa.

Na taua e Dunn e fa’apea, ina ua fesiligia e Leoleo le tamaititi pagota lea, sa ia faailoa i ai, o fualaau sa aumaia i le ato fa’afafa a Alo sa ia ulaina. O iina na amata ai loa ma le suesuega faapitoa a Leoleo e tusa ai o le mataupu lea ua mafua ai ona molia Alo ma ni isi o Leoleo sa galulue i le JDC.

ULUA’I FOLASAGA A LE ITU TETE’E

Na tatala le ulua’i folasaga a deSaulles i lona talosagaina lea o ali’i ma tama’ita’i iloilo iuga, ina ia tatala o latou finagalo ma fa’afofoga fa’alelei i molimau eseese o le a tuuina atu e le malo, ona e fai lava si umi o le fa’amasinoga lea ua latou aga’i atu i ai.

Sa ia faailoa i le vaega iloilo iuga e fa’apea, o loo finau le malo fai mai, o Alo o se tagata leaga, o ia fo’i lea o le ta’ita’i o le mataupu e pei ona tula’i mai i le JDC, peita’i o molimau o le a latou fa’afofoga i ai, o Alo o se tagata lelei, loto alofa ma fesoasoani.

Na taua e deSaulles e fa’apea, sa vaaia e Alo se tasi o tamaititi pagota o loo faanoanoa i le misia o lona aiga, ona ia faia lea o le faaiuga e fa’ataga ai lea tamaititi e vili ona matua e talanoa i ai. Sa vaaia fo’i e Alo isi tamaiti ua feita i le le lava o meaai, ona saili lea e Alo o meaai e fafaga ai i latou.

Sa ia taua atili fo’i e fa’apea, o le a faailoa mai e molimau, o le tele o tausaga o le auaunaga a Alo i le JDC, sa latou galulue ai ma tagata gaoi, tagata ulaula fualaau faasaina, faapea ai ma tagata solitulafono. O ia tagata, o isi fo’i Leoleo.

“O le a faailoa e molimau ni isi o Leoleo sa latou avatu i totonu o le JDC fualaau faasaina ma le ‘ava malosi. Sa latou gaoi meaai ma faataga tamaiti e ula fualaau ma inu le ‘ava malosi,” o le saunoaga lea a deSaulles.

Sa ia taua e fa’apea, ina ua fesiligia e Leoleo ia Alo e uiga i lenei mataupu, sa teena e Alo lona tagofia o fualaau faasaina, poo lona faia o se isi lava gaioiga e le tusa ma le tulafono.

O le itula e 9:00 i le taeao nei lea ua fa’amoemoe e toe fa’aauau ai lenei mataupu.

O le afioga i le Fa’amasino Sili ia Michael Kruse o lo o fa’atonutonuina lenei mataupu, fa’atasi ai ma le lagolagosua a afioga i ali’i Fa’amasino Lagolago ia Mamea Sala Jr ma Tunupopo Alalafaga.