Tala otooto mai le Fa’amasinoga

WILLIAM OTTO

O le ali’i lea na ulufale fa’amalosi i totonu o se fale i le po ma taumafai e fa’amalosi se tama’ita’i e 15 tausaga le matua i le tausaga na te’a nei, ua poloaina le taofia o ia i le toese i Tafuna mo le umi e 28 masina, o se tasi lea o tuutuuga o lana nofovaavaaia e 7 tausaga.

Na fa’atoese le ali’i o Otto i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i ai i tua i lona aiga e fa’aleleia lona olaga. Na taua e le ua molia e fa’apea, o le tele o taimi e taumafai ai lava e faia ni suiga lelei i lona olaga, peita’i ua avea le ‘ava malosi atoa ai ma le fa’alavelave atu o ana uo ia te ia, ua fai ma pa pupuni i lona faia lea o ni mea lelei mo ia.

Sa ia ta’utino i le fa’amasinoga, afai ae tuuina atu se isi avanoa mo ia, o le a fa’aaoga aso o lo o totoe o lona ola e tausi ai lona aiga, tautua ai fo’i ma lotu ma le nu’u.

Na talosaga le loia fautua a le ua molia ia Michael White i le fa’amasinoga, mo se fa’asalaga faanofovaavaaia. Na taua e White e fa’apea, o le fa’afitauli o le ‘ava malosi lea ua mafua ai ona a’afia Otto i solitulafono mamafa.

Na lagolagoina e le loia a le malo ia Robert Morris le tatau lea ona faasala Otto i se faasalaga faanofovaavaaia, peita’i i lona talitonuga, e tatau fo’i ona i ai se taimi e taofia ai o ia i le toese, ina ia fai ma lesona o le solitulafono sa ia faia.

Na talia e le afioga i le ali’i Fa’amasino ia Elvis P. Patea fautuaga a loia, ma faanofovaavaaia ai loa Otto mo le 7 tausaga i lalo o poloaiga e ao ona ia usita’i i ai, ina ua ta’usala o ia i le moliaga mamafa o le talepe fale i le tulaga lua.

O ni isi o tuutuuga e aofia ai lona tuliina o masina e 28 i le toese i Tafuna, aua ne’i ona toe tagofia le ‘ava malosi poo fualaau fa’asaina, ia lesitala fo’i lona igoa i le lisi o i latou ua ta’usala i le faia o uiga mataga i tama’ita’i talavou.

ALESANA TAVITA

O le ali’i e 36 tausaga le matua lea o lo o tu’uaia i lona fa’aaoga o se ma’a e fa’aoo ai manu’a i se isi ali’i, ua molia nei o ia i moliaga mamafa o le faaoolima i le tulaga lua, atoa ai ma moliaga mama e lua o le fa’atupu vevesi i nofoaga faitele, atoa ai ma le fa’aaoga fa’asolitulafono o se a’upega.

O le vaiaso nei na tula’i ai Alesana Tavita i i luma o le fa’amasinoga fa’aitumalo mo le ulua’i taimi, ma fa’atulaga ai loa e le fa’amasinoga le aso Tofi o le vaiaso fou, aso 7 o Iuni i le itula e 10:30 i le taeao e faia ai lana ulua’i iloiloga.

O le fa’alavelave e pei ona molia ai Tavita e le malo, na alia’e mai i se inugapia sa faia a le ua molia, o le ali’i na manu’a atoa ai ma nisi o a laua uo. Na taua e le malo le taumafai o le ali’i ua manu’a e fa’ao’olima ia Tavita peita’i e le i manuia. O lea na tago atu ai loa Tavita i le ma’a ma tu’i ai loa lona u’u e pei ona tu’uaia ai o ia e le malo.

E $5,000 le ua fa’atulaga e tatala ai Tavita i tua mai le toese i Tafuna. Afai ae mafai ona tatala o ia i tua, ua poloaina o ia e le fa’amasinoga ina ia aua ne’i ona taumafai e fa’afesootai le sa manu’a i lenei fa’alavelave, po o nisi fo’i o molimau a le malo.

Ia avea o ia ma tagatanu’u e tausisi i tulafono a le malo i soo se taimi, ma ia aua fo’i ne’i ona toe solia lava se isi tulafono.