Fesiligia Sunia ta’iala fa’atino ai galuega a Leoleo luga alatele

O le mataupu lea na taofia fa’apagota ai ni ali’i ave ta’avale se to’alua i le toese i Tafuna mo le po e tasi, e mafua mai ina ua leai ni la pepa e fa’amaonia ai i Leoleo i laua ina ua taofia a laua ta’avale i luga o le alatele i le masina na te’a nei, ua fesiligia ai e le afioga i le ali’i Fa’amasino ia Fiti Sunia ta’iala o lo o fa’atino ai galuega a Leoleo i luga o le alatele.

I le fia maua ai e le afioga i le ali’i Fa’amasino o ni tali mo le tele o fesili a le fa’amasinoga, na ia poloaina ai loa le Sui Komesina o Leoleo, afioga Falanaipupu Taase Sagapolutele ina ia oo atu i luma o le Fa’amasinoga mo le fa’amaninoina o lenei mataupu.

O Tualega Time ma Thomas Noel na taofia e Leoleo a laua ta’avale i le masina na te’a nei, ona o le le usitaia o tulafono i luga o le alatele.

E tusa ai ma ripoti ua i luma o le Fa’amasinoga, e ta’i 3 pepa sala (tickets) sa tuu atu e Leoleo i le au ali’i nei ina ua taofia a laua ta’avale. E eseese taimi na taofia ai e Leoleo ta’avale a Time ma Noele, ae o le aso lava e tasi na tula’i mai ai lenei mataupu.

Ina ua le mafai e i laua nei ona tuuina atu ni a laua pepa faamaonia i Leoleo e pei o se laisene ave ta’avale atoa ai ma ni isi lava pepa faamaonia o lo o i ai se ata, na faia ai loa le faaiuga a Leoleo ina ia taofia i laua i le toese i Tafuna mo le po e tasi.

Ina ua aga’i atu Time ma Noel i le fale fa’amasino i le taeao na sosoo ai, e le gata sa o la laeiina le toniga a pagota, ae sa ta loka uma fo’i o la lima. O lea vaaiga e pei ona fa’amanino e le afioga a Sunia, ua atagia mai ai o i laua o ni tagata ua molia i ni solitulafono mamafa. E le gata fo’i i lea, o lea faiga ua tula’i mai ai le le amanaiaina o laua aia tatau fa’aletulafono.

Na valaau e le malo le Leoleo sa ia taofia Time ina ia tula’i i luma o le nofoa molimau, mo le tuuina atu o lana molimau e tusa ai o le mafua’aga na ia taofia ai faapagota Time i le toese.

Na taua e le Leoleo e fa’apea, na mafua ona faia le faaiuga e taofia ai Time, ona e leai se pepa faamaonia sa ia te ia e fa’amaonia atu ai o ia moni lea o Time. Na tele isi fesili a le ali’i Fa’amasino i le Leoleo, peita’i sa atagia mai i lana tali, e le i fa’amalieina ai le finagalo o le fa’amasinoga.

Ona o lea tulaga, na toe tolopo ai loa e Sunia le mataupu a Time ma Noel seia aulia le aso Tofi o le vaiaso na te’a nei, Me 31. Sa ia poloaina fo’i le afioga a Falanaipupu ina ia oo atu i luma o le fa’amasinoga i le aso lea.

Sa i ai le igoa o Time ma Noel i luga o le Kalena a le fa’amasinoga fa’aitumalo, mo mataupu e valaauina i le aso Tofi na te’a nei, peita’i, e lei finagalo Sunia e valaau le mataupu, ae sa ia toe tolopo mo le aso 14 Iuni i le itula e 9:00 i le teao. Ina ua mae’a ona toe tolopo le mataupu, na malolo ai loa le fa’amasinoga mo sina taimi puupuu, ae valaau e Sunia ia Falanaipupu mo sa laua talanoaga i totonu o lona ofisa.

Na talitonu le Samoa News, o se tasi o mataupu sa fesiligia ai e Sunia ia le sui komesina, o le tulaga i ta’iala o lo o fa’aaoga e Leoleo e fa’atino ai a latou galuega i luga o le alatele.

E le o se taimi muamua lenei ua tula’i mai ai se mataupu fa’apea. I le masina o Tesema o le tausaga na te’a nei, na poloaina ai fo’i e Sunia ia le Komesina o Leoleo ia Lei S. Thompson, lea fo’i na maua ai ma le avanoa o Falanaipupu e oo atu ai i le fa’amasinoga, ona o se Tina na loka i le falepuipui mo po e 2, e mafua mai i lona laisene ave ta’avale ua mae’a le aoga i le taimi na fesiligia ai o ia e Leoleo i luga o le alatele.

Saunoa Sunia i le iloiloga o le mataupu lea i le tausaga na te’a nei e fa’apea, ua manino i le fa’amasinoga, e le o i ai ni ta’iala o lo o fa’aaoga e Leoleo e fa’atonutonu ai a latou galuega  i luga o le alatele.

Na faailoa e Sunia ia Lei ma Falanaipupu e fa’apea, e le o se tiute o le faamasinoga le taumafai e fa’atonu Leoleo i auala e fa’atino ai a latou galuega, o le tiute o le fa’amasinoga, ia mautinoa o lo o usitaia le tulafono.