Fa’atali pea le loia a Toeava i le ripoti a Leoleo

Na fa’aalia e le loia a Vincent Toeava i luma o le fa’amasinoga maualuga i le vaiaso na te’a nei, o lo o ia fa’atali pea i le ripoti a Leoleo e tusa ai o le mataupu o lo o tu’uaia ai e le malo le o lo o ia tauaveina. Sa ia taua atili e fa’apea, e le mafai ona ia faia se isi lava gaioiga e fa’atatau i le mataupu a Toeava, se’i vagana ua ia taulimaina le ripoti a Leoleo.

O le vaiaso na te’a nei na toe valaau ai le mataupu a Toeavaina i luma o le fa’amasinoga maualuga, mo le fofogaina lea o lana talosaga na fa’aulu e lana loia fautua ia David Vargas, mo se avanoa e fa’aitiitia ai e le fa’amasinoga le tupe o lo o tatala ai o ia i tua.

O Toeva, o se tasi lea e to’atolu i ai tagata o lo o tu’uaia e le malo i le mataupu e fa’atatau i le fa’aaoga fa’agaoi o pepa taumafa (food stamp) mai le polokalame o loo fa’atupe mai e le malo tele ae o lo o faafoe e le Matagaluega o Auaunaga ma Tautua Lautele a le malo (DHSS), lea e fa’apitoa mo tagata matutua o le atunu’u.

Ina ua valaau le mataupu a Toeava i luma o le fa’amasinoga, na fa’ailoa ai loa e le loia a le malo ia Robert Morris se talosaga ina ia toe tolopo le mataupu mo se isi taimi, se’i fa’atali le ripoti a Leoleo e uiga i lenei mataupu. Na taua atili e Morris e fa’apea, ina ua ia fesiligia Leoleo o loo gafa ma le suesueina o lenei mataupu, sa latou fa’ailoa atu ia te ia, e lei mae’a lava ona tu’u fa’atasi le ripoti mo lenei mataupu, ona o loo i ai ni isi o vaega o loo fia fa’amautu muamua.

E lei fiafia le loia a Toeava i le folasaga a le malo. Na taua e Vargas e fa’apea, e lagona lona le fiafia ona o le talosaga lea ua faailoa fa’afuase’i e le malo, ae ua tele masina o tuu atu i ai lana talosaga ina ia tuuina atu le ripoti a Leoleo, atoa ai ma fa’amaumauga uma e uiga i lenei mataupu sei la vaavaai i ai ma Toeava.

“E le mafai ona ou finauina le tele o mataupu o loo o’u tauaveina, pe afai e le tuuina mai e le malo mau fa’amaonia e fa’asaga i lenei mataupu. Ua uma ona ou tuuina atu le talosaga i le malo mo mau faamaonia atoa ai ma le ripoti a Leoleo ina ia tuuina mai, a o lea lava e leai ma se mea ua ma mauaina ma Toeava. Pau fa’amaumauga ia ua mae’a ona tuuina mai e le malo, o le lisi o moliaga atoa ai ma le otootoga o le latou tagi,” o le saunoaga lea a Vargas.

“O a ituaiga mau fa’amaonia o lo o e talosagaina mai le malo,” o le fesili lea a le afioga i le ali’i Fa’amasino Sili ia Michael Kruse.

“O a fa’amaumauga ua mae’a ona tuuina atu e le malo ia te oe, e ese mai i le lisi o moliaga atoa ai ma le otootoga o le latou tagi,” o le fesili lea a Kruse ia Vargas.

Ae na tali le ali’i loia, e leai ma se mau fa’amaonia ua tuuina atu e le malo ia te ia.

“O a ituaiga fa’amaumauga o loo e mana’o e avatu e le malo ia te oe,” o le toe fesili atu lea a Kruse ia Vargas.

“O mea uma lava e fa’atatau i le mataupu o loo tuuaia ai Toeava,” o le toe tali atu lea a Vargas i le fesili a Kruse.

“Ta’u mai poo a tonu mea uma ia e te fai mai ai. Aua afai o mea uma, o lea e tele mago o loo tutu solo i le atunuu, ae ou te fia iloa poo a mea uma ia e te fai mai ai,” o le toe tali atu lea a Kruse i le saunoaga a Vargas.

“O mea uma lava e aofia ai le ripoti a Leoleo, o fa’amatalaga tusitusia a molimau eseese uma sa fesiligia e Leoleo, o faamaumauga mai le Faletupe, atoa ai ma isi uma mau e manatu le malo e tatau ona latou tuuina mai,” o le tali lea a Vargas.

Na fa’asaga Kruse i le itu o loo alala mai ai le loia a le malo ma fesili i ai, pe aisea ua tuai ai ona tuuina atu le ripoti ia Vargas. Na saunoa Morris e fa’apea, sa ia fesiligia Leoleo o loo suesueina lenei mataupu, ae na latou faailoa atu ia te ia, e lei mae’a la latou ripoti. Na folafola e Morris i le fa’amasinoga, o le taimi lava e mae’a ai le ripoti a Leoleo, ona ia tuuina atu loa lea ia Vargas.

Saunoa Kruse e fa’apea, talu ai e le o i ai se ripoti a Leoleo ua saunia, e le mafai fo’i la ona ia faia se poloaiga e fa’atonu ai le malo e tauaao atu mau faamaonia i le itu tete’e.

“Lau susuga i le loia a le malo, o le poloaiga lenei a le fa’amasinoga mo oe, ia oo atu i le aso Faraile, Iuni 1 ua maua e Vargas ma lana itu mau fa’amaonia uma lava e uiga i le mataupu lenei, afai e leai, e i ai tulaga e ono tula’i mai i le le usitaia o le poloaiga a le fa’amasinoga,” o le fa’atonuga lea a Kruse ia Morris.

Na vave ona faauilavea Vargas ma faailoa i le fa’amasinoga, o ia e le avanoa i le aso Faraile, ona o le aso lea e malaga ese ai ma le atunu’u. Ua mae’a fo’i ona tuuina atu i le fa’amasinoga lana talosaga e faamaonia ai lona le avanoa i le aso lea.

Na vaaia foliga le fiafia o Kruse ma ia faapea atu ai ia Vargas, e tatau i sui uma o le Asosi Loia ona latou iloa lelei, o talosaga e faailoa atu ai i le fa’amasinoga lo latou le avanoa, e leai se taua, ua na o se talosaga lava.

O le aso Tofi, Me 31 lea ua toe tolopo i ai le mataupu a Toeava, ma ua toe taofia nei o ia i le toese i Tafuna e fa’atali ai le aso lana iloiloga. O le aso fo’i lea ua fa’atulaga e fofogaina ai le mataupu a le ali’i faipisinisi Asia o lo o tu’uaia fa’atasi ma Toeava i lenei mataupu, le susuga ia Liren Zhang, poo Kevin fo’i e pei ona iloa ai e le to’atele.

O Toeava, o lo o tu’uaia e le malo i moliaga mamafa e 19, ma o loo taofia pea o ia i le toese ina ua le mafai ona ia totogi le $450,000 a faatulaga e tatala ai o ia i tua.