E LE O OE O SE SULI MONI

Na ona uma lava o le talanoaga a le fafine o Mekala ma le Ta’ita’i o lana vaega fa’atupu fa’alavelave, liliu loa ma lana ta’avale ae toe fa’anatinati atu i lona fale. E alu fua le ta’avale a le fafine ae ua le mapu le ta ta o lona fatu ona o le popole o lona loto, poo le a se mea o loo tula’i mai i le fale aemaise ai lona to’alua o Pulusi. O le mamao lea ua i ai Mekala ma lona fale, pe a ma le 30 minute e alu ai i luga o le alatele. E le o se taimi pisi lea o loo malaga ai le fafine, o le taimi ua leva ona manava galuega i totonu o le aai, ma ua amata fo’i ona gaogao luga o le alatele, ona ua tele ina taunu’u tagata faigaluega i o latou aiga. Na avea le ova o le saoasaoa o le ta’avale a le fafine o Mekala mai maila fa’atulafonoina o luga o le auala na fa’afuase’i ai ona e e mai le sailini a le ta’avale Leoleo. Na tu’i e le fafine le foeuli o lana ta’avale i le ita tele, ona o lea o le a alu le isi taimi pe a taofi o ia e le Leoleo, ao lea o loo naunau e fia oo i le fale. “Tina, e 12 maila lea ua ova ai lau alu i luga o le auala ma maila fa’atulafono. E i ai se mafua’aga ua ala ai ona e natinati i lenei afiafi.” O le fesili atu lea a le tama’ita’i Leoleo lea na ia taofia le ta’avale a Mekala. “Ioe lau susuga a le Malu o le malo, o a’u na ou sau e fa’atau atu ni fualaau’aina e fa’amanaia atili ai le kuka o le afiafi, peita’i o lea ua ou toe manatua, e lei tapeina le ogaumu o loo fa’ati’eti’e ai le mea’ai, o le ala lea o lo’u toe natinati i le fale ina ne’i tula’i mai se faalavelave, ae na o si o’u to’alua ma’i o loo taoto i le fale.” Se fafine e ese le poto e pepelo. Na luelue le ulu o le tama’ita’i Leoleo ona fa’apea atu lea i le fafine o Mekala, “Ua lelei Tina, o le a leai sau pepa sala e avatu, ae o le a tu’u atu oe e te alu e siaki lou fale, manatua, e le tatau ona sili atu maila e te alu ai ma maila fa’atulafono o le alatele. Ae manuia lou afiafi.” Na fa’afetai Mekala i le tama’ita’i Leoleo ma fa’amanuia atu ai fo’i, ma toe fa’aauau loa lana malaga.

Ina ua latalata le ta’avale a le fafine i le nofoaga lea e nofo ai, sa ia iloa mamao atu ai le ta’avale a lana vaega faatupu faalavelave, o loo paka mai i le isi itu o le paka e koleni ai tagata. Na alu atu le ta’avale a Mekala ma afe loa i totonu o le lotoa ma aga’i sa’o atu lava ma paka lana ta’avale i luma o le fa’apaologa o le la fale. O le mea muamua lava na oso le fafine i fafo ma autilo i ai, o le faitoto’a o le la fale. Na iloa atu e Mekala o loo tapuni pea lava le faitoto’a. Sa ia autilo solo i autafa o le fale pe i ai ni nai vaaiga e iloa ai se mea sa tupu, peita’i e leai lava se mea sa ia iloaina. O foliga lava ia o le fanua ma le fale sa i ai. Na tapuni le faitoto’a o le ta’avale ae ua aga’i atu loa i le fasitepu e alu i luga o le fale fogafalelua. E savali lava vae o Mekala ae o ona mata e le malolo i le tau fai autilo solo pe i ai lava se mea  e ono ta’u atu ai sa i ai ni tagata i lona fale. “Pulusi! Pulusi!” O le tau valaau lea a Mekala ao aga’i atu i luga o le sitepu o le fale. Na ona oo atu lava o le fafine i luma o le faitoto’a e ulufale ai i totonu, ae tau atu loa ma lana vaai i le mata tioata o loo ta’atia mai i luma tonu lava o le faitoto’a, o loo ufi e le mea solovae le isi itu o le mata tioata. O le te’i tele lo Mekala i le vaaiga lea, na ia tago atu ai ma ma piki mai i luga le mata tioata ma ia iloa ai, o le mata tioata faitau tusi lea a lona to’alua. E lei toe fa’atali le fafine, ae ua ia tago atu ua tatala le faitoto’a ma ulufale loa i totonu. O se itu na matua fa’ateia ai le fafine, ina ua matala mai le faitoto’a o le fale, ma ia iloa ai ua leai Pulusi ma totonu o le fale. O le nofoa sa masani ona nofo ai lona to’alua ma fa’aluelue ai, o loo si so mai i le isi tulimanu o le la potu malolo, o totonu fo’i o le potu malolo o loo gasu uma, e foliga mai sa i ai ni tagata i totonu. O le e e leotele a le fafine o Mekala na mafua ai ona laga atu ana tama fa’atupu fa’alavelave e fia iloa le mea ua tupu. Ae na fa’ateia le au ali’i ia ina ua taunu’u atu i totonu o le fale ma la iloa ai, ua leai se Pulusi mai totonu o le fale.