Tala otooto mai le Fa’amasinoga

CAROLINE PURCELL

O le vaiaso na te’a nei na tuuina atu ai le fa’aiuga a le afioga i le ali’i Fa’amasino ia Fiti Sunia, e fa’aleaoga ai le nofovaavaaia a se tama’ita’i e 19 tausaga le matua, ona o lea ua fa’amaonia lona le usitaia o tuutuuga o lana nofovaavaaia sa tuuina atu e le fa’amasinoga i le amataga o le tausaga nei.

E le gata la ua fa’aleaoga e le fa’amasinoga tuutuuga o le nofovaavaaia a Caroline Purcell, ae ua poloaina fo’i o ia na te tuliina aso e 44 ia sa fa’amalumalu mai lana mataupu i le amataga o le tausaga nei i le toese i Tafuna.

O ni isi o tuutuuga o le nofovaavaaia a Purcell e 24 masina le umi na tuuina atu e le fa’amasinoga, ina ua ta’usala o ia i le moliaga o le tagofia o le ‘ava malosi ae lei atoa lona 21 tausaga, atoa ai ma le moliaga o le fa’atupu vevesi i nofoaga faitele, o le avea lea o ia ma tagatanu’u lelei e tausisi i soo se tulafono a le malo, ma aua fo’i ne’i ona toe solia se tulafono.

O le masina o Aperila na te’a nei na ta’usala ai e le Fa’amasinoga Maualuga ia Purcell i le moliaga mamafa o le gaoi, ma poloaina ai loa o ia na te tuliina masina e 4 i le toese i Tafuna, o se tasi lea o tuutuuga o lana nofovaavaaia e 5 tausaga.

O le nofosala ai o Purcell i luma o le fa’amasinoga maualuga i le solitulafono mamafa o le gaoi, ua atagia mai ai lona le usitaia o tuutuuga o lana nofovaavaaia i luma o le fa’amasinoga fa’aitumalo.

Ina ua fesiligia e Sunia ia Purcell i le vaiaso na te’a nei, na ta’utino ai lea tama’ita’i talavou, i lona le usitaia lea o tuutuuga o lana nofovaavaaia.

E 44 aso lea na poloaina o ia e le fa’amasinoga faaitumalo na te tuliina i le toese i Tafuna, peita’i, mo se fa’amama avega mo ia, o le a aofia ai aso na taofia ai o ia i le toese i le taimi na tuli ai lana fa’asalaga fa’a falepuipui ina ua fa’asala o ia e le fa’amasinoga maualuga i le masina o Aperila.

Lona uiga, e le toe i ai se isi taimi e toe tuli e Purcell i le toese. Ua poloaina fo’i o ia ina ia usita’i ma tausisi i tuutuuga o lana nofovaavaaia.

JANE VASA

O le aso 29 Iuni lea ua toe tolopo i ai e le Fa’amasinoga Fa’aitumalo le lauina o le fa’asalaga o Jane Vasa, ona o lo o mana’omia pea e le Ofisa Nofovaavaaia se taimi e fa’amae’a ai le tapenaina o le ripoti e tatau ona tuuina atu i le fa’amasinoga, e fuafua i ai se fa’asalaga mo lenei mataupu.

O Vasa, o le isi lea e to’atolu i ai i latou o loo molia i le mataupu lea na fa’aaoga fa’agaoi ai pepa taumafa mai le polokalame a le Matagaluega o Auaunaga ma Tautua Lautele a le malo (DHSS).

Na ulua’i molia o ia e le malo i le moliaga mamafa o le gaoi, ae i lalo o se maliliega sa latou sainia ma le malo, lea fo’i na talia e le fa’amasinoga, ua tali ioe ai Vasa i le moliaga mama o le gaoi, lea e mafai ona fa’asala ai o ia i le toese mo le umi e le sili atu i le tasi le tausaga, pe fa’asala foi i se salatupe e le sili atu i le $1,000, poo le fa’asala fo’i i fa’asalaga uma ia e lua.

Na faailoa e le afioga i le ali’i fa’amasino ia Fiti Sunia ia Vasa i le vaiaso na te’a nei e fa’apea, e le manaomia e le fa’amasinoga se ripoti mai le Ofisa Faanofovaavaaia i taimi e lau ai faasalaga o i latou e ta’usala i solitulafono mamafa, ae talu ai le tulaga matuia o le mataupu o lo o a’afia ai o ia, o le mafua’aga lea e matua mana’omia ai e le fa’amasinoga ripoti.

O lo o fa’aauau pea tuutuuga o lo o tatala ai Vasa i tua e fa’atali ai le aso lea ua fa’atulaga e toe tula’i ai i luma o le Fa’amasinoga Fa’aitumalo.

O isi e to’alua o lo o molia fa’atasi ma Vasa, e aofia ai Liren Zhang poo Kevin ma le ali’i o Vincent Toeava, o lo o taofia pea i laua i le toese i Tafuna ina ua le mafai ona totogi le tupe e $450,000 na faatulaga e tatala ai i laua i tua.

O Toeva ua faamoemoe e toe valaauina lana mataupu i le masina fou o Iulai, ae o Kevin lea ua faamoemoe e toe tula’i i luma o le fa’amasinoga maualuga i le aso 22 Iuni.